Një rast i rëndë mashtrimi është regjistruar në Britaninë e Madhe, ku një grua e ve ka humbur të gjitha kursimet e jetës dhe madje edhe shtëpinë, pasi u bind se kishte hyrë në një lidhje romantike me aktorin e njohur të Hollywood-it, Jason Momoa.
Mashtrimi, që u krye përmes videove të krijuara me inteligjencë artificiale, i kushtoi viktimës plot 570 mijë euro, raporton LADbible.
Gruaja, e cila nuk është identifikuar për arsye privatësie, filloi të ndiqte një faqe fansash të Jason Momoa-s pas humbjes së bashkëshortit të saj, me të cilin kishte kaluar 50 vite martesë. Pak kohë më vonë, ajo mori një mesazh që besoi se vinte nga vetë aktori.
Mashtruesit, të maskuar pas videove të krijuara me AI, e bindën të besonte se ajo dhe aktori 46-vjeçar, i cili u divorcua nga Lisa Bonet në vitin 2024, kishin një lidhje të veçantë dhe se ishin “të destinuar” për njëri-tjetrin. Pasi fituan besimin e saj, ata nisën kërkesat për para.
“Jason Momoa” i rremë pretendoi se kishte nevojë urgjente për fonde për projekte filmike dhe madje e bindi viktimën se po ndërtonte shtëpinë e tyre të ëndrrave në Havai. E ndikuar nga iluzioni i “dashurisë”, e veja shiti shtëpinë e saj në Cambridgeshire për të siguruar shumën e kërkuar.
Sapo paratë u dërguan, mashtruesi u zhduk pa lënë gjurmë. Policia e Cambridgeshire konfirmoi rastin, duke theksuar se: “Historia mund të tingëllojë e pabesueshme, por është krejtësisht e vërtetë dhe ka lënë një grua të pambrojtur pa shtëpi.”
Ky nuk është rasti i vetëm i këtij lloji. Edhe më herët, një gjyshe nga Newcastle kishte rënë pre e një mashtrimi të ngjashëm, duke humbur 92.800 euro. Ajo rrëfeu se fillimisht kishte dërguar para për bileta avioni për “aktorin”, por kërkesat vijuan me justifikime të tjera, përfshirë dhurata për të bijën e tij.
“Kam folur me dikë që besoja se ishte vajza e tij 15-vjeçare. Më thanë se po luftonte me ish-bashkëshorten dhe se duhej një certifikatë martese për të ruajtur shtëpinë. Kam qenë naive… dhe pagova,” ka treguar viktima tjetër.
Autoritetet britanike u bëjnë thirrje qytetarëve të jenë tepër të kujdesshëm ndaj komunikimeve online, sidomos kur kërkohen para nga persona që pretendojnë të jenë figura publike.
