Çfarë do të gjeni në brendësi
*Shtatë deputetë të Partisë Demokratike janë kallëzuar në SPAK nga policia e Tiranës nën akuzën e përdorimit të lëndëve helmuese dhe të kundërshtimit të efektivëve gjatë përplasjes së djeshme jashtë Kuvendit. Për Elda Hotin ka nisur hetimi në gjendje të lirë për shkeljen e rregullave të lëndëve helmuese, pasi dje u akuzua nga Spiropali për spërkatjen me benzinë të socialistëve. Demokratja tha se kishte qenë aromatizues. *Gjithashtu nisi hetimi në gjendje të lirë për organizatorët e protestës së përjavshme para bashkisë Tiranë të cilët zhvendosën protestuesit para Kuvendit në mbështetje të deputetëve demokratë dhe aty patën përplasje me policinë. *Partia Socialiste dorëzoi në Sekretariatin e Etikës kërkesë për masë disiplinore ndaj deputetes Elda Hoti dhe Petrit Doda të cilët duke qenë pjesë e pak deputetëve të pranishëm opozitarë në sallë, penguan zhvillimin normal të seancës. *Nga Shkodra, ministri i Brendshëm Ervin Hoxha tha se goditjet ndaj punonjësve të policisë nuk do tolerohen, ndërsa hodhi poshtë pretendimet e opozitës se njëri prej efektivëve kishte kërcënuar me armë deputetin Luan Baçi duke theksuar se gjatë protestave policët nuk kanë armë me vete.
EMRAT/ Përjashtohen me 10 ditë nga parlamenti dy deputetë të tjerë të PD
Sekretariati i Etikës në Kuvend ka përjashtuar me 10 ditë nga parlamenti dy deputetë të tjerë të PD.
Bëhet fjalë për deputeten Elda Hoti dhe deputetin Petrit Doda.
Sipas mazhorancës socialiste që kërkoi dhe përjashtoi dy deputetët e opozitës, Elda Hoti spërkati nëpër sallën e parlamentit një lënd ende të paidentifikuar.
Ndërsa deputeti Doda akuzohet se ka shkaktuar kaos në sallën e parlamentit.
Lëndë helmuese dhe tensione në Kuvend, policia çon në SPAK 7 deputetë të PD
Tiranë- Policia ka depozituar në SPAK kallëzime penale ndaj shtatë deputetëve të Partisë Demokratike për zhvillimet e ditës së djeshme brenda dhe jashtë Kuvendit ku pati kaos dhe përplasje me efektivët.
Ndaj deputetes Elda Hoti e cila u akuzua nga kryeparlamentarja Elisa Spiropali se ka spërkatur deputetët socialistë me benzinë, ka nisur procedimi penal në gjendje të lirë nën akuzën e kanosjes dhe shkeljes së rregullave mbi lëndët helmuese.
Ndërsa po ashtu janë depozituar denoncime ndaj deputetëve të tjerë: Flamur Noka, Gazment Bardhi, Bledion Nallbati, Dashnor Sula, Luan Baçi dhe Saimir Korreshi të cilët akuzohen për kundërshtimin e efektivëve të policisë gjatë përplasjeve jashtë godinës së Kuvendit.
Po ashtu janë dorëzuar materialet në gjykatën e Tiranës kundrejt Klevis Balliut dhe disa prej anëtarëve të PD të cilët morën organizuan protestën para bashkisë Tiranë ku dogjën goma makine dhe më pas drejtuan turmën e protestuesve për tek Kuvendi ku patën përplasje me efektivët e policisë. Versus.al
Hoxha hedh poshtë pretendimet e opozitës: Policia dje s’ka pasur armë! Deputetët dhunuan efektivët
Ministri i Brendshëm Ervin Hoxha nga Shkodra, ka komentuar protestën e djeshme të opozitës dhe përplasjen e deputetëve me efektivët e FNSH jashtë godinës së Kuvendit, në kushtet kur institucioni ishte rrethuar me gardh metalik.
Hoxha u shpreh i keqardhur me gjestet e bëra nga deputetët e opozitës ndërsa deklaroi se pretendimet e deputetit Luan Baçi se i është drejtuar arma nga ana e policisë, janë të pavërteta, duke theksuar se efektivi nuk ka pasur armë.
““Policia është shprehur qartë se nuk ka pasur asnjë tentativë të nxjerrjes së armës nga efektivi, në ligjin për tubimet është e përcaktuar nga rastet kur përdoren armët e zjarrit, nuk kanë pasur dhe s’kanë qenë të pajisur me armë zjarri. Sulmi i deputetëve ndaj policisë dhe gardës, në prag të marrjes së ditës së negociatave dhe anëtarësimit së Shqipërisë në BE, nuk është i pranueshëm sepse forcat e policisë dhe Garda është për të mbrojtur institucionet kushtetuese”- tha Hoxha ndër të tjera.
Lajmi në përditësim…
Spiropali e akuzoi se hodhi benzinë në Kuvend, PS kërkon ndëshkimin e Elda Hotit! Kërkohet masë edhe për Dodën
Partia Socialiste ka kërkuar masë disiplinore ndaj deputetëve demokratë Elda Hoti Petrit Doda të cilët në seancën e ditës së djeshme ishin të pranishëm në sallë, por u përpoqën të bllokonin punimet duke bllokuar foltoren e Kuvendit dhe duke i shkulur mikrofonin deputetit socialist Petro Koçi.
Elda Hoti gjithashtu u akuzua nga mazhoranca se hodhi benzinë kundrejt deputetëve socialistë, gjë që u mohua nga ligjvënësja demokrate e cila tha për mediat se materiali i lëngshëm që kishte me vete në Kuvend ishte thjesht aromatizues.
Nga ana tjetër, Vokshi dhe Petrit Doda nuk lejuan kreun e Kontrollit të Lartë të Shtetit, Arben Shehun të raportonte në Kuvend për veprimtarinë gjatë vitit 2023 të institucionit që drejton. Për pasojë, raporti i KLSH kaloi me 73 vota pro pa pasur diskutime në sallë. Nga ana tjetër, u anulua interpelanca e kërkuar nga Agron Shehaj me ministren e Mjedisit, Mirela Kumbaron pasi deputeti refuzoi të parashtronte gjetjet e tij, pa qenë në sallë edhe deputetët e tjerë të opozitës.
Të gjitha këto akte, u kryen brenda sallës së Kuvendit në kushtet kur jashtë po zhvillohej tjetër aksion opozitar me përplasjen e deputetëve të përjashtuar me punonjësit e Gardës dhe më pas me forcat e policisë. Përplasja përshkallëzoi deri në shtyrje dhe ofendime mes deputetëve dhe efektivëve të cilët hynë në rrethimin e Kuvendit pasi protestuesit e opozitës para bashkisë, u zhvendosën para institucionit legjislativ në mbështetje të deputetëve demokratë.
Ministri i Brendshëm, Ervin Hoxha u shpreh sot nga Shkodra lidhur me përplasjet e ditës së djeshme jashtë Kuvendit mes deputetëve dhe protestuesve, ku mohoi pretendimin e opozitës se deputeti Luan Baçi është kërcënuar me armë zjarri.Versus.al
