Kryetari i Bashkisë së Stambollit Ekrem Imamoglu, i cili u arrestua të mërkurën me akuzat për "korrupsion" dhe "terrorizëm", ka cilësuar në polici akuzat ndaj tij si "imorale dhe të pabaza", sipas një deklarate të lëshuar sot nga bashkia e qytetit turk.
“Akuzat joetike dhe të pabaza kundër meje, nga raportet e fabrikuara deri tek koha e hetimeve, kanë për qëllim minimin e reputacionit dhe besueshmërisë sime”, tha kryebashkiaku, sipas deklaratës.
Kryebashkiaku i Stambollit mbërriti në gjykatën e sotme më herët për t'u paraqitur para prokurorit, katër ditë pas arrestimit të tij, i cili ka shkaktuar një valë protestash në të gjithë Turqinë.
Kryetari i bashkisë, një figurë kryesore e opozitës, mbërriti në të njëjtën kohë me 89 të bashkëpandehurit, të cilët u sollën në gjykatë me 14 furgonë, sipas gazetarëve të AFP.
Pavarësisht kufizimeve të hyrjes, shumë njerëz ishin mbledhur për të mbështetur Ekrem Imamoglu.
53-vjeçari Imamoglu, kundërshtari kryesor politik i presidentit turk Rexhep Tajip Erdogan, i cili u arrestua në orët e para të së mërkurës në shtëpinë e tij, tashmë ishte marrë në pyetje për pesë orë më herët sot nga policia me akuzën për "mbështetje të një organizate terroriste", ndërsa një ditë më parë ishte marrë në pyetje me dyshimin për "korrupsion".
“Ashtu si njerëzit dolën në rrugë për të mbështetur Erdoganin gjatë grushtit të shtetit të 15 korrikut (2016), ne po dalim në rrugë për të mbështetur Imamoglun”, tha 30-vjeçari Aykut Cenk për AFP.
“Ne nuk jemi armiq të shtetit, por kjo që po ndodh është e paligjshme”, shtoi ai duke ngritur flamurin turk.
Qeveria e Stambollit ndaloi demonstratat në qytet nga e mërkura deri të dielën, por për të katërtën natë radhazi, opozita u bëri thirrje qytetarëve që të mblidhen sonte pranë selisë së bashkisë së Stambollit.
Demonstratat janë paralajmëruar të zhvillohen në shumë qytete të tjera të vendit, si dhe në Izmir (perëndim) dhe kryeqytetin Ankara, ku autoritetet kanë ndaluar çdo tubim.
Në total, tubime janë zhvilluar në të paktën 55 nga 81 provincat e Turqisë që nga e mërkura, më shumë se dy të tretat e vendit, sipas një numërimi të AFP.
