Deri në fillimin e vitit 2024 po punohej me ritme të shtuara për ndërtimin e hekurudhës Tiranë-Durrës që pritej të përfundonte në muajin mars të këtij viti. Por që prej shkurtit, punimet kanë ndaluar në mënyrë të papritur dhe në zona të caktuara ku kalon treni, as nuk është denjuar të rregullohet sipërfaqja e rrugës në mënyrë që të mos krijohen probleme në qarkullimin e automjeteve.
Një prej këtyre rasteve, është pjesa e hekurudhës që kalon në rrugën e vjetër që lidh Durrësin me Shijakun dhe zonat e tjera më të mëdha periferike si Rrashbulli apo ish-Stacioni Zoot Xhafzotaj. Në vendin ku kalon hekurudha, rruga është lënë në mëshirë të fatit duke bërë që shumë prej automjeteve që e përdorin, të kenë probleme për shkak të gropave të shumta të shkaktuara gjatë punimeve që tashmë kanë ndalur prej muajsh.
Pasi morën veglat e punës, firma që po merrej me punimet e hekurudhës nuk mori mundimin të rregullonte një pjesë të zonës ku kalojnë këto automjete, duke shkaktuar kështu probleme për disa prej tyre dhe trafik të ngarkuar në orë të caktuara të ditës duke nisur kryesisht pas orës 12:00 të mesditës.
Drejtues të automjeteve që përdorin këtë rrugë, u shprehën jashtë kamerave për Versus.al se u ishin shkaktuar probleme në automjete për shkak të gropave të lëna të hapura në zonën ku kalon hekurudha Tiranë-Durrës. Siç duket edhe në pamjet që Versus.al ka siguruar, në shumë raste shoferëve u duhet të qëndrojnë në trafik për minuta të tëra për shkak të vështirësisë së makinave për të kaluar në atë aks rrugor duke qarkulluar normalisht.
Pavarësisht se kostot e ndërtimit të hekurudhës u rritën deri në 129 milionë euro në total, nga të cilat 72 mln euro janë kredi e dhënë nga BERZH (Banka Evropiane për Zhvillim), kjo nuk ka rezultuar të jetë në favor të banorëve të cilët çdo ditë kalojnë me mjete në rrugën që lidh Durrësin me Shijakun dhe u duhet që shpesh herë të presin në trafik për orë të tëra vetëm prej papërgjegjshmërisë në punimet e kryera.
Hekurudha Tiranë-Durrës pritet të ketë 11 stacione që do të nisin nga Durrësi dhe do të vijojnë më pas në zonat e Shkozetit, Sukthit, Vorës dhe Kasharit. Koha e udhëtimit llogaritet të jetë deri në 22 minuta për linjën Tiranë-Durrës dhe vetëm 12 minuta për linjën Tiranë-Rinas, duke shkruar kështu në mënyrë të ndjeshme kohën që u duhet udhëtarëve për të mbërritur në destinacionet e tyre.
Kompania që po zbaton këtë projekt është INC spa, e cila u shpall fituese në vitin 2020, me një ofertë 69.7 milionë euro. Linja e re e konstruktuar e Tiranë-Durrës do të kalojë mbi linjën e vjetër, ndërkohë që shtesë do të jetë pjesa e Tiranë-Rinas, linjë hekurudhore totalisht e re. Në fillim parashikohej që projekti të përfundonte në terminalin e transportit publik në Tiranë por për shkak të humbjes së pasagjerëve me largimin e stacionit të trenit, u vendos që terminali i pasagjerëve të jetë afër ish-stacionit të vjetër të trenit, vetëm 200 metra larg parkimit aktual.
Ndërkohë që puna për zbatimin e kontratës për punimet, ka nisur që prej 3 vitesh, aktualisht janë kryer vetëm 60% të punimeve, ndërkohë që pritej që projekti të përfundonte brenda muajit mars të këtij viti por edhe kjo e shtyu afatin sërish për në mars të 2025-ës. Versus.al
