"Marrëdhënia e veçantë" midis SHBA-së dhe Britanisë së Madhe duket se po merr një kuptim të mirëfilltë, pasi një hetim mbi pemën gjenealogjike të Donald Trump zbulon se ai ndan të njëjtin gjak me Mbretin Charles III .
Pikërisht me këtë argument, Presidenti Amerikan, nuk e humbi rastin të komentonte në një publikim përkatës në rrjetet sociale.
“Gjithmonë kam dashur të jetoj në Pallatin e Buckinghamit!” shkroi ai , duke shtuar se synon ta diskutojë çështjen drejtpërdrejt me çiftin mbretëror.
Sipas provave të paraqitura nga historiani dhe gjenealogu Robert Barrett, Trump dhe Charles janë kushërinj të 15-të. Kjo lidhje nuk është rastësi, pasi të dy rrjedhin nga një figurë e fuqishme në historinë skoceze, Konti i 3-të i Lennox, John Stuart, i cili jetoi në shekullin e 15-të . Lennox ishte një stërnip i Mbretit James II të Skocisë , gjë që e vendos Presidentin Amerikan drejtpërdrejt në një linjë gjaku mbretërore që përshkon shekuj të historisë evropiane.
Lidhja fillon me Zonjën Helen Stewart, vajzën e Kontit të Lennox, e cila u martua me një anëtare të familjes Sutherland . Përmes brezave të njëpasnjëshëm të familjeve Mackay dhe MacLeod, linja arrin deri te nëna e Presidentit Trump, Mary Ann MacLeod .
Mary Anne u largua nga Ishulli Lewis, Skoci, në vitin 1930 për të kërkuar një jetë më të mirë në Amerikë, ndoshta duke mbajtur me vete pa e ditur gjenet e dinastisë Stuart. Megjithatë, kjo trashëgimi mund të shpjegojë magjepsjen e qëndrueshme që monarkia ka me Donald Trump . Siç vëren raporti, Presidenti zhvilloi një kimi të veçantë me Mbretëreshën e ndjerë Elizabeth, të cilën ai e përshkroi si një "grua fantastike", ndërsa pritja e fundit e Charles në Shtëpinë e Bardhë u mbajt në një atmosferë që të kujtonte një mbledhje familjare.
Përtej Britanisë, hulumtimi tregon se Trump është gjithashtu i lidhur gjenealogjikisht me shtëpitë mbretërore të Danimarkës dhe Suedisë. Kjo u jep një dimension të ri deklaratave të tij të mëparshme në lidhje me Groenlandën, dhe nuk përjashtohet që një argument i mbushur me humor si ai për Buckinghamin mund të bëhet edhe për... Groenlandën./Përshtati në shqip Versus.al
