Spanjë- Agjentët e Punëve të Brendshme të Policisë Kombëtare kanë arrestuar kreun e Seksionit Krimeve Ekonomike dhe policisë së shtabit të Madridit, Óscar Sánchez Gil dhe gruan e tij për lidhjen e tyre të dyshuar me një organizatë të fuqishme të trafikut të drogës, të çmontuar së fundmi nga agjentët. Komandanti i policisë, Óscar Sánchez Gil, fshehu 20 milionë euro pas një muri në shtëpinë e tij në Alcalá de Henares në Madrid dhe një milion euro të tjera në zyrën e tij të policisë. Gjatë ndërhyrjes u arrestua edhe partnerja e tij e cila ndodhet në stacionin e policisë kombëtare Alcalá de Henares. Të dy tashmë janë futur në burg pasi janë vënë në dispozicion të gjykatës qendrore të Gjykatës Kombëtare.
Dyshohet se çifti ka lidhje me trafikantët e drogës të arrestuar nga Algeciras, Alicante dhe Madrid tre ditë më parë ku u zbuluan magazinat më të mëdha të kokainës në Spanjë. Sipas mediave spanjolle, shefi i policisë kishte arritur të fshihte rreth 20 milionë euro nga bashkëpunimi me narkotrafikantët. Mdje shtëpia e tij cilësohet nga mediat e huaja si të ishte e Pablo Escobar, një prej narkotrafikantëve më të mëdhenj të historisë.
Në zyrën e tij janë gjetur të fshehura edhe 1 milionë euro të tjera të prera në kartëmonedha 50 euro. Ndaj tij rëndojnë akuzat për pastrim parash, korrupsion dhe shpërdorim detyre. Sanchez Gil aktualisht mbante postin e shefit të seksionit të krimeve Ekonomike në policinë kombëtare. Arrestimi I tij ka sjellë shumë habi tek kolegët të cilët e cilësonin si një ndër personat më të ndershëm pavarësisht se fliste pak. Ai kishte një karrierë të shkëlqyer në polici.
Hetimi nisi disa muaj më parë pas dyshimeve se shefi i policisë mund të kishte lidhje me grupe të trafikut të drogës. Punët e Brendshme më pas morën përgjegjësinë për hetimet. Filluan përgjimet dhe ndjekjet telefonike, duke konfirmuar provat kundër tij. Versus.al
