Çfarë do të gjeni në brendësi
*Kreu i qeverisë Edi Rama mbajti fjalim në takimin e dytë të nivelti të lartë për konferencën “Shqipëria 2030 në BE”. Teksa nuk munguan as batutat me përfaqësuesit e BE të cilët ishin të pranishëm, kryesocialisti e cilësoi “në alarm” Reformën në Drejtësi derisa vendi të anëtarësohet në Bashkimin Evropian. *Ai tha se pakthyeshmëria e Reformës, varet vetëm nga anëtarësimi në BE duke u shprehur se kjo është e vetmja rrugë që duhet të ndjekë vendi ynë. *Të pranishëm në këtë konferencë ishin edhe kryeparlamentarja Elisa Spiropali dhe deputeti Fatmir Xhafa i cili aktualisht drejton komisionin e posaçëm Antikorrupsion. Ai bëri me dije se gjetjet e komisionit do të prezantohen pas zgjedhjeve, ndërsa pati kritika për gjendjen aktuale të Kuvendit.
Reforma në Drejtësi, Rama: Është në alarm deri kur të anëtarësohemi në BE
Kryeministri Edi Rama gjatë fjalimit në takimin e dytë të nivelit të lartë për konferencën “Shqipëria 2030 në BE” ku ishin të pranishëm edhe përfaqësues të BE, tha se garantimi i pakthyeshmërisë së Reformës në Drejtësi është në alarm deri në momentin që do të anëtarësohemi në Bashkimin Europian.
“Garantimi i pakthyeshmërisë së Reformës në Drejtësi është sfida e sfidave. Deri kur të hyjmë në BE ky është një alarm. Që institucionet e reja të drejtësisë të jenë të paprekshme në mënyrë që asnjë forcë politike të mos e kërcënojë ekzistencën e tyre”- deklaroi kreu i qeverisë.
Ai shtoi më tej se duhet shfrytëzuar mundësia që ka vendi për t’u anëtarësuar në BE për të patur një të ardhme të pakërcënuar nga e shkuara.
“Nuk kemi asnjë zgjedhje tjetër dhe nuk duam asnjë zgjidhje tjetër. Kemi vetëm një rrugë që është BE. Për ne është shumë e qartë, ne nuk jemi perëndimorë të përkëdhelur nga fati. Nuk jemi rritur ashtu siç janë rritur ata në Evropën e viteve ’70 apo ’80 dhe e dimë shumë mirë se BE është shumë më tepër se një bankomat. E dimë se është vendi i shpëtimit tonë nga historia jonë. E kemi qartë se është këndi nga ku ne duhet të shohim historinë tonë.
Dera që është hapur duhet shfrytëzuar sa pa u mbyllur dhe jam këtu për ta konfirmuar këtë fuqimisht bashkë me gjithë të tjerët. E dimë se BE nuk është një park ku shkohet për qejf, është familje jo e lehtë për të qenë pjesë, por e vetmja familje ku ne mund të jemi përfundimisht të sigurtë dhe të kemi një të ardhme të pakërcënuar përditë nga e shkuara”- tha Rama. Versus.al
“Myslimanët i falen Allahut 5 herë në ditë”, Rama: Ne i falemi BE-së më shumë se aq
Kryeministri Edi Rama gjatë takimit të dytë të nivelit të lartë për “Shqipërinë 2030” ku ishin të pranishëm edhe përfaqësues të institucioneve të BE, nuk i kurseu batutat teksa falenderoi Këshillin Evropës për ekspertizën e dhënë gjatë hapjes së grupkapitujve të negociatave për anëtarësim.
Për të shprehur falenderimet e tij, Rama mori si shembull besimin islam duke thënë se ashtu siç besimtarët i falen Allahut, ashtu edhe Shqipëria i falet BE-së.
“Nuk e prisja që do vinte dita që do shprehesha pozitivisht për Këshillin e Evropës sepse prej vitesh më është dukur si mausoleum i të drejtave, por jemi mirënjohës për ekspertizën që kemi marrë për këtë process të komisionit. E di se Valentina nuk bëhet xheloze se BE-në ngelëm duke e falenderuar mëngjes, drekë darkë. Myslimanët i falen Allahu 5 herë, ne i falemi BE-së më shumë se 5 herë në ditë. Kështu që për një herë nuk do të mërzitet Valentina që unë po veçoj këshillin e Evropës”- u shpreh Rama. Versus.al
“Kuvendi nuk shihet si përfaqësues”, Xhafa: Shoqëria e shëndetshme nuk matet me numrin e personave që shkojnë në burg
Sot u mbajt në Tiranë takimi i dytë i nivelit të lartë “Shqipëria 2030 në BE- Rruga e Reformave” ku ishte i pranishëm kryeministri Edi Rama dhe mbajtën fjalën disa prej zyrtarëve të lartë të PS.
Mes folësve ishte edhe deputeti Fatmir Xhafa, ish-ministri i Brendshëm i cili lavdëroi punën e bërë nga institucionet e drejtësisë së re dhe e vuri theksin tek PS si ndërmarrëse e kësaj reforme.
Por Xhafa tha se shoqëria e shëndetshme nuk tregohet me numrin e personave që arrestohen, por me masat e ndërmarra për parandalimin e korrupsionit në administratë.
“Një shoqëri e shëndetshme nuk matet me sesa persona shkojnë në dyert e burgut, por me aftësinë reaguese për të parandaluar ndëshkimin penal për të pasur më pak korrupsion.
Në endër të këtij procesi reformues ishte dhe mbetet Kuvendi në rolin reformues. Ky draft synon të rrisë përgjegjshmërinë e Kuvendit në përmbushje të sfidave të integrimit. Me këtë dokument merr përgjigjen e duhur ai skepticizëm që e ka bazën tek koncepti i gabuar i ndarjes së tre pushteteve”- u shpreh deputeti.
Ai ngriti problemin e faktit që Kuvendi aktual nuk shihet si përfaqësues i qytetarëve shqiptarë për shkak të diskutimeve dhe sherreve që bëhen në sallë të cilat nuk sjellin përfitime për njerëzit e thjeshtë.
“Shqipëria është republikë parlamentare dhe Kuvendi është përfaqësues i vullnetit të popullit. Fakti është që shumë nuk e shohin kështu Kuvendin tonë, sondazhet e tregojnë. Kuvendi nuk duhet të jetë ai që qytetarët shohin kur mbizotërojnë sherrnajat politike. Kjo është tjetër përpjekje serioze e komisionit për ta fokusuar debatin parlamentar në cështjet e integrimit të vendit.
Mbas Reformës në Drejtësi ne ndërmarrim një tjetër reformë të këtyre përmasave që është produkt i vizionit dhe kapaciteteve të brendshme. Fati më ka qëlluar të drejtoj të dyja komisonet e posacme parlamentare dhe nga kjo përvojë e krijuar e them me bindjen e plotë se kemi kapacitetet për të ndërmarrë hapa të tilla që vende të ngjashëm me ne nuk kanë pasur kurajon t’i ndërmarrin”- shtoi Xhafa ndërsa nënvizoi se pas zgjedhjeve do të bëhet prezantimi i draft dokumentit analitik të përpiluar nga Komisioni i Posaçëm Antikorrupsion të cilin e ka drejtuar vetë deputeti. Versus.al
