Një burrë 64-vjeçar nga qyteti Ozieri, në provincën e Sasarit të Italisë, është arrestuar pasi kishte përgatitur me kujdes një kurth të rrezikshëm për të kryer një masakër kundër karabinierëve italianë. Sipas autoriteteve, natën e së martës, Antonio Maria Pani kishte mbushur apartamentin e tij me gaz dhe më pas kishte telefonuar shërbimin emergjent 112, duke raportuar se kishte vrarë gruan e tij.
Qëllimi ishte i qartë: të tërhiqte forcat e rendit në banesë dhe të shpërthente apartamentin përmes një mekanizmi që mund të aktivizohej në distancë. Ndërkohë, ai ishte fshehur në një bunker të nëndheshëm të ndërtuar vetë në oborrin e shtëpisë së tij.
Zbulimi i mashtrimit dhe ndërhyrja e zjarrfikësve
Ende nuk dihet se çfarë e ka bërë autorin të heqë dorë në momentin e fundit. Pas mbërritjes në vendngjarje, zjarrfikësit thyen derën e banesës dhe mbyllën gazin. Brenda nuk u gjet asnjë trup dhe asnjë person. Hetuesit më pas kontaktuan gruan e tij, e cila rezultoi të ishte gjallë dhe në gjendje të mirë, duke jetuar në një komunë tjetër.
Forcat e rendit kuptuan menjëherë se kishin të bënin me një kurth të rrezikshëm. Për rreth një orë, banorët e zonës u urdhëruan të qëndronin të mbyllur në shtëpitë e tyre, pasi ekzistonte dyshimi se 64-vjeçari Antonio Maria Pani mund të ishte i armatosur.
Pas kontrolleve të imtësishme, karabinierët e Ozierit e zbuluan burrin të fshehur në bunker dhe e arrestuan pa asnjë rezistencë.
Akuza për "masakër" dhe urrejtje ndaj karabinierëve
Sipas prokurorisë, autori dyshohet se ka vepruar për shkak të një urrejtjeje të thellë ndaj forcave të rendit, të cilat i konsideronte përgjegjëse për ndarjen nga bashkëshortja. Ajo e kishte denoncuar disa vite më parë për dhunë në familje.
Vetëm pak ditë më parë, ai ishte dënuar nga Gjykata e Sasarit për dëmtimin e një lapidari përkujtimor në nder të karabinierit ëalter Frau, i vrarë në vitin 1995 në Chilivani gjatë një përplasjeje me një bandë grabitësish.
Autori aktualisht ndodhet në burgun e Bancalit dhe do të përballet me akuzat për tentativë masakre dhe simulim të një krimi.
