Ish-ministri i Shëndetësisë, Ilir Beqaj ka reaguar nga burgu pasi për dy ditë rresht u paraqit në mbledhjen e komisionit të ‘Sterilizimit’, por pa dëshmuar për shkak se kërkesa e tij për paraqitjen e fotove, nuk u pranua nga ana e demokratëve.

Në reagimin e bërë, Beqaj mohon të ketë kërcënuar deputetët demokratë gjatë mbledhjes e cila zgjati deri në orët e hershme të mëngjesit të sotëm. 

Reagimi i plotë i Ilir Beqajt nga qelia:

Prej mars 2024 kur është miratuar ngritja e komisionit hetimor parlamentar per koncensionet ne shendetesi, nga deputetet nismetare jam perballur me akuza, fyerje si hajdut, kriminel etj. Kam pritur ne heshtje diten e perballjes ne Komision. Diten e marte jam paraqitur ne oren 10 dhe deri ne oren 19.30 jam penguar te jap deshmine. Eshte penguar te flase edhe avokati im.

Diten e merkure jam paraqitur ne oren 10.30 sipas njoftimit dhe kam pritur deri ne oren 01.40 te dites se enjte. Edhe ne mbledhjet e ketyre dy diteve qe jane publike, me ze dhe figure, jam perballur me akuzat, talljet e fyerjet nga Vokshi, Zhupa, Koreshi dhe Hoti.

Ne ate ore te nates, duke qendruar prane salles se mbledhjes ne pritje per te deshmuar dhe duke ndjekur punimet e komisionit, kam degjuar deputeten Zhupa qe sikur une te isha send kerkonte qe meqe kishte kaluar ora 24 e dates 13 nentor te kthehesha ne qeli pasi sipas saj kjo ishte leja e dhene nga Drejtoria e Burgjeve.

Sipas Kodit te Procedures Penale edhe per nje paraburgosur ne rast marrje ne pyetje apo procesi gjyqesor qendrimi nuk varet nga orari i lejes por kohezgjatja e seances perkatese. Kam hyre ne sallen e mbledhjes vetem nje hap nga dera dhe kam shprehur haptazi revolten time per talljen deri ne kufijte e tortures qe behej prej me shume se 14 oresh. Nuk kam kercenuar apo fyer askend.

I kam treguar i revoltuar deputetes Zhupa se jam aty ne pritje prej ores 10.30. Edhe nese jam i paraburgosur nuk pranoj te me fyejne dhe te me marrin neper kembe. Kete e refuzoj, e kundershtoj dhe do te vazhdoj ta kundershtoj. Ne 8 muaj hetime te komisionit, te gjithe deshmitaret kane provuar qe dy koncensionet objekt hetimi jane histori suksesi. Deshtimin politik deputetet e opozites nuk i lejoj ta percjellin ne neperkembje te dinjitetit tim. Versus.al

Një incident ka ndodhur gjatë orëve të para të mëngjesit në kryesinë e Kuvendit ku ende vijonte mbledhja maratonë në të cilën pritej dëshmia e ish-ministrit Ilir Beqaj.

Ky i fundit, teksa priste jashtë ambienteve të komisionit, mori guximin të hyjë në sallë pa e kërkuar askush së bashku me avokatin e tij duke shprehur indinjatë për vonesën.

Kjo solli reagimin e menjëhershëm të kryetares së komisionit Albana Vokshi e cila u kërkoi efektivëve ta çonin me urgjencë në qeli ish-ministrin e arrestuar për abuzim me fondet e “SASPAC”.

“Policia urgjent të kthejë në qeli Ilir Beqajn, policia e burgjeve të njoftohet urgjent dhe ta çojë tani. E kanë liruar që në orën 12, e kanë mbajtur peng këta. Dhe guxon të hyjë në atë mënyrë në sallën e mbledhjeve të komisionit.  Urgjent sekretaria, mos më rrini. A mund ta njoftoni shpejt policinë”- u shpreh Vokshi ndër të tjera.

Mesnata ishte afati i fundit i komisionit, ndërsa sot duhet që të dilet me një raport për punën e arritur me pyetjen e dëshmitarëve dhe shqyrtimin e fakteve për gjetjen e shkeljeve në koncesionet e dhëna në Shëndetësi për “Sterilizimin” dhe “Check Up”-in. Versus.al

Dy ditët e fundit të afatit për mbylljen e komisionit hetimor të koncesioneve në Shëndetësi, u konsumuan pa sjellë asnjë rezultat në pyetjen e ish-ministrit të Shëndetësisë Ilir Beqaj i cili u nxorr dy herë nga burgu për të shkuar në kryesinë e Kuvendit.

Sot është dita e fundit e veprimtarisë së komisionit, pasi socialistët dje rrëzuan kërkesën e demokratëve për shtyrje të mëtejshme.

Mbledhja e komisionit u mbyll në orën 02:20 pa pasur dëshminë e Beqajt i cili që në ditën e parë ngulmoi që në deklaratën kontekstuale të tij të përdorte foto të cilat i kishte printuar për të treguar sesi kishte qenë gjendja e mjeteve spitalore para koncesionit të ‘Sterilizimit’.

Një kërkesë e tillë nuk u pranua nga demokratët të cilët vijuan përplasjen me deputetët e mazhorancës. Një ndër kërkesat e deputetëve të PD ishte edhe paraqitja e kryeministrit Edi Rama dhe biznesmenes Vilma Nushi për t’u marrë në pyetje si dëshmitarë. Socialistët nuk u pajtuan me këtë kërkesë dhe për pasojë mbledhjet e të dy ditëve u bazuan vetëm në batuta, akuza dhe përplasje mes deputetëve pa arritur asnjë rezultat tjetër.

Komisioni i Sterilizimit ka nisur punën rreth 7 muaj më parë pas marrëveshjes së arritur mes PS dhe PD për ngritjen e komisioneve hetimore të cilat kishin qëllim hetimin e atyre të cilat opozita i cilësonte si “afera korruptive”.

Afati për daljen e një raporti përfundimtar mbi punën e komisionit, u shty për dy herë për shkak të kaosit të krijuar nga PD. Ndërsa konferenca e kryetarëve nuk ka miratuar kërkesën e opozitës për të shtyrë për të tretën herë komisionin me justifikimin se ende nuk janë marrë në pyetje si dëshmitarë kryeministri Edi Rama dhe sipërmarrësja Vilma Nushi.

Prej tre vitesh, SPAK po heton koncesionin e Sterilizimit dhe ka lëshuar edhe disa masa sigurie për arrest me burg ndaj ish-zv ministrit të Shëndetësisë Klodian Rrjepaj dhe biznesmenit Ilir Rrapaj kompania “SanService” e të cilit u shpall fituese e koncesionit. Të dy këta të fundit kanë dëshmuar më herët në komision. Ndërsa për ish-ministrin Ilir Beqaj është caktuar masa “detyrim paraqitje” për dosjen e tenderit të Sterilzimit të miratuar në 2015-ën. Versus.al