Ilir Meta ka reaguar pas protestës së opozitës që bllokoi akset rrugore të vendit nga veriu në jug, në 6 nyje nevralgjike.

“Falenderim dhe mirënjohje të përzemërt për qindra mijëra shqiptarë patriotë në mbarë vendin që u ngritën në këmbë me guxim dhe me ndjenjë të fortë patriotike e kombëtare, në përballje pa kthim me Narkoshtetin për të marrë në dorë fatet e Shqipërisë.

Nuk ka forcë në botë të ndalë Uraganin e Lirisë”, shkruan Meta në rrjetin social Facebook.

Deputeti i Partisë Demokratike, Edmond Spaho deklaroi mbrëmjen e sotme se është dhunuar nga një polic civil gjatë protestës së sotme të opozitës.

“Rreth orës 19:20, policia vendosi të ndërhyjë dhe ta shpërndajë protestën, megjithëse i kishim komunikuar që kishim marrë leje për 3 orë. Kemi qenë paqësorë dhe i kemi lejuar të kalojnë të gjitha ambulancat, madje edhe makinat me civilë që kishin probleme shëndetësore.

Kështu që, i thamë që të prisnin sa të shkonte ora, sipas asaj që kishim rënë dakord. Por, policia e kishte ndarë mendjen. Erdhën forcat e ndërhyrjes së shpejtë, ata me skafandra dhe polic civilë me shumicë, të cilët na rrethuan dhe na sulmuan.

Përballë kisha një polic civil dhe i thashë: “Mos më prek se jam deputet”. Ai sikur i thashë të kundërtën dhe menjëherë m’u hodh. Natyrisht, edhe unë iu ktheva se dy duar për një kokë janë. Nuk mund ta lija. Pastaj, ndërhynë njerëzit që e frenuan”, tha Spaho.

“Aty kishte shumë kamera dhe është fare e thjeshtë për ta identifikuar atë bandit. Më ka çuditur agresiviteti i Policisë së Elbasanit. Kanë marrë në polici 21 veta”, shtoi Spaho.  

Policia e Elbasanit ka shoqëruar 12 persona për protestën në rrethrrotullimin e Bradasheshit.

Të ndaluar janë Albi Bylykbashi, Aurel Bylykbashi, Sokol Shkelzeni, Daniela Gjini, Dorian Koldashi, Enver Lamçe, Hamza Lamçe, Arben Pjetri, Agron Beqiri, Hamit Tabaku, Altin Bicja dhe Edi Pojani.

Aurel Bylykbashi është ish-kryetari i PD-së së Elbasanit dhe ish-deputet.    

Protesta e sotme e opozitës zgjati tre orë, ashtu siç ishte paralajmëruar dhe ishte e fokusuar në 6 akset kryesore të Shqipërisë, rrethrrotullimi i Bradasheshit në Elbasan, ish-sheshi Shqiponja në Tiranë, rrethrrotullimi i Milotit, Levani në Fier,  Bishti i Zhurit në Rrogozhinë dhe mbikalimi i Kthesës së Kamzës.

Protesta e nisur në orën 17:00 u mbyll e qetë dhe pa probleme. Duhen evidentuar vetëm tre momente kur pati një përplasje mes qytetarëve dhe policisë.

Është mbyllur pas 3 orësh protesta e PD-së dhe opozitës në mosbindjen civile të thirrur disa ditë më parë.

Pas dy orësh proteste e qetë, rreth orës 19:00 nisën dhe përplasjet me policinë, ku protestuesit të acaruar provokuan uniformat blu që ishin në gadishmëri.

Në Elbasan pati edhe përplasjen më të ashpër, ku policia ndërhyri që të hapë rrugën

Duke nisur nga ora 17:00 deri në orën 19:50, Partia Demokratike dhe mbështetësit e saj kanë bllokuar akset rrugore të vendit nga veriu në jug, në 6 nyje nevralgjike si Kthesa e Kamzës, rrethrrotullimet e Shkozetit, Bradasheshit, Levanit dhe Rrogozhinës, si dhe kryqëzimi i Milotit.

Është hapur rreth orës 19:20 qarkullimi në Elbasan, ku protestuesit janë larguar nga rrethrrotullimi i Bradasheshit.

Protesta vijoi e qetë në këtë zonë, derisa në fundin e saj ndodhi një incident.

Në momentin që ka ardhur një ambulancë. Protestuesit kanë hapur rrugën, por ka qenë edhe një automjet tjetër pas ambulancës, i cili ka tentuar të kalojë dhe është fikur për shkak të një defekti. Në kushte të tilla, policia ka kërkuar ndihmën e një karrotreci për të bërë të mundur largimin e automjetit që ka pësuar defekt.

Ky moment është konsideruar si provokim nga ana e protestuesve.

Prej orës 17:00 opozita po proteston në kuadër të mosbindjes civile në 6 pika nevralgjike në të gjithë vendin.

Protesta e opozitës ka gjetur pasqyrim në mediat ndërkombëtare.

“Bllokadë civile, sot ose kurrë!” ishte motoja e protestës, shkruan Associated Press.

Në vijim, thuhet se në Tiranë, deputetët e opozitës parkuan makinat e tyre për të bllokuar trafikun për tre orë. Në vende të tjera, mbështetësit e opozitës organizuan protesta në anë të rrugës ose dogjën goma.

“Opozita shqiptare bllokoi të martën udhëkryqe në të gjithë vendin në një tubim mbarëkombëtar duke kërkuar që qeveria të zëvendësohet nga një kabinet kujdestar teknokratik përpara zgjedhjeve parlamentare të vitit të ardhshëm.

Ligjvënësit udhëhoqën qindra mbështetës të opozitës në mitingje në hyrjen kryesore të kryeqytetit, Tiranë, dhe në pesë udhëkryqe të tjera kryesore në të gjithë vendin për të bllokuar trafikun”, vijon artikulli, duke pasqyruar atë që ka ndodhur në Shqipëri.

Demokratët konservatorë të udhëhequr nga ish-kryeministri Sali Berisha kanë akuzuar prej kohësh socialistët e kryeministrit Edi Rama për korrupsion, manipulim të zgjedhjeve të mëparshme dhe uzurpim të pushteteve të gjyqësorit.

Policia paralajmëroi se pengimi i trafikut ishte një vepër penale që mund të dënohej deri në tre vjet burg.

Kanë nisur tensionet mes protestuesve dhe policisë si në Tiranë dhe në Elbasan.

Pas një përplasje verbale, në zonën e sheshit Shqiponja në Tiranë, ka pasur edhe përplasje fizike mes protestuesve dhe policinë me shtyrje nga të dy palët.

Protestuesit demokratë janë përplasen me policinë edhe në Elbasan.

“O qelbësira, nuk keni turp, o legena, ikni, turp”, janë fjalët me të cilat protestuesit demokratë i drejtohen efektivëve, teksa u kërkojnë të largohen. Nga ana tjetër, policët po tentojnë të shpërndajnë turmën pas dy orësh protestë.

Ndërkohë, deputeti Tomor Alizoti këmbëngul se protesta ende nuk është mbyllur dhe bllokimi i rrugës do të vijojë deri të paktën në orën 20:00, sikurse është njoftuar.

Policia ka lëvizur nga pozicioni i saj fillestar duke u afruar tek protestuesit.

Kjo ka sjellë edhe reagimin e drejtuesve të protestës, deputetëve të PD-së të cilët kërkojnë largimin e tyre.

Sekretari i Përgjithshëm i PD-së, Flamur Noka ka kërkuar largimin e tyre, ndryshe të gjithë protestuesit do shkojnë në Surrel.

‘Siç e shikoni, një protestë paqësore po provokohet nga narkopolicia. I bën thirrje nipit të Enver Hoxhës, sulltan Surrelit, i bën thirrje kreut të organizatës kriminale që të tërheq narkopolicinë nga provokimi i qytetarëve, në të kundërt sot destinacioni i qytetarëve do të jetë Surreli.

Çdo provokim i protestuesve paqësor, do të ketë një përgjigje dhe përgjigja është; të gjithë drejt Surrelit, asnjë rrugë tjetër nuk ka.

Po nuk larguan në mënyrë urgjente këta narkopolicë, banditë të veshur me uniformë policie, Surrelit do të jetë destinacioni i protestuesve’, tha Flamur Noka nga sheshi Shqiponja.

Deputeti Bledjon Nallbani i cili drejton protestën në rrethrrotullimin e Rrogozhinës ka kërkuar që të lejohet një qytetar, i cili shprehet se do të shkojë në spital.

Por i menjehershëm ka qenë reagimi nga qytetarët e tjerë që janë shprehur se ose do të kalojnë të gjithë, ose asnjë  pasi të gjithë jemi për hall.

Nallbati: Nuk kemi asgjë personale me askënd është lajmëruar prej 10 ditësh.

Qytetari: Kam njerëz nga Anglia në makinë. Janë të lodhur duan të pushojnë

Nallbati: Është bllokuar në Tiranë, Bradashesh, Milot është bllokuar e gjitha.

Qytetari: Lëvizi këta të lutem

Një tjetër qytetar i bllokuar: Po nuk dola unë, nuk del as ti

Mbështetësit e Partisë Demokratike dhe Partisë së Lirisë, janë pozicionuar në 6 akse kryesore të vendit duke paralizuar qarkullimin e automjeteve.

Protesta ka filluar në ora 17:00 dhe pritet të zgjasë deri në 20:00 në autosradën “Tiranë–Durrës” pranë mbikalimit të Kamzës; “Durrës–Tiranë” pranë mbikalimit të Shkozetit; “Kashar–Milot” pranë kryqëzimit të Milotit; “Elbasan–Tiranë” te rrethrrotullimi i Bradasheshit; “Durrës–Fier” te rrethrrotullimi i Rrogozhinës; dhe “Levan–Tepelenë” te rrethrrotullimi i Levanit./Versus.al

Në rrethrrotullimin e Shkozetit është paralizuar qarkullimi i automjeteve, ashtu si në akset e tjera rrugore në vend.

Deputeti i Partisë Demokratike, Edi Paloka ndodhet në atë zonë bashkë me deputetin Ferdinand Xhaferraj.

Paloka tha për mediat se qëllimi i protestës së sotme është pikërisht bllokimi i rrugëve, ndërsa tha se kjo ishte lajmëruar prej disa ditësh.

“Siç e kemi deklaruar prej ditësh qëllimi i aksionit të sotëm është bllokimi i disa akseve rrugore.

Do të vazhdojmë të bllokojmë rrugët.

Atë që kemi deklaruar prej ditësh atë kemi bërë dhe atë do bëjmë. Qëllimi i sotëm është bllokimi i akseve.”, u shpreh Paloka.

Situata në rrethrrotullimin e Shkozetit ka fillur të tensionehet. Protestuesit kanë djegur goma dhe kanë hedhur kapsolla. 

Gjithësesi situata vijon të jetë e qetë. Në këtë aks rrugor ndodhen deputetët e qarkut Durrës, Edi Paloka dhe Ferdinand Xhaferraj. 

Protestuesve që kanë bllokuar rrethrrotullimet e Bradasheshit në Elbasan dhe Shkozetit në Durrës, policia është duke u bërë thirrje me megafon për të mos penguar lëvizjen e mjeteve, pasi përbën vepër penale.

“Ju kërkojmë shpërndarjen dhe lirimin e menjëhershëm nga rrethrrotullimi i Shkozetit. Në rast të kundërt ndaj jush do të merren këto masa: Do të kryhen veprimet procedurale për fillimin e ndjekjes penale sipas Kodit Penal për pjesëmarrje në grumbullime e tubime të paligjshme”, dëgjohet të thuhet me megafon nga një makinë policie në Durrës.

Sakaq në Elbasan, një nga drejtuesit lokalë të policisë me altoparlant iu drejtua turmës duke u kërkuar lirimin e rrugës.

“Të nderuar qytetarë, Policia e Shtetit bën thirrje: Bllokimi i rrugës është vepër penale, pengimi i qarkullimit të automjeteve. Neni 283 i Kodit Penal, dënohet deri në tre vite burg. Ju lutemi, hapeni rrugën. Policia e Shtetit ju bën thirrje, mos pengoni qarkullimin e automjeteve. Është vepër penale e dënueshme”, dëgjohet të thotë ai.

Por thirrja e policisë vetëm sa ka acaruar qytetarët, të cilët i janë kthyer me thirrjet “Ik, ik, ik”, apo “Kemi marrë leje”.

Kjo detyroi policinë që edhe njëherë të përsëriste thirrjen: “Veprimet tuaja janë të dënueshme. Neni 283 i Kodit Penal, po ju paralajmëroj për herë të fundit”.

Opozita po proteston prej orës 17:00 në 6 pika nevralgjike nga Miloti në Levan, duke paralizuar qarkullimin e mjeteve në rrethrrotullimet kryesore.

Në Tiranë është bllokuar rrethrrotullimi te ish-Sheshi Shqiponja, ku krahas mbështetësve të opozitës që ndodhen në rrugë, një formë bllokimi është edhe ajo me automjetet, që janë ndalur.

Mes atyre që kanë zgjedhur të bllokojnë rrugën me makinë është edhe Sekretari i Përgjithshëm i PD-së, Flamur Noka. Ai ka parkuar makinën në mes të rrugës, veprim që është pasuar edhe protestuesit e tjerë, që kanë ndalur makinat e tyre.

Portesta e opozitës ka filluar dhe 6 nga akset kryesore në vend janë bllokuar.

Qytetarët kanë zgjedhur mënyrë të ndryshme për të protestuar. Një protestues në Milot ka vajtur me kalë ndërsa një tjetër me bukë me vete./Versus.al

Nga rrethrrotullimi i Bradasheshit, Ivi Kaso deklaroi se opozita është e vendosur për të përfunduar në mënyrë qytetare bllokadën e sotme të rrugëve kryesore të vendit, ndërkohë që policia u kujtoi me megafon protestuesve se bllokimi i rrugëve është vepër penale.

“Edhe në rrethrrotullimin e Bradasheshit, nisi etapa e mosbindjes civile që ka të bëjë me bllokimin e qarkullimit në akset kryesore rrugore. Jemi treguar të kujdesshëm që, pavarësisht kësaj mënyre jo shumë të zakontë proteste, të lajmëronim qytetarët që të merrnin masa për të qarkulluar paraprakisht.

Besoj që në një pjesë të madhe kjo është arritur. Kërkojmë mirëkuptimin e qytetarëve për të gjithë opozitarët që janë të vendosur për të përfunduar në mënyrë qytetare këtë bllokadë. Shpresoj që deri në përfundim të kësaj proteste, jo më para se ora 20:00, të mos shënohen përplasje. Deri tani konstatojmë se policia ka marrë masa për të devijuar në akse të tjera trafikun.

Policia do të procedojë penalisht organizatorë dhe qytetarë, nuk kemi dyshim. E ka bërë këtë në çdo protestë. Do të donim që Policia e Shtetit të tregonte të njëjtin zell sa herë që kryeministri për çdo aheng vendos të bllokojë qarkullimin normal”, tha Ivi Kaso nga rrethrrotullimi i Bradasheshit në Elbasan.

Nisin perplasjet e para mes protestuesve dhe drejtuesve të mjeteve në Elbasan dhe në nyjen e Rrogozhinës.

Qytetari: Protestoni, por çfarë faji kemi ne të qëndrojmë në rrugë. Unë vij nga puna.  Duart si kam larë akoma.

Protestuesit: Edhe ti hall ke, edhe ne hall kemi. Të lutëm prit aty…

Qytetari: Unë vij nga puna

Protestuesit: Edhe unë nga puna vij

Ka nisur mosbindja civile e opozitës në të gjithë vendin.

Siç ishte paralajmëruar në orën 17:00 ka nisur dhe bllokimi i rrugëve.

Në rrethrrotullimin e Rrogozhinës një protestues ka hipur në një kamion dhe i ka kërkuar shoferit që të ndalojë, dhe nga ana tjetër i ka propozuar një leje kalimi.

‘Fike makinën, ose të leme nëse thua Rama ik’, i është drejtuar protestuesi, shoferit të kamionit.

Opozita ka nisur protestën e saj të mosbindjes civile.

Sapo ka shkuar ora 17:00 përfaqësues të opozitës kanë nisur bllokimin e akseve kryesore të vendit.

Kështu, është bllokuar zona tek Kthesa e Kamzës e deri tek ish-dogana, nyja në Milot, mbikalimi në Shkozet, rrethrrotullimi në Bradashesh dhe në Levan.

Kanë qenë deputetët e opozitës ata të cilët me makinat e tyre kanë bllokuar rrugët kryesore.

Protesta e kësaj të hëne është në vazhdën e tubimeve që Partia Demokratike ka zhvilluar prej burgosjes së deputetit Ervin Salianji dhe gjatë së cilave është bërë thirrje për qeveri teknike.

Është zbuluar se si janë ndarë deputetët e Partisë Demokratike në zonat ku priten të bllokohen nga protesta që do të zhvillohet sot në ora 17:00.

– Segmenti “Sheshi Shqiponja”:
(Degët e Tiranës dhe qarkut Dibër)
1. Flamur Noka
2. Albana Vokshi
3. Xhelal Mziu
4. Petrit Doda
5. Asllan Dogjani
6. Helidon Bushati
7. Kreshnik Çollaku
8. Dhurata Çupi
9. Aleatët

– Rrethrrotullimi Milot:
(Degët e qarkut Kukës, Shkodër dhe Lezhë)
1. Flamur Hoxha
2. Isuf Çela
3. Emilja Koliqi
4. Ramadan Likaj
5. Greta Bardeli
6. Ludovik Hasanaj
7. Lindita Metaliaj
8. Elda Hoti
9. Kastriot Piroli

– Rrethrrotullimi Shkozet:
(Degët e qarkut Durrës)
1. Edi Paloka
2. Ferdinand Xhaferraj

– Rrethrrotullimi Bradashesh:
(Degët e qarkut Elbasan dhe Korçë)
1. Lefter Gështenja
2. Qani Xhafa
3. Edmond Spaho
4. Sorina Koti
5. Tomorr Alizoti

– Rrethrrotullimi Rrogozhinë:
(Dega Kavajë, Rrogozhinë, Lushnje dhe Divjakë)
1. Bledion Nallbati
2. ⁠Dashnor Sula
2. Ilda Dhori

– Rrethrrotullimi Levan:
(Degët e qarqeve Fier, Vlorë, Berat dhe Gjirokastër)
1. Luan Baçi
2. Bujar Leskaj
3. Tritan Shehu
4. Kasem Mahmutaj

Deputetët Gazment Bardhi, Agron Gjekmarkaj, Oerd Bylykbashi, Jorida Tabaku, Ina Zhupa, Zheni Gjergji, dhe Saimir Korreshi, i bashkohen tubimit në Segmenti “Sheshi Shqiponja”, menjëherë në orën 18:00 me përfundimin e takimit të MSA, ku do marrin pjesë sipas porosisë së Kryetarit të Partisë.

Detaje të reja janë zbardhur rreth mënyrës së organizimit të protestës që zhvillohet sot në disa qarqe të vendit ku pritet të bllokohen disa akse rrugore në vijim të aksionit opozitar të mosbindjes civile.

Për protestën që pritet të zgjasë nga ora 17:00 deri në 20:00, banorët e zonave në veri të vendit, pritet të mblidhen në rrethrrotullimin e Milotit, me përjashtim të atyre të qarkut të Dibrës të cilët do t’u bashkohen demokratëve në Tiranë.

Në rrethrrotullimin e Bradasheshit pritet që pjesë e bllokimit të jenë edhe demokratë nga Korça. Konkretisht ndarja në rrethe do të jetë e tillë:

Në Tiranë, sheshi shqiponja dhe aksi i Casa Italias, do të bllokohet lëvizja e automjeteve në hyrje dhe dalje, bashkëpunim mes degëve të PD në Tiranë dhe Dibër.
Në rrethrrotullimin e Shkozetit, bllokimi do të organizohet mes degëve të PD-së së Durrësit, Fushë Krujës dhe Shijakut.

Në rrethrrotullimin e Rrogozhinës, degëte PD në Kavajë, Lushnjë, Rrogozhinë dhe Divjakë.

Ndërsa në rrethrrotullimin Levan, degët e Fierit, Gjirokastrës, Vlorë dhe Berat.

Policia ka marrë porosi nga drejtori i përgjithshëm Ilir Proda që të mos përfshihet në incidente dhe të mos bjerë pre e provokimeve që mund t’i bëhet nga ana protestuesve. Versus.al

Foto nga një protestë e mëparshme e PD

Sot në orën 17:00, akset kryesore të vendit pritet të bllokohen nga protestues të thirrur nga Partia Demokratike si vijim i mosbindjes civile të paralajmëruar më herët me kushtin e krijimit të një qeverie teknike pa Ramën në krye të saj.

PD ka marrë 3 orë leje për protestë, ndërsa plani është bllokimi i disa akseve kyçe rrugore si mbikalimi i Kamzës në Tiranë, mbikalimi i Shkozetit në Durrës, kryqëzimi i Milotit etj. Nuk është bërë me dije nëse protestuesit do të qëndrojnë vetëm në këto akse apo do të lëvizin në zona të tjera.

Ndërsa policia e cila ka paralajmëruar se do të jetë e pranishme në këto akse rrugore 30 minuta para nisjes së protestës, ka dalë me një deklaratë zyrtare ku u ka bërë thirrje përfaqësuesve të PD që në asnjë rast të mos bllokojnë qarkullimin e mjeteve dhe qytetarëve me argumentin se kjo gjë përbën vepër penale dhe personat përgjegjës do të përballen me pasoja ligjore.

“Bllokimi i akseve rrugore është vepër penale e parashikuar nga neni 293 i Kodit Penal dhe cilido që do të ndërmarrë veprime për të bllokuar rrugët, do të përballet me pasojat që sjell shkelja e këtij neni. Ndërkohë për t’iu ardhur në ndihmë qytetarëve që do të qarkullojnë në akset rrugore të mësipërme, Policia e Shtetit ka ndërmarrë masa që në rast bllokimi, të devijojë qarkullimin e automjeteve në rrugë alternative”, thuhet në njoftimin e policisë.

Nga ana tjetër, kreu i grupit parlamentar të PD, Gazment Bardhi tha për mediat se tubimi i njoftuar prej tyre është i ligjshëm dhe se policia duhet të marrë masa si për çdo protestë tjetër.

“Tubimi kërkon njoftim të policisë dhe njoftimi është bërë nga sektori i organizmit pranë PD. Në çdo tubim ka bllokim të rrugëve, edhe kur protestojmë para Kryeministrisë. Kur Veliaj, kreu i bandës 5d bën maratonën, bllokohen të gjitha rrugët brenda kryeqytetit. Çdo organizmin i ligjshëm, që ndiqet procedura e njoftimit, sjell bllokimit të trafikut, është detyrë e policisë të marrë masa për organizmin e trafikut”- u shpreh demokrati.

Bllokimi i akseve që ka paralajmëruar PD:

Mbikalimin e Kthesës së Kamzës, në hyrje të Tiranës

Segmenti “Casa Italia - Sheshi Shqiponja”

Rrethrrotullimi Milot

Rrethrrotullimi Shkozet

Rrethrrotullimi Bradashesh

Rrethrrotullimi Rrogozhinë

Rrethrrotullimi Levan

Pas protestës së 7 tetorit ku u hodhën molotovë drejt institucioneve kryesore të vendit, kjo është protesta e dytë në vazhdën e mosbindjes civile të paralajmëruar nga ana e Partisë Demokratike dhe kryedemokratit Sali Berisha i cili ka theksuar se kërkesa e opozitës është krijimi i një qeverie teknike pa Ramën në krye të saj me qëllim që të mos ketë mundësi të kontrollojë administratën në zgjedhjet parlamentare të 2025-ës. Versus.al