Presidenti amerikan Donald Trump ka shkarkuar Prokuroren e Përgjithshme Pam Bondi, sipas një burimi të cituar nga CNN.
Sipas raportimeve, në vend të saj përkohësisht është emëruar zëvendësi i saj Todd Blanche, i cili do të shërbejë si ushtrues detyre i Prokurorit të Përgjithshëm.
Në një postim në platformën Truth Social, Trump deklaroi se Bondi do të kalojë në një “pozicion të ri në sektorin privat”, duke e vlerësuar për punën e saj në administratë dhe duke theksuar se gjatë mandatit të saj janë ulur ndjeshëm krimet në SHBA.
Megjithatë, burime të afërta me Shtëpinë e Bardhë bëjnë të ditur se vendimi vjen pas pakënaqësive të Trump me disa çështje, përfshirë hetime të ndjeshme dhe mënyrën e trajtimit të dosjeve të ndryshme federale.
Sipas CNN, Trump kishte diskutuar prej ditësh mundësinë e largimit të saj dhe kishte zhvilluar edhe një bisedë të drejtpërdrejtë me Bondi, ku i kishte bërë të qartë se nuk do të qëndronte gjatë në detyrë.
Në diskutim për pasuesen e saj përmendet edhe emri i drejtuesit të Agjencisë për Mbrojtjen e Mjedisit, Lee Zeldin, ndërsa për momentin nuk është marrë një vendim përfundimtar.
Largimi i Bondi vjen në një periudhë ndryshimesh të shpeshta në kabinetin e Trump, pas lëvizjeve të mëparshme në poste të tjera të rëndësishme të administratës amerikane./Përshtati në shqip Versus.al
