Qyteti qendror i Ukrainës dhe vendlindja e Zelenskyt Kryvyi Rih u godit sot nga një sulm rus me raketa balistike – që shkaktoi vdekjen e të paktën 14 personave dhe plagosjen e më shumë se 50 të tjerëve, thanë zyrtarët ukrainas, ndërsa liderët e SHBA-së dhe Evropës i bënë presion Rusisë të pranonte armëpushimin në Ukrainë.
Në mesin e të vrarëve ishin gjashtë fëmijë. Sipas presidentit ukrainas, Volodymyr Zelensky shkaku i sulmeve të fundit është mungesa e gatishmërisë së Rusisë për t’i dhënë fund luftës.
“Çdo raketë, çdo sulm me dron dëshmon se Rusia dëshiron vetëm luftë”, tha ai.
Ai u bëri thirrje aleatëve të Ukrainës të rrisin presionin ndaj Moskës dhe të forcojnë mbrojtjen ajrore të Ukrainës.
“SHBA-ja, Evropa dhe pjesa tjetër e botës kanë fuqi të mjaftueshme për ta bërë Rusinë të braktisë terrorin dhe luftën”, tha Zelensky.
Sulmi raketor pasoi një sulm me dron dje në mbrëmje në Kharkiv, qyteti i dytë më i madh i Ukrainës, që vrau pesë civilë.
“Tani, mendoj se është e qartë se kush dëshiron paqen dhe kush dëshiron luftën”, tha ministri i Jashtëm ukrainas, Andrii Sybiha në takimin e NATO-s në Bruksel, duke iu referuar sulmit në Kharkiv.
Rusia ka refuzuar propozimin e SHBA-së për një ndalesë të plotë dhe të menjëhershme 30-ditore të luftimeve – ndërsa ministrat e Jashtëm britanikë dhe francezë akuzuan sot presidentin rus, Vladimir Putin se po zvarrit bisedimet e armëpushimit për të ndalur pushtimin e gjithanshëm të Rusisë në Ukrainë.
