Hamasi njoftoi të martën se ka zgjedhur Yahya Sinwar si udhëheqësin e ri, sipas Associated Press (AP).
Sinwar është vlerësuar gjerësisht si truri i sulmit të 7 tetorit 2023 nga Hamasi ndaj Izraelit që ndezi luftën në Gaza.
Vendimi vjen pas vrasjes së liderit të mëparshëm të lartë politik të Hamasit, Ismail Haniyeh, i cili u vra në Teheran javën e kaluar. Hamasi ka fajësuar Izraelin për vdekjen e Haniyeh, por Izraeli nuk e ka marrë publikisht përgjegjësinë për vrasjen.
Më parë, Sinwar shërbeu si udhëheqës i Hamasit në Rripin e Gazës që nga viti 2017. Sinwar gjithashtu zgjodhi të qëndronte në Gaza pasi Haniyeh jetoi në mërgim në Katar për vite, sipas AP. Ai ka qenë i fshehur thellë që nga sulmet e 7 tetorit, të cilat shkaktuan fushatën e bombardimeve dhe ofensivave të Izraelit që synonin të shkatërronin Hamasin.
Gjatë sulmit në Izrael, 1200 njerëz u vranë dhe 250 të tjerë u morën peng. Izraeli më pas u përgjigj duke nisur një ofensivë në Gaza. Numri i të vdekurve në mesin e palestinezëve deri tani është afër 40.000, ndërkohë që shumica e popullsisë prej 2.3 milionë është dëbuar nga shtëpitë e tyre dhe pjesë të mëdha të qyteteve të Gazës janë shkatërruar. Në maj, prokurorët në Gjykatën Penale Ndërkombëtare kërkuan një urdhër arresti kundër Sinëar me akuza për krime lufte për sulmin e 7 tetorit, si dhe kundër kryeministrit izraelit Benjamin Netanyahu dhe ministrit të mbrojtjes të Izraelit për krime lufte.
