Mijëra besimtarë në Sheshin e Shën Pjetrit
Çdo gjë është gati për lamtumirën e fundit ndaj Papa Françeskut në sheshin para Bazilikës së Shën Pjetrit. Mijëra besimtarë janë vënë në radhë që në orët e para të mëngjesit, dhe hyrjet u hapën rreth orës 5:30 për të hyrë në rrugën “Via della Conciliazione”. Masat e sigurisë janë shumë të rrepta për shkak të pjesëmarrjes së rreth 160 delegacioneve të krerëve të shteteve dhe qeverive, si dhe mbi 200 mijë personave që do të marrin pjesë në ceremonitë mortore. Janë vendosur mbi 10 ekrane gjigante mes Sheshit të Shën Pjetrit dhe Via della Conciliazione, deri në Castel Sant’Angelo dhe Piazza Risorgimento. Pas përfundimit të ceremonisë, arkivoli i Atit të Shenjtë do të transferohet në Bazilikën e Santa Maria Maggiore në kodrën Esquilino, ku do të bëhet varrimi. Është planifikuar një kortezh i gjatë që do të ecë ngadalë nëpër rrugët e qendrës historike të Romës.
Në Sheshin e Shën Pjetrit shfaqet një pankartë: “Adios Padre, Maestro y Poeta”
“Adiós padre, maestro y poeta”, që do të thotë “Lamtumirë At, mësues dhe poet”. Kjo është shprehja që lexohej në një pankartë që u shfaq në Sheshin e Shën Pjetrit pak orë para fillimit të funeralit të Papa Françeskut. Pankarta është firmosur nga “los jóvenes de Scholas”, të rinjtë e projektit edukativ Scholas të themeluar nga Papa Françesku në vitin 2001.
Zelensky në Romë: “Mundësi për takim me Donald Trump”
Është “e mundur” një takim bilateral midis presidentit ukrainas Volodymyr Zelensky dhe presidentit amerikan Donald Trump në Romë, në margjinat e funeralit të Papa Françeskut. Këtë e ka bërë të ditur një burim i kualifikuar për agjencinë AFP. Sipas raportimeve, delegacionet e të dy liderëve janë në kontakt për të shqyrtuar mundësinë dhe mënyrën e realizimit të këtij takimi, megjithëse deri tani nuk ka asnjë konfirmim zyrtar as nga Shtëpia e Bardhë dhe as nga zyra e presidentit ukrainas. /Versus.al/
