Qytetarët të cilët kanë më shumë se një banesë në pronësi, do të paguajnë nga 2 deri në 4-fish më shumë taksën e pronës duke nisur nga viti 2026.
Kështu u shpreh Reinaldo Pipiria për A2CNN duke bërë me dije se taksa e cila vilet aktualisht nga fatura e ujit në vlerën 0.05%, pas dy vitesh do paguhet deri në 2% mbi vlerën e pronës.
“E para për qytetin e Tiranës tashmë qytetarët paguajnë një taksë më të lartë për shkak të rishikimit të çmimit të referencës nga 30-75%. Tashmë paguhet në Tiranë ndërsa jashtë saj do rishikohen çmimet e referencës do të implementohet projektligji i ri. Sot aktualisht e kemi 0.05% mbi vlerën e pronës do kaloj deri në 2% mbi vlerën e pronës”, tha Reinaldo Pipiria nga "NAREA".
Por sa do do duhet të paguajë konkretisht një person për banesën e tij me rritjen e kësaj takse?
“Taksa për një pronë 130 mijë euro me një taksë 0.05% do të ishte 65 euro, në një moment kur të hyjë në fuqi ligji duhet të shkojë deri në 260 euro. Sidomos për shtëpinë e dytë dhe të tretë ndërsa për shtëpinë e parë këshilli bashkiak ka disa skema ku mund të uli pjesën e taksimit”, sqaroi Pipiria sa i takon bashkisë së Tiranës.
Me tatimin aktual deri në gusht buxheti i shtetit ka përfituar nga taksa e pasurisë rreth 55 milionë euro. Ndërsa ky taksim është propozuar edhe për rivlerësimin e pronave, proces i cili ka ngecur edhe pse tashmë duhej të kishte filluar me zbatimin.
“Procesi i rivlerësimit ka ngecur në Ministrinë e Financave. Ka një përqasje nga ky institucion, i cili thotë se duhet të rishikojë të gjitha çmimet e referencës sidomos në 14 bashki. Është totalisht një paqartësi tregu ka reaguar shumë keq, oferta është ngurtësuar dhe po humb shtresa e mesme pasi nuk kryen dot transaksione.”- shtoi eksperti.
Procesi i fundit i rivlerësimit të pasurive nisi në vitin 2020 dhe mbaroi në gusht të 2022, dhe nga i cili u rivlerësuan 168.200 pasuri që i sollën buxhetit të shtetit dhe buxheti i 12.7 miliardë lekë të ardhura. Versus.al
