Presidenti rus Vladimir Putin konfirmoi se vendi i tij ka marrë planin amerikan me 28 pika për paqen në Ukrainë, duke thënë se ai mund të shërbejë si bazë për një zgjidhje përfundimtare paqësore.
Megjithatë, ai tha se teksti ende nuk është diskutuar në detaje me palën ruse. Ai sqaroi se SHBA-të nuk po diskutojnë drejtpërdrejt planin e paqes me Rusinë, sepse Kievi është kundër kësaj perspektive.
Deklarata e presidentit rus mbi planin ishte si më poshtë: " Ne shohim se pas bisedimeve në Alaska, ka pasur një pauzë të caktuar nga ana e palës amerikane. Ne e dimë se kjo lidhet me refuzimin aktual nga Ukraina të draft-marrëveshjes së paqes të propozuar nga Presidenti Trump. Unë besoj se pikërisht për këtë arsye është shfaqur një version i ri, në thelb një plan i modernizuar i përbërë nga 28 pika. Ne e kemi këtë tekst. E morëm atë përmes kanaleve ekzistuese të komunikimit me qeverinë amerikane. Unë besoj se ai gjithashtu mund të shërbejë si bazë për marrëveshjen përfundimtare të paqes ".
Presidenti rus vuri në dukje se SHBA-të deri më tani nuk kanë arritur të sigurojnë pëlqimin e Ukrainës për planin e paqes. Rusia është e gatshme për bisedime paqeje, por është gjithashtu e kënaqur me dinamikën aktuale të operacionit ushtarak në Ukrainë, vuri në dukje ai.
Presidenti rus në deklaratat e tij të premten para Këshillit të Sigurisë Ruse tha gjithashtu se plani i paqes i Trump për Ukrainën u diskutua para takimit në Alaska më 15 gusht. Është një plan i "modernizuar" pas bisedimeve në Alaska, sqaroi ai.
Përveç kësaj, presidenti rus tha se SHBA-të i kërkuan palës ruse të tregonte fleksibilitet në zgjidhjen e çështjes së Ukrainës. Së fundmi, ai theksoi se të gjithë partnerët e Rusisë shprehën mbështetjen e tyre për marrëveshje të mundshme para samitit në Alaska./Versus.al
