Xhaxhai i të vrarërit Aleks Nika në ngjarjen e 21 janari,Mark Nika ka folur pas daljes së tij nga SPAK.

Ai është shprehur se ka besim që Prokuroria e Posaçme, (SPAK) do ta çojë deri në fund hetimin e ngjarjes.

Mark Nika: Pamë se SPAK rinisi hetimet dhe premtimi është që do respektohen procedurat.

Ne kemi dhënë fakte të tjera më parë në Prokurorinë e Tiranës.

Unë them se siç ka nisur hetimit, çështjen do ta çojë deri në fund. Nuk ka ndikime politike dhe do ta zbardhë çështjen deri në fund.

U thirra për kasetën. Kasetën e ka gazetari Artan Hoxha dhe është i gatshëm ta dorëzojë.

Pamjet do të grupohen dhe do t’i jepen SPAK-ut.

Sot trajtuam edhe anën teorike sepse ka probleme në procedurën penale, lidhur me parashkrimet. 

Të hetohet zinxhiri komandues siç ka vendosur Strasburgu, pa Strasburgun dhe Gjykatën e Lartë nuk do kishte drejtësi.

Si mundet të vrasin njerëz në Bulevard se kanë ardhur në protestë?

Komanda, me kryeministrin e kohës dhe ministrin e Brendshëm të kohës. Duan që “21 Janarin” ta heqin nga kalendari, ne luftojmë vetëm për të vërtetën.

Iu luta që të respektohen të gjitha procedurat, sepse çështja është shumë e thjeshtë për ta hetuar. Del zëri në kasetë. Hetimi duhet të shkojë dhe kush i fshiu provat. Do thërriten dhe familjarë të tjerë, kanë bërë një plan hetimi që buron nga Strasburgu.

Nëse nuk dënohet zinxhiri komandues, nuk quhet dosje e zbardhur. Përgjegjësia duhet kërkuar te kryeministri i kohës, ministri i brendshëm dhe komandanti i kohës. Kanë deformuar edhe plumbin e Aleksit në kokë. Të gjithë do përgjigjen për vrasjen në bashkëpunim. Kush ka gjuajtur do përgjigjet.

Rajmonda Nika

Rajmonda Nika, bashkëshortja e Aleks Nikës një prej 4 të vrarëve para kryeministrisë më 21 janar 2011 ka përfunduar dëshminë e saj në GJKKO ka ku ka deklaruar se ka dorëzuar disa fakte të reja lidhur me ngjarjen të cilën gjykata e Strasburgut e ka cilësuar si “krim shtetëror”.

“Dhashë dëshminë time për 21 janarin, dorëzuam disa fakte të reja që nuk mund t’i bëj publike. Audio përgjimin do e dorëzojmë një herë tjetër”- u shpreh Rajmonda Nika ndër të tjera.

Për hetimet që SPAK nisi ditë më parë, dëshmon edhe xhaxhai i Aleks Nikës, Mark Nika i cili po merret në pyetje si person në dijeni që prej orës 13:00, me të përfunduar dëshmia e Rajmonda Nikës. Versus.al

Tiranë- Familjarët e Aleks Nikës, njërit prej 4 të vrarëve në protestën përballë kryeministrisë më 21 janar 2011, janë paraqitur sot në SPAK ku do të merren në pyetje lidhur me kallëzimin e bërë prej tyre për zbardhjen e kësaj çështje.

Në ambientet e Prokurorisë së Posaçme, gruaja dhe xhaxhai i Aleks Nikës pritet të dorëzojnë një audioregjistrim që dyshohet se ka prova të reja lidhur me rolin e ish-kryeministrit Sali Berisha në ngjarje dhe  ku gjithashtu komandanti i gardës Ndrea Prendi dyshohet se jep urdhrin për të hapur zjarr ndaj protestuesve . Fillimisht do të merret në pyetje në cilësinë e kallëzuesit Rajmonda Nika në orën 10:00 më pas xhaxhai, Mark Nika.

Më 16 korrik, SPAK njoftoi nisjen e hetimeve për masakrën e 21 janarit, ku mbetën të vrarë 4 protestues përballë kryeministrisë së vendit. 

Në njoftimin e dhënë për mediat SPAK-u bën me dije se ka nisur hetimet pas vendimit urdhërues të Gjykatës së Lartë si dhe vendimit të Strasburgut. Procesimi ka nisur për 3 vepra penale si "Vrasja në rrethana të tjera cilësuese”, e kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave, “Shpërdorim i detyrës”, e kryer në bashkëpunim dhe “Kryerja e veprimeve që pengojnë zbulimin e së vërtetës”, e kryer në bashkëpunim.

Menjëherë pas vendimit të SPAK për të nisur hetimet për ngjarjen ende të pazbardhur, deputeti demokrat Lulzim Basha u pyet për rolin e tij si ministër i Brendshëm asokohe në qeverinë Berisha duke u shprehur prerazi se nuk kishte qenë ai personi që kishte dhënë urdhër për të qëlluar ndaj protestuesve. Versus.al