Zyra e fushatës së zëvëndës presidentes në SHBA, Kamala Harris në Arizona është qëlluar nga një individ i paidentifikuar të hënë (23 shtator) duke shkaktuar vetëm dëme materiale, sipas autoriteteve policore.
Incidenti vjen vetëm disa ditë para vizitës së planifikuar të Harris në Arizona për fushatën e saj presidenciale dhe pak muaj pas atentatit ndaj ish-presidentit Donald Trump në këtë shtet.
“Askush nuk ishte brenda gjatë orëve të natës, por ky incident ngre shqetësime për sigurinë e njerëzve që punojnë në atë ndërtesë, si dhe të atyre aty pranë,” tha Sgt. Ryan Cook, zyrtari i informacionit publik të Departamentit të Policisë Tempe, në një deklaratë të martën (25 shtator).
Sipas Patty Socarras, drejtoreshë e komunikimit për Partinë Demokratike të shtetit, zyra e fushatës në Tempe është një nga 18 zyrat në terren për fushatën Harris në Arizona.
Pamjet nga zyra tregojnë dy vrima plumbash në një derë dhe dy të tjera në dritare.
Hetuesit po analizojnë provat e mbledhura në vendngjarje dhe kanë forcuar sigurinë për personelin dhe të tjerët në zonë.
“Ne i jemi mirënjohës policisë së Tempe-s që erdhi shpejt në vendngjarje dhe për fat askush nuk ishte i pranishëm apo i lënduar,” tha Sean McEnerney, menaxheri i fushatës së koordinuar të Partisë Demokratike të Arizonës.
Gjatë gjithë fushatës së saj, Harris ka bërë thirrje për ndalimin e armëve sulmuese dhe që shtetet të vendosin ligje për flamurin e kuq.
"Ne duhet t'i japim fund epidemisë së dhunës me armë në vendin tonë një herë e përgjithmonë," tha Harris në një nga mitingjet e saj. /Versus.al
