Çfarë do të gjeni në brendësi
*Komisioni i Sigurisë zhvilloi sot një seancë dëgjimore të deputetëve me ministrin e ri të Brendshëm, Ervin Hoxha i cili raportoi mbi situatën e sigurisë në vend duke bërë edhe bilancin e ngjarjeve kriminale të zbardhura dhe atyre të cilat ende po hetohen. *Deputeti demokrat Ervin Salianji e kritikoi Hoxhën për mungesën e profesionalizmit dhe për faktin se një i shpallur në kërkim si Hajrulla Xhivini ishte mes 15 aplikantëve për postin e drejtorit të policisë. *Ndërsa nga ana tjetër, Hoxha u përgjigj duke lavdëruar punën e paraardhësve të tij në dikasterin dhe zbuloi se si pasojë e mosplotësimit të kritereve, 4 prej aplikantëve janë skualifikuar nga ana e komisionit të ngritur nga Ministria e Brendshme. *Debatet në komision vijuan, me deputetin Flamur Noka i cili akuzoi krerët e policisë për lidhjen me krimin e organizuar dhe për këtë përmendi edhe dosjen “Metamorfoza”, ndërsa ironizoi duke thënë se me mungesën e konfirmit të pastërtisë së aplikantëve, edhe anëtarë të krimit të organizuar si Durim Bami, mund të kandidojnë për drejtorë të policisë. *Ministri i Brendshëm Ervin Hoxha në shifrat e dhëna tha se këtë vit arrestimet janë rritur me mbi 40% duke e konsideruar këtë si arritje, ndërkohë që e tillë mund të quhej parandalimi.
“Durim Bami mund të kandidojë për drejtor”, Noka-Hoxhës: Ai që ke në krah, i paaftë për të kontrolluar
Deputeti i Partisë Demokratike, Flamur Noka ka kritikuar ministrin e ri të Brendshëm Ervin Hoxhën për mbrojtjen që ky i fundit bëri ndaj punës së Taulant Ballës duke e cilësuar si “të shkëlqyer”.
Ai tha se është fyerje për qytetarët të thuhet se sot siguria në Shqipëri është njëjtë me atë të standarteve europiane ndërsa akuzoi drejtues të lartë të policisë për bashkëpunim me bandat kriminale.
“Të thuash që në Shqipëri niveli I sigurisë është standart europian, fyen dhe poshtëron çdo shqiptar të ndershëm. Mos lejoni punonjësit të bëjnë propagandë të poshtër politike me shifrat e policisë.
Zbulueshmëria e krimeve kundër personit, 96.9%. Këto shifra nxirrjua shqiptarëve dhe do e shihni çfarë reagimi do kenë. Çfarë zbulueshmërie ke ti në Shkodër, apo Durrës. Shpresoja që një ministër i ri do ketë qasje të re për ta nxjerrë policinë nga bataku i krimit dhe korrupsionit. Mos merrni përsipër fajet e të tjerëve. Sepse nuk e keni idenë sesa të zhytur në bataqe kanë qenë paraardhësit tuaj.
Mos ti shohë kush këto se është turp e faqja e zezë. Metamorfoza tregon se këto banda kriminale kanë vrarë e prerë të gjitha me bekimin e kryeministrit dhe ministrave paraardhës. Ka shkuar deri aty ku deputetët kanë krijuar organizata kriminale për të vrarë deputetin po tuajin. Krerë të organizatave kriminale hanin e drekonin me ministrat ditën kurse natën vrisnin”- u shpreh Noka.
Më tej ai hodhi edhe akuza ndaj drejtorit të komanduar Sokol Bizhga duke e cilësuar këtë të fundit sit e emëruar duke argumentuar se arritja e vetme e Bizhgës, ishte lufta ndaj opozitës. Teksa mori shembullin e Xhivinit që aplikoi për postin e drejtorit edhe pse ishte shpallur në kërkim, Noka ironizoi duke thënë se edhe Durim Bami mund të aplikonte për drejtor policie.
“Ai që ke në krah është drejtor politik i komanduar, ka devotshmërinë në betejën kundër opozitës. Vetëm kaq ka arritje ai. Tani, ai zotëria së bashku me stafin e tij nuk e di se Hajrulla Xhivni qenka në kërkim me urdhër arresti. Po këtu mund të vijë Durim Bami të kandidojë dhe ju e fusni në listën e konkurrentëve”- deklaroi Noka. Versus.al
Gara për kreun e Policisë së Shtetit, skualifikohen 4 kandidatë (EMRAT)
Katër kandidatë për kreun e policisë së shtetit janë skuadlifikuar nga komisioni i Ministrisë së Brendshme.
Mësohet se janë skualifikuar Shemsi Premçi, Sami Rasha, Ibrahim Disha dhe Hajrulla Xhivini.
Lajmin e bëri me dije ministri i Brendshëm Ervin Hoxha gjatë pranisë së tij në komisionin e Sigurisë ku edhe u hodhën akuza mbi kandidaturën e Hajrulla Xhivinit i cili pavarësisht se rezulton i shpallur në kërkim ka aplikuar për drejtor të policisë së shtetit.
Skualifikimi i emrave të mësipërm erdhi me arsyetimin se nuk plotësonin kriteret e përcaktuara në ligjin për policinë e shtetit ku renditen kushtet që aplikanti duhet të zotërojë për të kandididuar në këtë pozicion. Versus.al
Aplikanti për drejtor policie në kërkim, Salianji-Hoxhës: S’kapni dot një TikTok-er, thirreni për intervistë dhe arrestojeni
Në komisionin e Sigurisë po mbahet sot seanca dëgjimore me ministrin e ri të Brendshëm Ervin Hoxha i cili raportoi për ngjarjet kriminale në vend të ndodhura së fundmi, duke bërë me dije se numri i të arrestuarve është 40% më i lartë krahasuar me një vit më parë.
Nuk munguan debatet mes deputetëve socialistë e demokratë, pasi këta të fundit i kërkuan kryetarit të komisionit Nasip Naço që të mos ndërhyjë në mbledhje. Nga ana tjetër, deputetët e PS e lavdëruan faktin që sipas tyre, ministri i ri i Brendshëm është paraqitur në komision në kohë rekord brenda kërkesës së bërë nga deputetët.
Ndërsa Salianji pretendoi se ministri Hoxha shprehu në fjalën e tij pakënaqësinë për punën e bërë nga paraardhësit e tij Taulant Balla, Blendi Çuçi dhe Fatmir Xhafaj.
Gjatë fjalës së tij teksa foli për kandidatët për drejtor të policisë së shtetit, Salianji kritikoi Hoxhën për faktin që një “Tiktoker” Hajrulla Xhivini i shpallur në kërkim për krim kibernetik ka aplikuar për postin e kreut të policisë.
“Me thuajse 12 mijë punonjës nuk e gjeni ju personin në kërkim, vjen ai ju aplikon për drejtor të policisë së shtetit. Kjo nuk ndodh as në vendet e botës së tretë. Ku e dini ju që do ketë gjeneratë të re të policisë së shtetit, kur ende nuk ka aplikime të dorëzuara”- argumentoi Salianji.
Pjesë nga debati:
Noka: Kemi kërkuar seancë dëgjimore me ministrin dhe jo me kryetarin e komisionit të sigurisë. Bëj drejtuesin dhe menaxhuesin por jo suflerin e çdo deputeti që flet. Ministri përgjigjet vetë nuk ka nevojë për sufler. Mos u përpiq të mbulosh situatën ku është zhytur policia dhe rendi me zhurmë dhe sherrnaja artificiale që kërkon të krijosh.
Naço: Ju lutem të bëheni të gjithë deputetë euroatlantikë, të mos jemi afrikanë por të jemi deputetë europianë.
Noka: Unë e di që je mbështetës i traktatit të Varshavës por…
Qefalia: Më tregoni një ministër që ka zbatuar këtë kohë rekord, ka ardhur brenda 7 ditëve pas kërkesës së deputetëve. Kryetar të lutem mbaj balancën, pyetje andej pyetje këtej.
Naco: Ju lutem bëhuni deputetë euroatlantikë
Salianji: Faleminderit kryetar, e di se në situatën e vështirë politike që ju ka future kryetari mund të mbani një derë hapur edhe për eurodeputeë atlantikë
Naço: Lëri këto po shikoni ballkonin atje.
Salianji: Këtu nuk është party, nuk vihet për qejf. Vihet me detyrim dhe nuk bën nder kur vjen ministri apo drejtori i policisë. Në këndvështrimin tim, ministri tha se nuk është i kënaqur me punën e bërë nga Balla, Çuçi e Xhafaj. Më vjen mirë që ministri e nis duke konfirmuar ato që kemi thënë ne gjithë këto vite.
Salianji kritikoi ministrin mbi deklaratat e zbardhjes së ngjarjeve kriminale duke argumentuar se autorët ishin arratisur dhe nuk janë arrestuar. Versus.al
