Eksploruesi i shekullit të 15-të Kristofor Kolombi ishte një hebre sefardik nga Evropa Perëndimore. Në këtë përfundim dolën shkencëtarët spanjollë, pasi përdorën analizën e ADN-së për t’I dhënë fund një misteri shekullor. Shumë historianë kanë vënë në dyshim teorinë tradicionale se Kolombi erdhi nga Genova, Itali. Teori të tjera variojnë nga të qenit hebre spanjoll apo grek, te baskët, portugezët apo britanikët.
Për të zgjidhur misterin, studiuesit kryen një hetim 22-vjeçar, të udhëhequr nga eksperti mjeko-ligjor Miguel Lorente, duke testuar mostra të vogla të mbetjeve të varrosura në Katedralen e Seviljes, e shënuar prej kohësh nga autoritetet atje si vendi i fundit i pushimit të Kolombit, megjithëse kishte pretendime rivale.
Ata i krahasuan me ato të të afërmve dhe pasardhësve të njohur dhe gjetjet e tyre u njoftuan në një dokumentar të titulluar "Columbus ADN: Origjina e vërtetë".
“Ne kemi ADN nga Christopher Columbus, shumë e pjesshme, por e mjaftueshme. Kemi ADN nga Hernando Colón, djali i tij. Dhe si në kromozomin Y (mashkull) ashtu edhe në ADN-në mitokondriale (të transmetuar nga nëna) e Hernando ka tipare të pajtueshme me origjinën hebraike", tha Lorente.
Pas analizimit të 25 vendeve të mundshme, Lorente tha se mund të thuhet se Kolombi ka lindur në Evropën Perëndimore.
Të enjten, Lorente shtoi gjithashtu se ata kishin konfirmuar se mbetjet në Katedralen e Seviljes i përkisnin Kolombit./Versus.al
