Qindra qytetarë me në krye deputetë dhe zyrtarë të Partisë Demokratike kanë marshuar në pedonalen e qytetit të Shkodrës në heshtje në shenjë solidarizimi me masakrën e ndodhur pak ditë më parë në Dobraç ku mbetën të vrarë 3 persona dhe u plagos rëndë një tjetër.

“Qytetnimi asht ma i fort se krimi. Po na vrasin, duhet reagim”

"Armët e krimit nuk janë më të forta se rranjët e qytetnimit”

“Benet as për sy e faqe nuk mund të reagosh maj naçe”- janë disa prej shkrimeve në pankartat e vendosura para bashkisë së Shkodrës nga ku më pas u bë marshimi i heshtur në pedonale

Për marshimin foli edhe drejtuesi politik i demokratëve në qarkun e Shkodrës, Luçiano Boçi i cili akuzoi kryeministrin Edi Rama dhe qeverinë aktuale se po e mban pushtetin me ndihmën e bandave kriminale, ndërsa e cilësoi marshimin si një “reagim të fuqishëm” të shkodranëve.

“Siç e patë, siç e transmetuat, Shkodra reagoi fuqishëm, Shkodra sot foli me këtë marshim heshtje.

Dhe duhet ta dini se ndonjëherë se ulërima e heshtjes është më shurdhuese se ulërima e zërit se vjen nga brenda Shkodrës, vjen zemra e Shkodrës. Qytetarët e Shkodrës, të provokuar nga Edi Rama, nuk duan që qyteti i tyre, qyteti i kulturës, i këngës, i gëzimit, të jetë sot qytet i bandave dhe i krimit.

Shkodra nuk kërkon të imponohet nga Edi Rama në përzgjedhjet e saj politike dhe as nga bandat e krimit të organizuar, as nga banda e policisë dhe as nga banda e administratës.

Ngjarja dhe situata në Shkodër dëshmon atë që ne kemi kërkuar dhe e kemi thënë shpesh, domosdoshmëria për qeverinë teknike është reale dhe faktike.

Sot Shkodra e kërkon, sot qytetarët e Shqipërisë e kërkojnë. Nuk mundet që Rama të përsërisë pushtetin e tij me krim. Këtë bashki e mori me krim, zgjedhjet politike i mori me krim, por ja ku janë qytetarët, nuk e lejojnë të përsërisë sundimin e tij me anë të krimit”- u shpreh Boçi mes të tjerash. Versus.al

Pankarta e vendosur në hyrje të bashkisë Shkodër

Protestuesit e mbledhur mesditën e sotme në Shkodër kundër ngjarjeve kriminale në kryeqendrën e veriut, kanë vendosur edhe një pankartë në hyrje të bashkisë për Benet Becin.

“Kryebashkiak i krimit” shkruhet në pankartë, referuar ngjarjes më të fundit të ndodhur pak ditë më parë në Dobraç ku 3 persona humbën jetën.

Kujtojmë se ditën e djeshme kryebashkiaku i Shkodrës, Benet Beci u paraqit në SPAK dhe pasi doli prej Prokurorisë së Posaçme u pyet nga gazetarët nëse i ka paraqitur Ramës dorëheqjen, pyetje për të cilën, Beci nuk dha përgjigjie. Versus.al

Disa prej protestuesve të pranishëm

Ashtu siç ishte parlajmëruar në pedonalen e Shkodrës janë mbledhur qindra qytetarë të cilët i janë përgjigjur thirrjes së bërë nga kryedemokrati Sali Berisha për protestë në formë marshimi kundër ngjarjes kiminale të ndodhur së fundmi në Dobraç ku u ekzekutuan 2 persona dhe humbi jetën një grua e pafajshme.

Deputeti demokrat Asllan Dogjani foli për mediat dhe deklaroi se autorët e atentatit mafioz kanë pasur mbështetjen e policisë pasi ndryshe, nuk do të kishin lëvizur dot të armatosur në qytet.

“Deputetëve dhe ministrave socialistë, më shumë u intereson arritja e kryeministrit sesa siguria e qytetarëve shqiptarë. Kriminelët kanë soditur dhe kanë lëvizur në zonë. Fakti që ata kanë lëvizur me armë, të bind që ata nuk mund ta bëjnë një gjë të tillë pa mbështetjen e policisë. Ka raste kur drejtorë policie dalin të lidhur me grupe kriminale”- u shpreh Dogjani ndër të tjera.

Ndryshe nga 31 tetori kur protesta e thirrur pas ngjarjes dështoi, këtë herë vihet re një prani e madhe e qytetarëve, shumë prej të cilëve janë të panikosur dhe ndihen të pasigurtë për shkak të ngjarjeve kriminale që kanë përfshirë qytetin. Versus.al

Shkodër- Sot në orën 12:00 pritet të mbahet protesta e thirrur nga kryedemokrati Sali Berisha si reagim për masakrën e Dobraçit të ndodhur më 30 tetor ku u ekzekutuan me breshëri plumbash Hamza Lici dhe Arlind Bushati si dhe mbeti viktimë Flutura Basha e cila u përplas nga makina e viktimave. Burri i saj Bashkim Basha ndodhet ende në gjendje të rëndë.

Sipas njoftimit, pritet që protesta të zhvillohet në formë marshimi dhe të jetë e qetë, me qëllim kryesor dhënien e mesazheve dhe kundërshtive për ngjarjet kriminale të ndodhura në Shkodër, për të cilat PD ka akuzuar policinë për bashkëpunim me krimin dhe vetë ish-kryeministri Berisha tha se viktimat u nxorrën në pritë nga efektivët.

Një ditë pas ngjarjes së ndodhur, u njoftua një protestë në qytetin e Shkodrës por që rezultoi të ishte dështim total pasi asnjë qytetar nuk doli të protestonte duke lënë të kuptohet frikën e tyre për t’u shfaqur pasi bandat kriminale mund të hakmarren ndaj tyre.

Për ngjarjen kriminale u shoqëruan në polici 20 persona, mes të cilëve edhe Safet Bajri, i njohur si kreu i klanit Bajri. Ai tha para policisë se nuk kishte lidhje me krimin dhe se në momentin kur ka ndodhur ngjarja, ka qenë në shtëpinë e tij. Autorët të cilët kryen atentatin mafioz dyshohet të kenë qenë vrasës me pagesë nga Mali i Zi. Tre prej tyre kanë qenë në makinën “Range Rover”, njëri drejtonte mjetin ndërsa dy të tjerët hapën zjarr me kallashikov për 200 metra rresht ndaj mjetit që drejtohej nga Hamza Licit. Ky i fundit nuk arriti t’u kundërpërgjigjej, ndërsa Arlind Bushati qëlloi drejt autorëve, por mbeti i plagosur rëndë dhe më pas ndërroi jetë në spital. Në pamjet e publikuara pas atentatit, shihet se një person i tretë mund të ketë qenë në makinën e viktimave, por më pas është larguar pa lënë gjurmë. Policia po punon edhe për identifikimin dhe kapjen e tij ndërsa ngjarja e ndodhur pritet të sjellë pasoja dhe përplasje të tjera mes bandave. Versus.al