Kryeministri Edi Rama në rubrikën e tij në rrjetet sociale “Sy më Sy” i është përgjigjur një komenti që e akuzon lidhur me mosdhënien e drejtësisë për 4 protestuesit e vrarë më 21 janar 2011.

Rama shprehet se të bërit drejtësi nuk është në duart e tij apo qeverisë, por në duart e SPAK duke nënvizuar se për këtë arsye u bë Reforma në Drejtësi, për të pasur balancë pushtetesh. Mes të tjerash ai theksoi se çdo vit që kalon pa u ndëshkuar përgjegjësit, vetëm sa njollos reformën në drejtësi. 

Pjesë nga përgjigjia e Ramës:

Të të akuzojë si i lidhur me drejtësinë për 21 janarin dikush që emrin në profil e ka “primaret në PD” kjo është për të qarë dhe për të qeshur. Por nuk është qëllimi im të bëj polemika këtu.

Edhe një sërë komentuesish të tjerë harrojnë se jetojmë në një sistem ku drejtësinë nuk e bën as kryeministri, as qeveria dhe as partia në pushtet. Kritikat drejtuar meje apo nesh për mosdhënie drejtësie për 21 janarin, janë në adresë të gabuar.

Nuk kemi qëndruar duarkryq por kemi bërë një betejë epokale për pavarësinë e drejtësisë nga pushteti politik që të bëhet drejtësi për të gjithë. Pa mua dhe PS nuk do kishte as Reformë në Drejtësi dhe as SPAK. Pavarësisht se mund të ketë ndonjë gjë të kritikueshme, kjo është një rrugë e re. Pjesë e mbështetjes tonë ndaj drejtësisë është qëndrimi për të mos bërë komente mbi çështje konkrete. Çfarë mund të them unë sot për drejtësinë për 21 janarin? Kam aq shumë gjëra për t’ua thënë sa nuk ua them dot. Por i rri besnik qëndrimit për të mos bërë komente, duke dashur të besoj se SPAK-u nuk do jetë i zënë për shumë kohë me çdo gjë përveçse me 21 janarin.

Çdo vit që kalon jo vetëm shton barrën e turpit mbi këdo që duhet të japë drejtësinë e munguar, por njollos vetë Reformën në Drejtësi, duke poshtëruar një popull të tërë që do drejtësi për 21 janarin. Versus.al

Ashtu si në përvjetoret e tjera edhe në këtë sot kur shënohet 14 vite nga vrasja e 4 protestuesve më 21 janar 2011, zyrtarë të PS dhe familjarë të viktimave kanë vendosur karafila të kuq në vendin ku ndodhën vrasjet në bulevardin “Dëshmorët e Kombit”.

Të pranishëm në ceremoninë e vendosjes së luleve, ishin kryeparlamentarja Elisa Spiropali, zv.kryeministrja Belinda Balluku, ministrat Ulsi Manja dhe Taulant Balla si dhe deputetë të PS.

Ndryshe nga vitet e mëparshme, kryeministri Edi Rama nuk ishte i pranishëm për shkak se ndodhet në forumin ekonomik të Davosit në Zvicër, por më herët reagoi nëpërmjet një postimi në rrjetin social ‘facebook’. Versus.al

Pas kryeministrit Edi Rama, edhe kryebashkiaku i Tiranës Erion Veliaj ka reaguar lidhur me 14 vjetorin e ngjarjes së ndodhur më 21 janar 2011 ku u vranë 4 protestues.

Duke e konsideruar si një “plagë të hapur”, Veliaj e cilëson 21 janarin si një thirrje për drejtësi.

“TË PAHARRUAR! 21 Janari është një plagë në historinë tonë, por edhe një thirrje për drejtësi e llogaridhënie. Sot kujtojmë ata që humbën jetën duke kërkuar një Shqipëri më të drejtë e më demokratike”- shkruan Veliaj në rrjetet sociale. Versus.al

Kryeministri Edi Rama ka reaguar në rrjetin social facebook në kuadër të 14 vjetorit të 21 janarit, protestës ku 14 vite më parë u vranë 4 persona. Rama ka pasur një kritikë sa i takon hetimeve të cilat sipas tij po zgjasin aq shumë sa edhe fëmijët e të vrarëve, po bëhen prindër.

“Drejtësia vonon po nuk harron”, thotë populli dhe sot kush po e vonon drejtësinë për 21 janarin, nuk duhet të harrojë se fëmijët e dëshmorëve po bëhen prindër duke pritur drejtësinë…”- shkruan kryeministri.

Në korrik të vitit të kaluar, SPAK regjistroi procedimin penal për 21 janarin pasi edhe Gjykata e Lartë i kërkoi institucionit që të zbardhte rolin e Sali Berishës dhe Lulzim Bashës sa i takon urdhrave të dhëna për të hapur zjarr kundrejt protestuesve.

Mes personave të marrë në pyetje për rihapjen e hetimeve janë ish-drejtori i Përgjithshëm i policisë së shtetit Hysni Burgaj, zëvendësi i tij Agron Kuliçaj, deputeti i PS Xhemal Qefalia, si edhe ish-ministri Saimir Tahiri.

Ish-drejtori i policisë tha se në atë ditë, forcat e policisë janë përballur me një dhunë të pashembullt nga ana e protestuesve.

Procedimi penal është regjistruar për vrasjen e Aleks Nikës dhe plagosjen e disa protestuesve të tjerë dhe hetimet po kryhen për 3 vepra penale “Vrasja në rrethana të tjera cilësuese”, e kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave, “Shpërdorim i detyrës”, e kryer në bashkëpunim dhe “Kryerja e veprimeve që pengojnë zbulimin e së vërtetës”, e kryer në bashkëpunim. Versus.al

Sot bëhen 14 vite nga protesta e 21 janarit të vitit 2011 kur mbetën të vrarë 4 protestues të opozitës socialiste asokohe të cilët kërkonin rrëzimin e qeverisë së Sali Berishës.

Hetimet për ngjarjen e rëndë u rihapën me përgjigjen e dhënë nga Gjykata e Strasburgut e cila e konsideroi si “krim shtetëror”. SPAK regjistroi procedim penal më datë 15 korrik edhe pas vendimit të dhënë nga gjykata e Lartë.

Që prej rihapjes së hetimeve, janë thirrur në SPAK disa ish-zyrtarë të lartë të qeverisë Berisha dhe disa deputetë socialistë që kanë qenë në protestën e mbajtur asokohe duke dhënë informacione si dëshmitarë.

Pritet që të zbardhet roli i ish-kryeministrit Sali Berisha, ish-ministrit të Brendshëm Lulzim Basha i cili ende nuk është thirrur në SPAK për ngjarjen, ish-kreut të Gardës Ndrea Prendit dhe gardistëve të tjerë.

Në 21 janar 2011 mbetën të vrarë protestuesit Ziver Veizi, Aleks Nika, Hekuran Deda dhe Faik Myrtaj, ndërsa prokuroria e Tiranës çoi të pandehur vetëm ish-komandantin e gardës Nrea Prendi dhe përgjegjësin e njësisë speciale Agim Llupo të cilët në 2013-ën u dënuan nga gjykata për vrasje nga pakujdesia, Prendi me 1 vit burg, Llupo me 3 vite.

Deri më tani si provës shtesë në SPAK është dorëzuar edhe një regjistrim ku pretendohet se dëgjohet momenti kur Ndrea Prendi, komandanti i Gardës u jep urdhër gardistëve të hapin zjarr ndaj protestuesve nëse afrohen tek dera e kryeministrisë duke u qartësuar se urdhri kishte ardhur nga lart. Versus.al