Qendra Evropiane për Kontrollin dhe Parandalimin e Sëmundjeve (CDC) ngriti sot nivelin e alarmit për mpox dhe u kërkoi vendeve europiane të rrisin sigurinë në aeroporte për udhëtarët që vijnë nga zonat e prekura nga virusi.
Agjencia evropiane tha se tani sheh një rrezik "të moderuar" mpox, krahasuar me një rrezik "të ulët" më parë, për popullatën e përgjithshme dhe udhëtarët.
Agjencia shtoi se mundësia e transmetimit në Evropë mbetet shumë e ulët, duke qenë se infeksionet e importuara diagnostikohen shpejt dhe zbatohen masat e kontrollit.
Përhapja aktuale e sëmundjes në Republikën Demokratike të Kongos filloi me përhapjen e një lloji endemik të njohur si clade I.
Por një variant i ri, clade Ib, duket se përhapet më lehtë përmes kontaktit të përditshëm të ngushtë, duke përfshirë kontaktin seksual.
“Për shkak të lidhjeve të ngushta midis Evropës dhe Afrikës, ne duhet të përgatitemi për më shumë infeksione të importuara”, tha drejtoresha e agjencisë Pamela Reddy ëagner.
Në fillim të kësaj jave, Organizata Botërore e Shëndetësisë e shpalli shpërthimin e sëmundjes në Afrikë një emergjencë të shëndetit publik pasi infeksionet me shtamin clade Ib filluan të përhapeshin në vendet fqinje të DR Kongos.
Ditën e djeshme në Suedi u konfirmua rasti i infektuar me mpox, e cila u konsiderua si shenja e parë e përhapjes së sëmundjes jashtë Afrikës.
CDC evropiane rekomandoi që autoritetet e shëndetit publik të përgatisin plane dhe të përgatiten për zbulimin e shpejtë të çdo infeksioni të klasës I që mund të arrijë në Evropë.
Agjencia parashikon se ndikimi i këtij lloji të virusit do të jetë i vogël në Evropë për sa kohë të ekzistojnë masat e duhura të mbikëqyrjes dhe kontrollit.
Mpox ose i njohur ndryshe si lija e majmunëve është një infeksion viral që shkakton simptoma të ngjashme me gripin dhe, megjithëse shpesh i butë, mund të jetë fatal në raste të rralla.
