Shalsi teksa largohet nga salla, debaton me Gazment Bardhin

Gjatë seancës plenare të sotme ka pasur edhe një përplasje mes kreut të grupit parlamentar të PD, Gazment Bardhi dhe deputetit të PS, Eduart Shalsi i cili u kërkoi ligjvënësve demokratë që nëse kanë prova për biznesmenë që përfitojnë favore të paligjshme, t’i kallëzojnë penalisht.

Me tone të ashpra, ai u bëri thirrje demokratëve që të denoncojnë kur kanë akuza të tilla, por theksoi që të kujtojnë edhe rastin e dënimit të Salianjit për kallëzim të rremë.

“Nuk kam frikë të them se pi kafe me një biznesmen si ju që në darkë shkoni e u thoni se kështu na e kërkon politika. Nëse jeni burra… se nuk jeni, shkoni dhe bëni kallëzim. Ose jeni me SPAK-un ose me ata që akuzojnë SPAK-un si organizatë kriminale. Sot në prehrin e njërit pasnesër në prehrin e tjetrit. Bëhuni burra dhe merrni një vendim kurajoz sepse për mbijetesë politike e bëni. Merrni kurajon, kallëzoni por keni dhe shembullin se çfarë ndodh me kallëzimet e rreme”- tha Shalsi.

Nga ana tjetër, Bardhi iu përgjigj duke thënë se nuk ka nevojë për kallëzim penal ndaj tij pasi tashmë kanë nisur hetimet e SPAK, pa dhënë detaje të mëtejshme. Ai akuzoi Shalsin se ka shumëfishuar pasurinë e deklaruar në mënyrë të pajustifikueshme.

“Mos ik se të dhashë të dhëna konkrete, na dole na fole për Flamurin, ska nevojë për kallëzimin tim se po të hetojnë vetë. Nuk jemi aq burra sa fshehim pasurinë pas grave. Ti dhe familja jote keni rritur mirëqenien me rrogë 1 mijë euro ti dhe 700 euro gruaja. Për atë duhet të japësh llogari aty, shpjegoju shqiptarëve se është shtuar buxheti i familjes tënde kur thua se është rritur buxheti. Para që i ke marrë nga buxheti kur ishe ministër. Nga 90 mln lekë të vjetra, e ke çuar 680 milionë lekë të vjetra. T’i kanë gjetur edhe 1.8 mln euro pasuri të fshehta, fshihi ku të duash, sepse do ua kthesh qytetarëve”- u përgjigj Bardhi. Versus.al

Jorida Tabaku në foltoren e Kuvendit

Deputetja e Partisë Demokratike, Jorida Tabaku gjatë fjalës së saj në foltoren e Kuvendit foli për ekonominë dhe bizneset të cilat sipas saj po përballen me një fushatë gjobash nga institucionet qendrore dhe ato vendore.

“Qeveria dhe bashkia janë çmendur”- u shpreh Tabaku ndër të tjera duke deklaruar se tatimet kanë nisur sot aksione për të gjobitur bizneset e vogla dhe të mesme me qëllim që t’i falin para zgjedhjeve parlamentare që mbahen vitin e ardhshëm.

“Raporti i KLSH vë re një tendencë që shfaqet sa herë që ka zgjedhje. Gjobat, është çmendur qeveria. Janë ulur tatimet sot duke vënë tatime me idenë që t’i falin vitin tjetër që ka zgjedhje. Është Ձmendur bashkia e Tiranës, me gjoba për t’i falur vitin e zgjedhjeve. Duke qënë se nuk e mbajnë shtetin normalisht me funksionin e taksave duke qenë se ka informalitet të lartë prej politikës së tyre, janë duke operuar vetëm me gjoba, vendosin gjoba pafund dhe i falin para zgjedhjeve”- u shpreh Tabaku.

Ndërsa lidhur me projektbuxhetin 2025, Tabaku tha se i shërben vetëm interesave të 5% të popullsisë, duke mos adresuar problemet e shtresës së mesme.

“Buxheti i 2025-ës nuk ofron asgjë të re. sesi të zhvillohet shtresa e mesme, sesi të vazhdojmë kur kemi ikje kaq masive duke rrezikuar të gjithë sektorët. Çlirimi i ekonomisë, mosmbytja e bizneseve me gjoba e taksa duhet të ishte elementi i parë. Kjo sjellje repressive ka sjellë këtë situatë sot”- argumentoi Tabaku.

Sa i takon pensioneve, çështjes më të përfolur të momentit, Tabaku mori si shembull krahasues pensionet në vendet e tjera fqinje me pensione shumë më të larta se Shqipëria edhe pse me ekonomi më të dobët “në letër”. Versus.al

Në seancën plenare të sotme në Kuvend ka pasur akuza të forta të ngritura nga ana e kreut të grupit parlamentar të PD, Gazment Bardhi i cili tha se kryeministri Edi Rama shfaqet në përgjime teksa ofendon përfaqësues të opozitës dhe kërkon vota.

Ai akuzoi gjithashtu ministrin e Brendshëm Ervin Hoxha duke e cilësuar atë si ushtar të bandave të Durrësit, ndërsa për vëllain e tij tha se do të ketë shumë shpejt veprime të drejtësisë duke e konsideruar atë si “hajdut të taksave të qytetarëve në OSHEE”.

“Turmë je ti dhe turma e hajdutëve që të rrethon ty duke përfshirë dhe tët vëlla që do marri në qafë veten dhe Belinda Ballukun së bashku me të. Do e mësosh shpejt përse po e them. Se është një hajdut që vjedh paratë e qytetarëve atje në OSHEE.

Nuk e di nëse lexove SMS që të kishte dërguar Edi Rama apo sms që të ka dërguar banda e Troplinëve të Durrësit , ushtar i të cilëve je ti. Je një njeri ushtar i bandave të Durrësit të cilat në marrëveshje me njëra tjetrën të kanë zgjedhur ty ministër të Brendshëm. Këtë e dinë mirë edhe kolegët e PS që ti u shkon e u falesh bandave të Durrësit. Dhe mos guxo më kurrë të më drejtohesh mua apo deputetëve të opozitës me epitete sepse ne mund të të vëmë një 20 epitete të merituara. Nuk ka punë policia e shtetit në Kuvend. Ti ose i shërben krimit ose ligjit dhe ti e ke bërë zgjedhjen, i shërben krimit”- u shpreh Bardhi.

Nga ana tjetër, Hoxha tha se Bardhi gënjen me pretendimet ndaj kryeministrit dhe ndaj tij sa i takon akuzave për lidhje me bandat e Durrësit.

“Në pikëpamjen profesionale psikokriminale që unë kam për shkak të detyrës, ti hyn te njerëzit recidivistë, përsëritës, gënjeshtar. Që ti gënjen, akuzon dhe më pas u beson atyre për të cilat ti akuzon, kjo është shumë e vërtetë. Policia e shtetit nuk ka hyrë në Kuvend, por e mbrojti nga turma e protestuesve që drejtohej nga ti”- u përgjigj Hoxha.

Bardhi tha se për shkak të ndalimit të publikimit të dosjeve hetimore në SPAK, nuk mund të flasë për detaje të tjera. Ndërkohë, kjo nuk është hera e parë që Gazment Bardhi pretendon për vepra të tilla penale nëpërmjet përgjimeve të Sky Ecc, por në denoncimin e bërë javë më parë për drejtorin e policisë së Shkodrës, pretendimet e Bardhit u rrëzuan për shkak se Edmond Sulaj ishte emëruar në detyrë në vitin 2023, ndërsa përgjimet ku Bardhi pretendonte se bandat e Shkodrës e kishin zgjedhur, datonin në vitin 2021. Versus.al

Deputeti i pavarur Agron Shehaj ka prekur sërish në Parlement çështjen e 100 kontinierëve me mbetje toksike që ndodhen në Portin e Durrësit.

Ai ka kërkuar nga Ministri i Brendshëm, Ervin Hoxha se çfarë po ndodh me këto kontinierë pasi është një çështje që ka të bëjë me shëndetin e qytetarëve. 

Por teksa flistet, deputeti Shehaj është përlasur me kryetaren e Kuvendit, Elisa Spiropali pasi kjo e fundit kërkoi t'i ndërpriste fjalën me arsyen se kjo çështje nuk ishte në procedurë.

Shehaj: Ndërkohë që ne flasim këtu, ka 11 ditë që një anije me mbi 100 kontiniere me mbetje toksike të trafikuara nga porti i Durrësit ndodhen përballë portit dhe Ministri i Brendshëm duhet të japë përgjigje se çfarë po bëhet. Opinioni publik ka nevojë të dijë se çfarë po ndodh me mbetjet toksike, ka të bëjë me shëndetin e qytetarëve.

Spiropali: Ishin për procedurë zoti Shehaj

Shehaj: Pse ju shqetëson zonja kryetare kjo çështje? 

Spiropali: Nuk kam asnjë shqetësim

Shehaj: Unë e di pse ju shqetëson se gjysma e qeverisë është e përfshirë në këtë skandal. Në trafikimin e mbetjeve toksike. Duhet të jepni përgjigjje. Duhet të informoni opinion publik lëreni broçkullat. Çfarë po ndodh me me mbetjet toksike? Prokuroria ka reaguar të premten se çfarë thotë, thotë thjesht që po mundoheni dhe kur të kemi ndonjë informacion meqë është një çështje e ndjeshme do ju informojmë. Kjo nuk ju shqetëson zoti Ministër? Mund të na informoni se çfarë dreqin po bëni? /Versus.al

Deputetët demokratë të cilët u rikthyen sot në Kuvend i kanë kërkuar Spiropalit dorëheqjen nga posti i kryetares së Kuvendit me argumentin se ka shkelur Kushtetutën duke përjashtuar nga salla për mbi një muaj 23 deputetë.

Kreu i grupit parlamentar Gazment Bardhi mori fjalën i pari duke kërkuar që pas vendimit të gjykatës Administrative që vendosi rikthimin e deputetëve në Kuvend, Spiropali të japë dorëheqjen.

“Jep dorëheqjen sepse keni dënuar deputetët me 30 ditë përjashtim pa pasur asnjë ligj vetëm me urdhër politik të Edi Ramës”- u shpreh Bardhi ndër të tjera.

Nga ana tjetër, Balla tha se kjo çështje do të trajtohet në komisionin e legjislacionit dhe kërkoi që Kuvendi t’i rikthehet normalitetit me diskutime për rendin e ditës.

“Gjykata administrative ka konsideruar se përjashtimi është i ligjshëm. Pyetja që shtrohet është: do hyjmë në rrjedhën normale të Kuvendit? Të hyjmë në diskutimet e rendit të ditës? Sepse ne e kemi thënë se nuk e diskutojmë vendimin e gjykatës edhe pse në rastin në fjalë kam komentet e mia. Gjykata Kushtetuese ka thënë se vendimet e Kuvendit nuk mund të shqyrtohen në gjykata administrative. Le të bëhet pastaj ky diskutim në këshillin e legjislacionit”- u përgjigj Balla.

Të njëjtën kërkesë ndaj Spiropalit për dorëheqje e kanë pasur edhe deputetë të tjerë si Sula, Nallbati dhe Dogjani. Ndërsa Ina Zhupa e cilësoi si të turpshëm përjashtimin e deputetëve pa pasur asnjë ligj.

“Duhet të ikni nga ky parlament me turp sepse keni përjashtuar 23 deputetë të PD thjesht sepse ashtu doni apo keni urdhër politik nga Edi Rama”- u shpreh Zhupa ndaj Spiropalit. Versus.al

Djegia e karrigeve në oborrin e Kuvendit, SPAK pushon hetimet ndaj deputetëve të opozitës

Prokuroria e Posaçme (SPAK) ka pushuar hetimet ndaj 23 deputetëve të opozitës ndaj të cilëve policia e shtetit dorëzoi denoncim duke i akuzuar për djegien e karrigeve të Kuvendit.

Ndaj tyre kishte nisur një procedim penal për shkatërrimin e pronës dhe pengim të kryerjes së detyrës. Me t’u rikthyer në sallën plenare, ndaj deputetëve të PD ka pushuar procedimi penal i referuar në SPAK nga ana e policisë.

Ndërkohë, Kuvendi ka hapur tender prej mbi 13 mijë eurosh për karrige të reja në Kuvend pavarësisht se dëmi që është caktuar të paguhet nga deputetët demokratë, Elda Hoti, Gazment Bardhi, Flamur Noka dhe Bledion Nallbati ësht1% në shifrën e 7600 eurove. Versus.al

Deputetët e Partisë Demokratike u rikthyen sot në seancë plenare duke i dhënë fund kaosit të krijuar prej më shumë se një muaji. Por pavarësisht kësaj, një prej deputetëve demokratë, Dashnor Sula është paraqitur në sallë i veshur si i burgosur me një fletë ku shkruhet “stop dënimit politik”.

Më pas këto fleta ka nisur t'i shpërndajë edhe tek deputetët e Partisë Socialiste, duke u sensibilizuar me dënimin me 1 vit burg të Ervin Salianjit për kallëzim të rremë. Versus.al

Foto e një prej seancave të mëparshme kur deputetët e PD në sallë bllokuan foltoren

Kuvendi mban sot seancë penare në orën 10:00 me rend dite miratimin e procesverbalit të seancës së kaluar e cila ishte e përfshirë nga kaosi dhe miratimin e ndryshimeve në projektvendimin për anëtarët e përherëshëm të komisioneve parlamentare.

Pritet që në seancën e sotme edhe deputetët opozitarë t’i rikthehen normalitetit parlamentar, pasi kreu i grupit të deputetëve të PD, Gazment Bardhi njoftoi për mediat pas një mbledhje në selinë blu se duhet të marrin pjesë në diskutimet për projektbuxhetin e vitit 2025 që po diskutohet prej ditësh në komisione.

Bardhi tha se mosbindja civile do të vazhdojë në terren, por argumentoi se Kuvendi duhet të funksionojë në mënyrë që të mos i lihen të gjitha në dorë qeverisë. Ai argumentoi se aksioni opozitar me kaos në Kuvend nisi si reagim i dënimit dhe më pas arrestimit të Ervin Salianjit, i cili më pas humbi edhe mandatin e deputetit.

Dje gjykata Administrative shfuqizoi vendimin e Kuvendit të Shqipërisë për përjashtimin e 24 deputetëve të Partisë Demokratike të cilët shkaktuan kaos në seancën ku u njoftua heqja e mandatit të Ervin Salianjit i cili u burgos për të vuajtur dënimin me 1 vit burg për kallëzim të rremë.

Kërkesa e opozitës mbetet krijimi i qeverisë teknike për të garantuar zgjedhje të ndershme parlamentare në 2025-ën. Kryetari i Partisë Demokratike, Sali Berisha ka paralajmëruar se deri në arritjen e këtij qëllimi do të ketë mosbindje civile në të gjithë vendin. Deri më tani janë zhvilluar dy protesta në kuadër të mosbindjes civile, ajo e 7 tetorit ku u hodhën molotovë drejt institucioneve kryesore të vendit dhe ajo e 29 nëntorit, ku u bllokuan 6 akset kryesore rrugore për tre orë radhazi duke krijuar kaos në trafik. Përfaqësuesit e PD kanë lajmëruar se protesta të tilla do të vijojnë duke u shtrirë në qytete të ndryshme të vendit dhe do të zgjasin më shumë se disa orë. Versus.al