Petrit Malaj ka mbajtur ditën e sotme konferencën e parë për shtyp si ministër i Financave ku prezantoi sfidat dhe prioritetet e tij në krye të këtij posti.
Ministri i Financave deklaroi se pritet një ulje e borxhit publik deri në fund të këtij viti me 0.7% krahasuar me vitin që lamë pas, duke e çuar kështu në nivelin e 58.2%.
Si një sfidë të tij, dhe jo vetëm, por për të gjithë qeverinë përmendi edhe adresimin e çështjeve të pensionit. Sipas tij problem aktual është skema e pensioneve që duhet të rishikohet.
“Një nga çështjet me të cilën po punojmë me ministrinë e Ekonomisë e brenda muajit tetor do të kemi definuar diçka jo vetëm për pensionet, por të gjithë skemës që nuk është në të mirën e saj.
Sfidë personale do të jetë adresimi i çështjeve të pensioneve, një çështje që na përket të gjithëve, pa ngjyrim majtas apo djathtas. Po punojmë edhe me Ministrinë e Ekonomisë, Kulturës dhe Inovacionit për të gjithë skemën e pensioneve, e cila nuk është në ditët më të mira të saj. Na duhet një skemë vizibile që siguron pesione më të larta për njerëzit. Problem është skema aktuale e pensioneve që do të duhet ta rishikojmë. Kemi ngritur grupet e punës dhe po punojmë me ekspertë të Bankës Botërore”, tha ai.
Duke folur për ekonominë Malaj tha se janë mbi 7 mijë biznese më shumë se vjet. 13 mijë vende të reja pune me shumë se në 7 muajt e vitit të kaluar dhe rreth 8900 persona më shumë në skemën e sigurimeve shoqërore dhe shëndetësore.
Ndërsa për sa i përket kursit të këmbimit ai u shpreh se ka ndikuar negativisht në financa, por pozitivisht në borxhin e jashtëm.
Kursi i këmbimit ka penalizuar financat tona, sidomos nga dogana, por ka favorizuar në borxhin e nivelit të jashtëm” tha Malaj./ Versus.al
