Çfarë do të gjeni në brendësi
*Një seancë “anormale” mund të konsiderohet ajo e sotmja e zhvilluar në komisionin hetimor për koncesionet në Shëndetësi ku fillimisht deputetët e opozitës nuk u lanë të hynin në sallë për shkak se ishin të përjashtuar. *Pavarësisht kësaj pengese, ata arritën të futeshin brenda ku pati përplasje mes kryetares së komisionit Albana Vokshi dhe deputetit socialist Plarent Ndreca për shkak se ky i fundit kishte nisur mbledhjen pa praninë e demokratëve. *Vokshi kërkoi që dëshmitari i thirrur Gentian Opre të dilte jashtë dhe të hynte pasi fillimisht të vijohej me procedurat. Një gjë e tillë nuk u lejua nga deputeti Plarent Ndreca i cili tha se mbledhja kishte nisur. Ndërsa nuk munguan as fyerjet mes deputetëve, pika kulmore ishte momenti kur Vokshi i hodhi përtokë mikrofonin Ndrecës. *Deputetët e opozitës lanë sallën, ndërsa Vokshi qëndroi e pranishme në mbledhje duke u përplasur mbi një orë me ligjvënësit socialistë. Nga ‘tonet e larta’ u shqetësua edhe deputeti socialist Erion Braçe i cili hyri në sallën e komisionit ku pati debat me Vokshin. *Një reagim për situatën e krijuar në komisionin hetimor të Shëndetësisë, e pati edhe kreu i grupit parlamentar socialist, Niko Peleshi i cili shruan në facebook se deputetët e opozitës kanë kaluar çdo kufi, duke pretenduar se edhe deputetja socialiste Mila Ekonomi është shtyrë prej tyre.
Deputetët e PD shtynë Milva Ekonomin, Peleshi: Tejkaluan çdo kufi, opozita po sjell krizë në Kuvend
Kryetari i grupit parlamentar socialist, Niko Peleshi ka reaguar ashpër ndaj përplasjeve të ditës së sotme mes deputetëve të PD dhe Milva Ekonomit në hyrje të sallës ku po zhvillohej seanca e radhës në komisionin hetimor të ngritur për koncesionet në Shëndetësi.
Peleshi shkruan se opozita ka tejkaluar çdo kufi me shtyrjen që i bënë Ekonomit dhe se dhuna ndaj deputetëve është e dënueshme. Duke thënë se opozita po përpiqet ta sjellë krizën e saj në Kuvend, në përfundim të reagimit të tij, Peleshi i fton kolegët demokratë që t’i kthehen rrugës së arsyes.
“Pas përpjekjeve të dhunshme të PD për të penguar punimet e seancës plenare dhe sulmet me molotov ndaj institucioneve, sot është tejkaluar çdo kufi me cenimin fizik të deputetes së mazhorancës, Milva Ekonomi, nga deputetët e përjashtuar të opozitës, Xhelal Mziu dhe Ina Zhupa. Opozita po tenton të sjellë krizën e vet edhe në Kuvend. Dhuna ndaj deputetëve, stafit të Kuvendit, Gardës apo Policisë është absolutisht e papranueshme dhe e dënueshme.
I bëjmë thirrje deputetëve të Partisë Demokratike të rikthehen në rrugën e arsyes dhe të dialogut. Dhuna dhe përpjekjet për të bllokuar punën e Kuvendit nuk i shërbejnë as qytetarëve, as demokracisë”- shkruan Peleshi në reagimin e tij. Versus.al
Braçe hyn te komisioni i Shëndetësisë, Vokshi i kërkon llogari, deputeti: Fytyrë e keqe
Debati dhe përplasjet në komisionin hetimor për koncesionet në Shëndetësi vijuan për më shumë se 1 orë, ndërsa e pazakontë ishte edhe hyrja e deputetit socialist Erion Braçe në sallë.
Kjo ka shkaktuar edhe reagimin e kryetares së komisionit, Albana Vokshi e cila i kërkoi llogari deputetit për praninë e tij. Ky i fundit iu kthye ashpër, ndërsa tha se ishte i shqetësuar nga ngritja e zërit të saj.
Pjesë nga debati:
Braçe: Kështu bëji atij që ke në shtëpi, kur flet me mua mendo një çik
Vokshi: Hec mor Erion
Braçe: Hec er dreq aty, fytyrë e keqe
Vokshi: Ti për ca ke ardhur?
Braçe: E kam zyrën këtu matanë dhe po të dëgjoj ty.
Prej më shumë se një ore mbledhja me dëshmitarin e thirrur për koncesionin e Sterilizimit vijon të mos zhvillohet ndërsa përplasjet mes Vokshit dhe Ndrecës kanë qenë të vazhdueshme. Versus.al
“Rrugaçë”, sherr te 'Shëndetësia', Vokshi i hedh mikrofonin Ndrecës! Deputeti: Sillni një ambulancë
Pamje të paprecedenta janë ato të sotmet në komisionin për koncesionet në Shëndetësi, konkretisht për ‘Sterilizimin’. Kryetarja Albana Vokshi është përplasur ashpër me Plarent Ndrecën të cilit i ka hedhur edhe mikrofonin në tokë për shkak se ky i fundit vijonte me mbledhjen duke mos pranuar që dëshmitari të dilte jashtë dhe mbledhja të hapej sipas procedurës me kryesimin e Vokshit.
Në përplasjen mes Vokshit dhe Ndrecës ndërhyri edhe deputeti socialist Ilir Metaj i cili me ironi kërkoi mbërritjen e ambulancës për kryetaren e komisionit duke pretenduar se gjendja e saj nuk ishte aspak e mirë.
Pjesë nga debati:
Ndreca: Nuk punoj unë me njerëz që sillen si rrugaçë
Vokshi: Kujt i thua rrugaçë ti
(Vokshi hedh mikrofonin e Ndrecës në tokë)
Deputeti Ilir Metaj: Zonjë ke nevojë të qetësohesh, thërrisni një ambulancë këtu. Njoftoni urgjencën ju lutem sepse ka nevojë.
Ndreca: Ju nuk keni argument, vetëm forcën doni të përdorni.
Vokshi: Ju keni guxim të ndaloni deputetët e opozitës
Ndreca: I ka ndaluar molotovi
Më tej përplasjet vijuan me akuza mes palëve. Vokshi akuzoi Ndrecën për abuzime me tenderin e uniformave të policisë duke e paralajmëruar se shpejt do jepte llogari para SPAK-ut, ndërsa socialisti tha se do të dorëzonte padi ndaj saj për akuza të tilla. Versus.al
Përplasje te ‘Sterilizimi’, Garda ndalon demokratët të hyjnë në mbledhje! Vokshi-Ndrecës: E ke ti radhën në burg pas Beqajt
Komisioni hetimor për Sterilizimin ka nisur me përplasje mes deputetëve të PD dhe punonjësve të Gardës të cilët fillimisht nuk i lanë të hynin në sallë.
Albana Vokshi ka arritur të hyjë në komision dhe është përplasur me deputetin socialist Plarent Ndreca i cili kishte nisur me pyetjen e dëshmitarit edhe pse deputetët e opozitës nuk ishin në sallë dhe mbledhja nuk ishte hapur nga kryetarja Vokshi.
Përplasja mes Vokshit dhe Ndrecës:
Vokshi: Unë te dera atje ti guxon të hysh në mbledhje. A je njeri normal a jo? Mbylle këtë mikrofon këtu, të t’vijë turp ty dhe kujtdo këtu. I kanë ndalur kolegët tek dera. Kush je ti? Nuk je ti kryetar këtu. Aty te dera janë kolegët e opozitës.
Ndreca: Po përse bërtet, çfarë do të tregosh me të bërtitur? Mendon se na frikëson? Nuk je ti pronarja e komisionit, nuk vendos ti, por komisioni.
Vokshi: Ka mundësi dëshmitari të dalë jashtë se si fillim është procedura.
Ndreca: Zonjë je duke prishur mbledhjen. Dëshmitari nuk lëviz prej aty.
Vokshi: Nëse doni delir, ja ku është ky këtu, po do jetë i pari që do e hajë nga të gjithë këta që janë këtu.
Ndreca: Ulu aty qetësohu
Vokshi: Ore a jeni normal ju apo jo, deputetët janë te dera përjashtë ju bëni këtu sikur nuk ka asgjë. Do jesh i dyti në radhë që do shkosh atje ku ka shkuar miku yt Ilir Beqaj.
Ndreca: Ky është presion i hapur
Vokshi: Garda të nxjerrë përjashtë dëshmitarin
Ndreca: Jo, o punonjësi i Gardës, vendimet këtu merren me shumicë votash nga komisioni
Përplasja vjen pas një tjetër mbledhje të dështuar ditën e djeshme ku deputetët e mazhorancës u larguan nga salla e mbledhjes së komisionit me arsyetimin se nuk po u jepej e drejta e fjalës. Ndërsa aksioni i dhunshëm opozitar i nisur nga PD pas arrestimit të Ervin Salianjit, duket se do të vazhdojë edhe në seancën e ditës së nesërme, ku pavarësisht përjashtimit, deputetët demokratë do të tentojnë të hyjnë në Kuvend. Versus.al
