Një krizë e re infrastrukturore në Spanjë po shkakton ndërprerje në të gjithë rrjetin e telefonisë celulare, vetëm pak javë pas ndërprerjes së zgjatur të energjisë elektrike që paralizoi vendin dhe Portugalinë.
Dështimi ndodhi për shkak të një përmirësimi të rrjetit të Telefónica-s dhe preku kryesisht telefoninë fikse, por edhe shërbimet zanore mobile, duke lënë jashtë funksionit shërbime kritike - siç është numri i emergjencës 112 - në rajone të tilla si Aragona, Extremadura, Vendi Bask dhe Valencia.
Siç deklaroi një zëdhënës i Telefónica-s: “Ne kryem përmirësime të rrjetit që prekën shërbime specifike për disa kompani. Po punojmë për restaurimin.” Disa zona raportuan rivendosje graduale të rrjetit gjatë mëngjesit.
Sipas faqes spanjolle të monitorimit Downdetector dhe gazetës El País, problemet filluan rreth orës 2 të mëngjesit. Nga raportet, 72% flisnin për një ndërprerje të plotë të shërbimeve, 18% për mungesë sinjali dhe 10% për një "pamundësi totale për të komunikuar".
Ministria e Transformimit Dixhital e Spanjës njoftoi se po "monitoron nga afër situatën dhe ka kërkuar të dhëna të sakta dhe një orar restaurimi nga Telefónica".
Incidenti i shtohet një serie keqfunksionimesh në infrastrukturën kritike të vendit. Kujtojmë se në fund të muajit të kaluar, një ndërprerje e paprecedentë e energjisë elektrike la miliona qytetarë në Spanjë dhe Portugali në errësirë për gati 23 orë, duke prekur semaforët, ndriçimin, sistemet e pagesave dhe ekranet e informacionit./Versus.al
