Ushtria izraelite ka ndaluar disa anije nga flotilja e anijeve që transportonin ndihma humanitare në Rripin e rrethuar të Gazës, duke ndaluar shumë nga aktivistët në bord. Atyre u ishte bërë thirrje që të ndryshonin kursin pasi kishin hyrë në një zonë luftimi.
Të paktën 19 anije nga Flotilja Globale Sumud, e përbërë nga 44 anije dhe rreth 500 aktivistë, u ndaluan afërsisht 70 milje detare (130 km) nga bregu i Gazës, sipas organizatorëve.
Ministria e Punëve të Jashtme e Izraelit tha në një postim në X të mërkurën se "disa anije" të flotiljes u "ndalën në mënyrë të sigurt dhe pasagjerët e tyre po transferohen në një port izraelit".
Po ashtu u bë me dije se aktivistja suedeze Greta Thunberg, e cila kishte qenë në bordin e anijes kryesore Alma, "dhe miqtë e saj janë të sigurt dhe të shëndetshëm". Ministria gjithashtu shpërndau një video që e tregon momentin kur ndalohet Thunberg. Disa prej anijeve të ndaluara kanë emrat: Deir Yassin/Mali, Huga, Spectre, Adara, Alma dhe Sirius.
Mësohet se 23 anije të tjera po lundrojnë ende në drejtim të Gazës, ndërsa 2 të tjera kanë ndryshuar kurs.
Përpara se të ndaloheshin, anijet kishin arritur të lundronin përtej pikës ku Flotilja Madleen u kap nga forcat izraelite në fillim të këtij viti.
Përpara se të fillonin ndërhyrjet, aktivistët paralajmëruan se ushtria izraelite kishte ndërprerë lidhjen e tyre duke çaktivizuar pajisjet e tyre, gjë që ndikoi në kamerat e tyre, transmetimet e tyre të drejtpërdrejta dhe sistemet e komunikimit që lejonin anijet të transmetonin mesazhe në botë. Versus.al
