Presidenti i Sirisë, Ahmad al Sharaa, pritet të udhëtojë për herë të parë në Uashington gjatë muajit nëntor, sipas të dërguarit të posaçëm amerikan për Lindjen e Mesme, Tom Barrack.
Në një konferencë të mbajtur në Bahrein, Barrack deklaroi se Uashingtoni shpreson që udhëheqësi sirian të bëhet pjesë e koalicionit ndërkombëtar kundër organizatës terroriste “Shteti Islamik” (ISIS).
“Po, presidenti Sharaa do të vizitojë Uashingtonin. Ne presim që kjo vizitë të shënojë një hap të ri në marrëdhëniet me Damaskun dhe në bashkëpunimin kundër terrorizmit”, tha Barrack për gazetarët.
Kjo do të jetë vizita e parë e presidentit sirian në kryeqytetin amerikan dhe vizita e dytë e tij në Shtetet e Bashkuara, pas pjesëmarrjes në Asamblenë e Përgjithshme të Kombeve të Bashkuara në Nju Jork, në shtator.
Ahmad al Sharaa, ish-udhëheqës i grupit “Hayat Tahrir al Sham”, i cili dikur ishte degë e Al Kaedës në Siri, u hoq nga lista e organizatave terroriste në korrik 2025, pasi Damasku ndërmori hapa për normalizimin e marrëdhënieve me perëndimin.
Ai mori pushtetin në dhjetor 2024 pas rrëzimit të regjimit të Bashar al-Asadit, dhe më pas u takua me Donald Trump në Riad në maj, ku presidenti amerikan premtoi të lehtësojë sanksionet ndaj Sirisë.
Aktualisht, Siria nuk është pjesë e koalicionit të udhëhequr nga SHBA për luftën kundër ISIS-it, i cili u krijua në vitin 2014. Organizata terroriste në kulmin e saj kontrollonte gati një të tretën e territorit të Sirisë dhe Irakut.
Sipas Reuters, vizita e al Sharas në Uashington shihet si shenjë e një ndryshimi të madh diplomatik në marrëdhëniet midis SHBA-së dhe Sirisë pas më shumë se një dekade izolimi./Versus.al
