Shkencëtarët kanë gjetur prova të reja, por të përkohshme, se një botë e largët që rrotullohet rreth një ylli tjetër mund të jetë shtëpia e jetës.
Një ekip nga Kembrixhi që studion atmosferën e një planeti të quajtur K2-18b ka zbuluar shenja të molekulave të cilat në Tokë prodhohen vetëm nga organizma të thjeshtë.
Kjo është hera e dytë, dhe më premtuese, që kimikate të lidhura me jetën janë zbuluar në atmosferën e planetit nga Teleskopi Hapësinor James Webb (JWST) i NASA-s.
Por ekipi dhe astronomët e pavarur theksojnë se nevojiten më shumë të dhëna për të konfirmuar këto rezultate.
Hulumtuesi kryesor, Prof. Nikku Madhusudhan, më tha në laboratorin e tij në Institutin e Astronomisë të Universitetit të Kembrixhit se shpreson të marrë provat bindëse së shpejti.
"Kjo është prova më e fortë deri më tani se ka mundësi të ketë jetë atje jashtë. Mund të them realisht se mund ta konfirmojmë këtë sinjal brenda një deri në dy vjetësh."
K2-18b është dy herë e gjysmë më i madh se Toka dhe është shtatëqind trilionë milje larg nesh.
JWST është aq i fuqishëm sa mund të analizojë përbërjen kimike të atmosferës së planetit nga drita që kalon nga Dielli i vogël i kuq rreth të cilit rrotullohet.
Grupi i Kembrixhit ka zbuluar se atmosfera duket se përmban nënshkrimin kimik të të paktën njërës prej dy molekulave që shoqërohen me jetën: sulfidi dimetil (DMS) dhe disulfidi dimetil (DMDS). Në Tokë, këto gazra prodhohen nga fitoplanktoni detar dhe bakteret.
Prof. Madhusudhan tha se ishte i befasuar nga sa gaz u zbulua me sa duket gjatë një dritareje të vetme vëzhgimi.
"Sasia që ne vlerësojmë të këtij gazi në atmosferë është mijëra herë më e lartë se ajo që kemi në Tokë," tha ai.
"Pra, nëse lidhja me jetën është e vërtetë, atëherë ky planet do të jetë plot jetë".
Prof Madhusudhan shkoi më tej: "Nëse konfirmojmë se ka jetë në k2-18b, kjo në thelb duhet të konfirmojë se jeta është shumë e zakonshme në galaktikë". Versus.al
