Tetë persona janë akuzuar për korrupsion, pastrim parash dhe pjesëmarrje në një organizatë kriminale, pas një hetimi në Parlamentin Evropian, tha sot në një deklaratë prokurori publik i Belgjikës, sipas “Reuters”.
Akuzat vijnë pasi prokurorët belgë thanë më 13 mars se kishin arrestuar disa individë në Parlamentin Evropian të dyshuar për korrupsion dhe rryshfet.
Autoritetet policore kontrolluan dy zyra që i përkisnin disa asistentëve politikë të Parlamentit Evropian në Strasburg.
Policia kontrolloi zyrat më 13 mars, në të njëjtën ditë kur autoritetet bastisën më shumë se 20 adresa në Belgjikë dhe Portugali, si pjesë e një hetimi për korrupsionin në Parlament që dyshohet se përfitonte “Huawei”.
Një nga zyrtarët konfirmoi se kërkimi në Strasburg ishte pjesë e hetimit mbi praktikat e lobimit të “Huawei”.
Deputetët dhe ndihmësit e tyre kanë zyra në ambientet e institucionit në Bruksel, ku zhvillohet aktiviteti i rregullt parlamentar, si dhe në selinë zyrtare të institucionit në Strasburg, Francë, ku zhvillohen seancat plenare.
Dy zyra në Bruksel u kontrolluan në fillim të këtij muaji dhe iu dorëzuan qiramarrësve të tyre.
Prokurorët belgë hetuan nëse “Huawei” kishte bërë pagesa të paligjshme – për të marrë një letër të hapur të shkruar, të nënshkruar nga tetë parlamentarë evropianë, e cila mbronte interesat e gjigantit të teknologjisë kineze.
Një zëdhënës i “Huawei” tha në një deklaratë se kompania kishte një politikë zero tolerance ndaj korrupsionit apo keqbërjeve të tjera dhe se ishte e përkushtuar të respektonte të gjitha ligjet dhe rregulloret në fuqi në çdo kohë.
