Një zjarr i fuqishëm ka përfshirë sot pasdite zonën kodrinore të qytetit Izmir, në Turqinë perëndimore, duke detyruar autoritetet të ndërmarrin masa urgjente sigurie.
Pesë lagje janë evakuuar për shkak të përhapjes së shpejtë të flakëve, të nxitura nga temperaturat e larta dhe era e fortë. Sipas raportimeve nga mediat turke, dhjetëra banesa janë rrezikuar, ndërsa shumë banorë janë larguar me ndihmën e forcave të emergjencës.
Autoritetet kanë angazhuar helikopterë dhe avionë zjarrfikës, së bashku me dhjetëra njësi tokësore, për të vënë flakët nën kontroll. Ndërhyrja është e vështirësuar nga terreni dhe nga moti ekstrem.
Zyrtarët turq kanë bërë thirrje për qetësi dhe bashkëpunim me ekipet e emergjencës, ndërsa hetimet për shkaqet e zjarrit janë në zhvillim e sipër. Deri më tani, nuk raportohet për viktima, por dëmet materiale pritet të jenë të konsiderueshme. /Versus.al
