Kina ka zhvilluar së fundmi një stërvitje ushtarake në shkallë të gjerë, e cila simulon rrëzimin e pushtetit tajvanez, raporton e përditshmja ekonomike Nikkei. Pekini, i cili e konsideron shtetin ishullor si një provincë rebele, dyshohet se është frymëzuar nga kapja e presidentit venezuelian Nicolás Maduro për të ndryshuar planet e tij të sulmit.
Pamje të transmetuara së fundmi nga televizioni shtetëror kinez CCTV i kanë tërhequr vëmendjen gazetës japoneze Nikkei: Pekini dyshohet se ka zhvilluar një stërvitje ushtarake të një lloji të ri, me synim përgatitjen e një pushtimi të mundshëm të Tajvanit. Vendndodhja dhe data e këtyre manovrave mbeten të panjohura, ashtu si edhe njësitë e forcave të armatosura kineze që kanë marrë pjesë në to.
Sipas gazetës ekonomike, gjatë këtyre stërvitjeve, trupat identifikuan objektiva me ndihmën e dronëve dhe simuluan një sulm nate, sipas modelit të arrestimit të Maduro-s nga ushtria amerikane.
Ndërhyrja amerikane
Sipas Nikkei, kjo stërvitje synon të tregojë ndaj Shteteve të Bashkuara se Kina disponon kapacitete ushtarake të ngjashme. “Qeveria kineze druhet nga një ndërhyrje amerikane”, thekson gazeta, duke shtuar se tensionet mbi këtë çështje me Uashingtonin janë të larta.
Kjo stërvitje ushtarake synon gjithashtu të intimidojë qeverinë e presidentit tajvanez Lai Ching-te. Nuk është hera e parë që ushtria kineze organizon operacione të tilla.
Tensionet mes Tajvanit dhe Kinës janë rritur ndjeshëm kohët e fundit. Pekini e konsideron ishullin si një provincë rebele prej më shumë se 75 vitesh dhe së fundmi ka kërcënuar disa herë se do të përdorë forcën për të marrë kontrollin e Tajvanit.
