Turqia dhe Greqia mund të zgjidhin mosmarrëveshjet e tyre në detet Egje dhe Mesdhe, tha të mërkurën Presidenti turk Rexhep Tajip Erdogan, ndërsa kryeministri i Greqisë, Kyriakos Mitsotakis, i kërkoi Ankarasë të heqë një kërcënim të hershëm lufte.
Dy udhëheqësit i bënë komentet në Ankara, pas bisedimeve që synonin të ruanin dialogun midis rivalëve të hershëm në një kohë kur tensionet janë rritur.
"Në takimin tonë, ne edhe një herë i trajtuam hapur dhe sinqerisht qëndrimet tona në lidhje me Egjeun dhe Mesdheun lindor," tha Erdogan. "Ndërsa çështjet aktuale janë komplekse, ato nuk janë të pakapërcyeshme sipas ligjit ndërkombëtar. E tëra çfarë nevojitet është besimi i mirë, dialogu konstruktiv dhe vullneti për të gjetur një zgjidhje."
Aleatët e NATO-s, Greqia dhe Turqia, mbeten në mosmarrëveshje për një sërë çështjesh, duke përfshirë kufijtë detarë, Qipron dhe të drejtat e shpimit në detet Egje dhe Mesdheun lindor. Turqia ka shprehur gjithashtu shqetësim për një bashkëpunim në rritje në mbrojtje dhe energji midis Greqisë, Izraelit dhe Qipros që e lë mënjanë Ankaranë dhe që disa e shohin si një përpjekje për të kundërshtuar ndikimin e Turqisë në rajon.
Greqia dhe Turqia kanë ardhur në prag të luftës disa herë gjatë gjysmës së shekullit të fundit. Një mosmarrëveshje mbi të drejtat e eksplorimit të energjisë në vitin 2020 çoi në përballjen e anijeve luftarake të të dy vendeve në Mesdhe.
Në javët e fundit, zyrtarët grekë kanë riafirmuar të drejtën e Greqisë për të zgjeruar ujërat e saj territoriale në Egje në 12 milje detare (22.2 kilometra) nga gjashtë që janë aktualisht. Turqia - parlamenti i së cilës në vitin 1995 e shpalli një veprim të tillë si "shkak lufte" i ka kritikuar komentet si të papranueshme dhe argumenton se zgjerimi i ujërave territoriale do të shkelte të drejtat e saj, duke kufizuar rëndë aksesin e saj detar.
Mitsotakis sugjeroi që duke pasur parasysh momentin pozitiv në marrëdhëniet greko-turke, ka ardhur koha për të hequr të gjitha kërcënimet që varen mbi lidhjet e tyre.
"Kjo është arsyeja pse unë besoj, në të njëjtën frymë si përvoja pozitive që ka ndodhur, se është koha tani për të hequr çdo kërcënim, formal dhe substancial, në marrëdhëniet tona. Nëse jo tani, atëherë kur?" tha ai.
Ndërkohë, Erdogan pohoi se pjesëmarrja e Turqisë në nismat e reja mbrojtëse të nisura në Evropë do t'u shërbente interesave të të dy vendeve.
Greqia ka kundërshtuar pjesëmarrjen e Turqisë në një nismë të njohur si programi i Veprimit të Sigurisë për Evropën, i cili është hartuar për të rritur aftësitë ushtarake të kontinentit, duke thënë se Ankaraja duhet të heqë dorë nga kërcënimi i saj për luftë për shkak të mosmarrëveshjes për kufirin detar. Versus.al
