Meksika ka shmangur përkohësisht vendosjen e tarifave të reja nga Shtetet e Bashkuara, të cilat pritej të hynin në fuqi mesnatën e së enjtes. Presidenti amerikan Donald Trump njoftoi se ka arritur një marrëveshje të përkohshme me presidenten meksikane Claudia Sheinbaum, duke shtyrë afatin për 90 ditë, deri në fund të tetorit.
Në një postim në rrjetin e tij Truth Social, Trump deklaroi se nuk do të jetë e lehtë të arrihet një marrëveshje përfundimtare, duke përmendur vështirësitë që paraqesin çështjet kufitare në krahasim me marrëdhëniet tregtare me vende të tjera.
“Kemi shumë sfida me Meksikën, sidomos për shkak të kufirit dhe krizës së fentanilit. Por jemi të përkushtuar për të gjetur një zgjidhje afatgjatë,” shkroi Trump.
Shtyrje 90-ditore e tarifave të reja që pritej të hynin në fuqi më 1 janar 2026.
Tarifat ekzistuese mbeten në fuqi:
25% për produktet që lidhen me fentanilin,
25% për automjetet,
50% për çelikun, aluminin dhe bakrin.
Heqje e barrierave jotarifore nga ana e Meksikës, që kishin kufizuar tregtinë me SHBA.
Sipas Trump, këto barriera përbënin një pengesë serioze për eksportet amerikane dhe ishin në kundërshtim me frymën e marrëveshjeve tregtare të mëparshme.
Zhvillimi vjen në një kohë kur marrëdhëniet mes dy vendeve janë përkeqësuar për shkak të krizës në kufirin jugor të SHBA-së dhe përpjekjeve për të ndalur trafikun e drogës, sidomos fentanilin, që vazhdon të shkaktojë mijëra viktima çdo vit në Shtetet e Bashkuara.
Negociatat për një marrëveshje të përhershme pritet të rifillojnë në fillim të shtatorit, ndërsa mbetet për t’u parë nëse palët do të arrijnë konsensus përpara afatit të ri në fund të tetorit. /Versus.al
