Çfarë do të gjeni në brendësi
*Sot në orën 18:00 të mbrëmjes, PD mban protestën kombëtare të thirrur pas dënimit me 1 vit burg dhe arrestimit të deputetit Ervin Salianji. Ndryshe nga herët e tjera, kësaj radhe protestuesit nuk do mblidhen para një godine të caktuar, por protesta do të jetë e shpërndarë në disa rrugë të kryeqytetit si demonstrim i nisjes së “mosbindjes civile”. *Policia e Shtetit, ka ashpërsuar masat e marra për mbarëvajtjen e protestës së njoftuar duke angazhuar 1500 efektivë policie të pajisur me maska kundragaz. Po ashtu edhe 5 autobote me ujë do të jenë në gatishmëri në rast të ndonjë përshkallëzimi të mundshëm të situatës. Këto kanë qenë porositë që drejtori i ri i Përgjithshëm i Policisë, Ilir Proda u dha vartësve të tij në policinë e Tiranës gjatë mbledhjes që zhvilloi me ta mbrëmjen e djeshme. *Kryedemokarti Sali Berisha gjatë konferencave që ka patur me mediat në kuadër të protestës që mbahet sot, ka paralajmëruar mosbindje civile deri në krijimin e një qeverie teknike, e cila sipas tij do të bëjë të mundur garantimin e zgjedhjeve të lira e të ndershme në 2025-ën. *Deputetët e kanë nisur mosbindjen civile në Kuvend, ku gjatë seancës së 30 shtatorit ku u njoftua vakanca e mandatit të humbur nga Salianji, demokratët hodhën sende të forta ndaj kryeparlamentares Elisa Spiropali dhe ministrave. Më pas jashtë godinës së Kuvendit u vunë flakën karrigeve. *Qëndrimi i tyre u përshkallëzua më 5 tetor, kur demokratët e përjashtuar nga seancat plenare tentuan të pengonin kolegët e tyre socialistë duke mos i lënë të hynin në sallë. Ndërsa Flamur Noka u vuri flakën manekinëve të veshur me uniforma burgu të cilët kishin të ngjitur foto të kryeministrit Edi Rama, vëllait të tij Olsi Rama si dhe të deputetit Fatmir Xhafaj e vëllait të tij Geron Xhafaj.
VIDEO/ Protesta e opozitës, policia rrethon kryeministrinë
Sot, PD dhe opozita do të mbajnë protestë në bulevardin përpara kryeministrisë duke filluar nga ora 18:00.
Garda e Republikës ndërkohë do të vendosë staf sigurie brenda ambienteve prej orës 16:00 si në Kryesi ashtu edhe tek Parlamenti, salla plenare për gjithçka që të mundshme.
Ndihmë i është kërkuar edhe policisë dhe zjarrfikësit për të pasur mjete ndihmëse në ambientet e brendshme të godinave. Përveç perimetrit të jashtëm të cilin e garanton policia.
Tubimi i opozitës/ Salianji mesazh nga burgu për protestuesit: Populli shkund çdo tirani!
Ish-deputeti Ervin Salianji me anë të një letër shkruar nga burgu u ka bërë thirrje të gjithë qytetarëve që t'i bashkohen protestës së sotme, 7 tetor, të opozitës.
Ai shprehet se qendresa është shkatërrimi i qeverisë dhe se të humbësh lirinë në betejë për të fituar demokracinë e qeverisje të mirë për njerëzit, është vlera më e lartë.
“Mesazh i shkruar nga burgu, Ervin Salianji i drejohet qytetarëve përpara protestës së thirrur nga opozita
Në këto orë, ata po korrin frikën që mbollën vetë!
E dimë që menduan se do na frikësonin, e sot më shumë na forcuan. Qëndresa jonë është shpërbërja e tyre! Ne e dimë që shumë nga ne sakrifikojnë e rezistojnë sepse na takon ne së pari të jemi muri që ndal të keqen. Na takon ne dhe vetëm ne të jëmi forca e shembullit.
Miq,
Të humbësh lirinë për të fituar forcën e goditjes ndaj padrejtësisë, është zgjedhje e ndërgjegjies. Të humbësh lirinë në betejë për të fituar demokracinë e qeverisje të mirë për njerëzit, është vlera më e lartë.
Të humbësh lirinë duke fituar besimin në sakrificë është forma më ë lartë e fisnikërisë civile. Të fitosh lirinë duke protestuar me besimin që shqiptarët meritojnë një tjetër zgjidhje, është rruga!
Reago, mos humb veten, as dinjitetin, as të drejtat!
Reago, sepse forca dhe e drejta janë me ty!
Reago! Reago për pagën e degraduar; për fitimin e munguar; për pronën e pafituar, për jetën e shtrenjtuar, për fjalën e cunguar, për shpresën e mpirë, për një Shqipëri më të mirë.
Populli shkund çdo tirani!
#Protesto#7Tetorora18:00″, shkruan Salianji./Versus.al
VIDEO/ Tubimi i thirrur nga opozita/ Protestuesit nisen drejt Tiranës, deputetja e PD-së: Është dita e betejës
Në orën 18:00 pritet të nis protesta e thirrur nga opozita e cila do të nisë para Kryeministrisë, ku me pas do të shtrihet në të gjitha rrugët e kryeqyetit.
Mësohet se për t'iu bashkuar kësaj proteste janë nisur nga qytete të ndryshme, si Lezha, Shkodra, Kurbini, Fieri me qindra qytetarë.
Deputetja e Partisë Demokratike, Lindita Metaliaj, në një prononcim për Syri Tv thotë se kësaj proteste nuk i janë bashkuar vetëm demokratët, por edhe socialistë.
''Sot është një ditë e madhe, është dita e betejës për çdo lezhian dhe shiptar. Në këtë protestë na janë bashkuar edhe shumë qytetarë pa parti, sepse ky është edhe qëllimi i kësaj proteste. Kjo është dita që i përket çdo shqiptari, çdo familjari. Sot është dita ku do flasin qytetarët dhe dita e përballjes me të keqen, sepse të gjithë e dinë se e keqja ka një emerë, dhe ai është Edi Rama”,– ka thënë Metaliaj.
Ndërkohë që pas godinës së Ministrisë së Brendshme janë instaluar automjete që përdoren për hedhjen e ujit me presion në rast të akteve të dhunës nga protestuesit. Efektivët po pozicionohen sipas planitë paracaktuar.
Dyert e kryeministrisë janë veshur me veshje metalike. Kamerat e sigurisë me rezolucion të lartë janë shtuar, ndërsa shtyllat janë lyer me graso në mënyrë që të bëhet e pamundur për protestuesit të ngjiten.
Në total do të jenë 1500 forca sigure të angazhuara në protestë dhe të gjithë do të kenë maska kundragaz.
Garda brenda Kuvendit dhe zjarrfikësit në gatishmëri! Zbardhen dy skenaret e protestës së PD, Tirana ‘e paralizuar’
Garda e Republikës do të vendosë staf sigurie brenda ambienteve të kryesisë së Kuvendit dhe brenda sallës ku mbahen seancat plenare. Anëtarët e gardës do të jenë të pranishëm në Kuvend që prej orës 16:00.
Ndërkohë i është kërkuar ndihmë edhe policisë e zjarrfikësve për të pasur mjete ndihmëse në ambientet e brendshme të godinave për çdo lloj skenari.
Ndërkohë, sa i takon skenarëve të mundshëm për mënyrën sesi do të jetë e organizuar protesta, grupi parlamentar i PD është treguar tepër i rezervuar në informacionet.
Por mësohet se njëri prej skenarëve të mundshëm është që protestuesit të mblidhen para kryeministrisë dhe më pas të shpërndahen nëpër të gjithë Tiranën duke bllokuar dhjetëra akse rrugore. Ndërsa skenari tjetër është që protesta të nisë e shpërndarë me praninë e protestuesve në dhjetëra rrugë të Tiranës pa e përcaktuar nëse do të ketë ndalesa në godinat e institucioneve të caktuara. Versus.al
Në prag të protestës së PD, grupi parlamentar socialist mblidhet në Kuvend! Çfarë u diskutua
Ndërkohë që pak orë na ndajnë nga protesta e thirrur nga opozita, grupi parlamentar i Partisë Socialiste është mbledhur sot në kryesinë e Kuvendit për të diskutuar lidhur me nismat e deputetëve socialistë.
Por një fokus i madh në mbledhje iu dha edhe kaosit të shkaktuar së fundmi nga deputetët opozitarë gjatë seancave plenare. Deputeti Xhemal Qefalia ka kërkuar që shërbimet e sigurisë, të bëjnë një menaxhim më të mirë të situatës së krijuar nga demokratët, duke marrë parasysh edhe faktin që në seancën e fundit plenare, pati përplasje ku deputetët e PD penguan socialistët që të hynin në sallën e Kuvendit.
Kryeparlamentarja, Elisa Spiropali tha se po hartohet një plan i ri masazh për të evituar përplasjet si ato në seancën e fundit plenare. Ndërsa porosia mbeti e njëjtë për socialistët, të vijojnë punën të pandikuar nga aksioni opozitar. Versus.al
FOTO/ Blindohen dyert e kryeministrisë, PD merr 4 orë leje për protestën e sotme
Pavarësisht se kësaj here protesta e opozitës nuk do të mbahet para kryeministrisë, dyert e godinës janë fortifikuar në kuadër të masave të ndërmarra për të ndaluar protestuesit që të depërtojnë brenda institucionit në rast se do ta tentojnë një gjë të tillë.
Ndërkohë, mësohet se opozita ka marrë leje 4 orë për protestën që do të jetë e shpërndarë në disa rrugë të kryeqytetit, por nuk dihet nëse orari do të respektohet, pasi Partia Demokratike nuk ka bërë publik skenarin e përgatitur për organizimin e këtij tubimi kombëtar që shihet si nisje e “mosbindjes civile”.
Sipas lejes që opozita ka marrë nga policia pritet të kohëzgjatja e tubimit, të jetë nga ora 18:00 deri në 22:00. Versus.al
Autobote me ujë dhe maska kundra gaz, policia ashpërson masat për protestën e opozitës, Proda u jep porositë drejtuesve të Tiranës
Policia e Shtetit ka ashpërsuar masat e marra për mbarëvajtjen e protestës së opozita mban mbrëmjen e sotme në orën 18:00 në disa akse rrugore të Tiranës.
Mësohet se drejtori i ri i Përgjithshëm Ilir Proda ka mbledhur mbrëmjen e djeshme drejtuesit e policisë së Tiranës në një takim për t’u dhënë porositë lidhur me tubimin që nga opozita është përshkruar si “nisje e mosbindjes civile”.
Në total do të jenë 1500 forca sigure të angazhuara në protestë dhe të gjithë do të kenë maska kundragaz. Po ashtu, në gatishmëri do të jenë edhe 5 autobote me ujë në raste emergjencash apo përplasjesh mes protestuesve dhe efektivëve. Versus.al
PD zhvillon sot protestën e ‘mosbindjes civile’! 15 akse rrugore të bllokuara në Tiranë, 1500 policë në gatishmëri
Në orën 18:00 të mbrëmjes së sotme nis protesta e organizuar nga Partia Demokratike me thirrjet për “mosbindje civile” deri në krijimin e një qeverie teknike. Ndryshe nga herët e tjera kur protestuesit mblidheshin zakonisht para kryeministrisë, këtë herë nuk ka një plan të qartë të publikuar nga përfaqësuesit demokratë lidhur me atë sesi pritet të jetë organizimi.
Protesta nuk do të ketë fjalime politike, ndërsa kryedemokrati Sali Berisha në një videomesazh të publikuar gjatë ditës së djeshme, e cilësoi protestën si fillim të mosbindjes civile deri në formimin e qeverisë teknike.
Ndërkohë, policia ka publikuar edhe masat për mbarëvajtjen e protestës së sotme, duke njoftuar bllokimin e 15 akseve rrugore, duke u bërë thirrje protestuesve që të distancohen nga veprimet e dhunshme. Për protesën, do të angazhohen 1500 forca policore për të garantuar rendin dhe sigurinë. Pjesë e tyre do jenë edhe forcat “Shqiponja” dhe FNSH.
Më poshtë akset rrugore që do të bllokohen:
-Kafe “Europa” - Segmenti "Ushtari i panjohur" deri te 9-katëshet
-Shkolla "1 Maji" - kryqëzimi i urës së ATSH-së deri te rruga e Elbasanit
-Kryqëzimi i Liceut Artistik deri te Fakulteti i Gjuhëve të Huaja
-Sheshi “Skenderbej”, bashkia Tiranë dhe Pallati i Kulturës
-Kryqëzimi i Librit Universitar
-Kryqëzimi i 21-Dhjetorit deri te shkolla "Sabaudin Gabrani"
-Kryqëzimet në zonën ish-Bllokut, rruga “Ibrahim Rugova” dhe rruga “Ismail Qemali”
-Rrethrrotullimi "Zogu i Zi"
-Kryqëzimi te ish-stacioni i trenit
-Kryqëzimi i urës së Taiëanit
-Kryqëzimi i rrugës së Kavajës me hyrjen e sheshit “Skënderbej”
-Kryqëzimi i urës së ish-hotel “Dajti”
-Kryqëzimi i 9-katësheve me Rrugën e Barrikadave
-Rruga "Dritan Hoxha", përpara vendit të quajtur “Kupola”
-Kryqëzimi i pallatit me shigjeta
Protesta vjen pas përshkallëzimit të aksionit opozitar që nisi me dënimin me 1 vit burg të Ervin Salianjit për kallëzim të rremë në dosjen Babale. Salianji dhe deputetët e opozitës e cilësuan këtë si një dënim politik, ndërsa paralajmëruan reagim të ashpër dhe mosbindje civile që nisi në seancën e 30 tetorit, kur deputetët shkaktuan kaos në Kuvend dhe dogjën karriget jashtë godinës. 24 prej tyre u përjashtuan nga seancat plenare, ndërsa u referuan edhe materialet në SPAK për shkatërrim të pronës me zjarr dhe goditje për shkak të detyrës.
E njëjta situatë u përsërit edhe më 3 tetor, kur deputetët e përjashtuar tentuan të hynin në sallë, por nuk u lanë nga garda. Të gjendur në këto kushte, demokratët u përoqën të ndalonin edhe deputetët e tyre socialistë që tentonin të hynin në sallë. Ndërsa në përfundim të demonstratës së tyre jashtë Kuvendit, deputeti Flamur Noka u vuri flakën 4 manekinëve të cilët kishin të ngjitur foto të kryeministrit Edi Rama dhe vëllait të tij Olsi Rama, si dhe të deputetit Fatmir Xhafa e vëllait të tij Geron Xhafa. Versus.al
