Takimi i parë mes Shteteve të Bashkuara dhe Iranit nën presidencën e Donald Trump u përfundua në Sulltanatin e Omanit, por nuk pati asnjë bisedë të drejtpërdrejtë mes ministrit të Jashtëm iranian dhe të dërguarit të posaçëm amerikan, Steve Witkoff.
Të dy palët u takuan në kuadër të bisedimeve të profilit të ulët, të cilat u karakterizuan nga ruajtja e distancës dhe mungesa e deklaratave publike.
Pavarësisht pritshmërive fillestare për diskutim të drejtpërdrejtë në nivel diplomatik, pala iraniane këmbënguli në qëndrimin e saj se nuk duhet të ketë dialog zyrtar midis dy përfaqësuesve të lartë të SHBA-së e Iranit. Sipas burimeve diplomatike, ministri i Jashtëm iranian u kufizua në një takim disaminutësh me Wittkoff-in teksa dilnin nga salla, pa bërë asnjë deklaratë apo pa lejuar pyetje nga media.
Teherani, megjithatë, konfirmoi përmes një zëdhënësi të Ministrisë së Jashtme se procesi i bisedimeve do të vazhdojë dhe se një kontakt i ri tashmë është rënë dakord brenda një jave, pa zbuluar detaje rreth vendndodhjes ose nivelit të përfaqësimit.
Takimi në Oman është pjesë e përpjekjeve për uljen e tensioneve mes dy vendeve, duke u fokusuar në çështjet e programit bërthamor të Iranit, sigurinë rajonale dhe embargon e armëve. Presidenti Trump ka thënë vazhdimisht se ai po kërkon një "marrëveshje më të gjerë" me Teheranin, të cilën ai e ka përshkruar si një "hap të domosdoshëm për paqen në Lindjen e Mesme".
Nga ana e Uashingtonit, Steve Witkoff ka marrë një rol kyç në rivendosjen e kanaleve të komunikimit me Republikën Islamike, megjithëse deri më tani përparimi mbetet i kufizuar. Zgjedhja e Omanit, një shtet me një traditë të gjatë ndërmjetësimi në rajon, u konsiderua e përshtatshme për të shmangur fërkimet e mëtejshme diplomatike.
