Pak pas mbylljes së protestës së Partisë Demokratike, e cila paralizoi sot kryeqytetin duke bllokuar pesë nyje kyçe të qarkullimit, mësohet se në komisariatet e Tiranës janë shoqëruar 44 persona.

18 protestues janë shoqëruar tek Komisariati Nr. 1, 5 persona të tjerë janë dërguar tek Komisariati Nr. 3 dhe 21 nga pjesëmarrësit në protestë ndodhen te Komisariati Nr. 6.

Opozita bllokoi për tre orë aksin rrugor përpara Bashkisë së Tiranës, Rrugën e Elbasanit, Sheshin Willson, Zogun e Zi dhe Pallatin me Shigjeta.

Protesta u shoqërua sakaq me tensione dhe përplasje me policinë, me forcat e rendit që përdorën gaz lotsjellës dhe ujë me presion për të shpërndarë grumbullimet te Bashkia e Tiranës dhe sheshi Willson.

Pasi e akuzoi se ka nxjerrë në pritë Gjergj Mehmetin në vitin 1997 për ta vrarë bandit, Flamur Noka u përball me zv/drejtorin e Policisë së Shtetit, Sokol Bizhga te kryqëzimi i rrugës së Elbasanit, ku Sekretari i Përgjithshëm i PD printe grupin e protestuesve që bllokuan qarkullimin.

Noka i thotë Bizhgës se ai i shërben bandave të krimit, ndërsa ky i fundit ia ktheu duke thënë se për 34 vite i ka shërbyer vetëm shtetit shqiptar, pavarësisht se cila parti ka qenë në pushtet.

Noka: Unë ty personalisht do të të shtyp në çdo aspekt!

Bizhga: Dëgjo! Unë i kam shërbyer 34 vite këtij shteti, majtas dhe djathtas. Unë jam në punë vet.

Noka: Ti i shërben bandave dhe jo pushtetit. Ti i shërben krimit. Ti nuk ke lidhje me fytyrën e këtyre policave. Ti je pasqyrë e një krimi. Ti je pasqyrë e horrave, s’je polic ti.

(Protestues në distancë: Si e përdor dhunën mor burrë. A je familjarë, a ke kalamaj, si e përdor dhunën ti)

Bizhga: E ke gabim ti!

(Protestuesi në distancë: Legen. Je duke dalë në pension dhe përdor dhunën. Si mor përdor dhunën? A ke nën, a ke babë, a ke kalamaj ti, a ke motër mor...)

Ka përfunduar mosbindja civile e opozitës në kryeqytet.

Pas tre orësh mosbindje civile, protesta ësjhtë mbyllur në të gjitha pikat kyçe ku ishin vendosur protestuesit e opozitës.

Në disa zona ka pasur përplasje, dhunë, përdorim të autoboteve me ujë apo gazit lotsjellës nga policia me qëllim shpërndarjen e protestuesve.

Ndërkohë në disa zona të tjera nuk ka pasur makina ujë apo gaz lotësjellës.

Ka pasur disa shoqërime nga ana e policisë të protestuesve të dhunshëm, ndërsa edhe disa të moshuar kanë marrë ndihmën mjekësore nga autoambulancat pasi kanë pasur shqetësime gjatë protestës.

Protestuesit bllokuan kalimin e automjeteve në pesë zona kryesore të kryeqytetit: Rruga e Elbasanit, Bashkia e Tiranës, Pallati me Shigjeta, Sheshi Wilson dhe Rrethrrotullimi i Zogut të Zi.

Policia u tha protestuesve se bllokimi i qarkullimit rrugor konsiderohet vepër penale.

Në Rrugën e Elbasanit, protestuesit u udhëhoqën nga Sekretari i Përgjithshëm i PD-së, Flamur Noka. Ai debatoi dhe u përplas me efektivët që i kërkuan protestuesve të lironin rrugën.

Në Sheshin Wilson, kreu i grupit parlamentar, Gazment Bardhi hodhi dyshime mbi identitetin e efektivëve të policisë që ishin pa numër identifikimi.

Dhjetëra protestues u shoqëruan nëpër komisariatet e policisë ndërsa atyre që humbën ndjenjat ju dha ndihma e parë mjekësore.

Protesta e sotme zgjati nga ora 17:00 deri në orën 20:00.

Është liruar kryeqëzimi i parë i bllokuar nga protestuesit e opozitës.

Sheshi Willson është bërë i kalueshëm për makinat, pasi drejtuesi i grupit të deputetëve aty, kanë vendosur të largohen nga atu.

Protestuesit nga sheshi kanë nisur një marshim dhe po zhvendosen drejt Bashkisë së Tiranës.

Pasi një autobot me ujë nisi t’i shpërndajë, kreu i grupit të PD, Gazment Bardhi bëri thirrje që të zhvendosen drejt Bashkisë së Tiranës.

Bardhi ishte ai që printe protestuesit drejt Bashkisë së Tiranës, ndërsa gjatë ecjes dallohet teksa koordinon protestën me telefon.

Të njëjtën gjë edhe Enno Bozdo, i cili dallohet teksa qëndron në telefon gjatë ecjes, ndërsa në krah të tyre është deputete Luan Baçi, Erisa Xhixho e Ilda Dhori e Bledion Nallbati.

Përplasja mes protestuesve dhe policisë ka vazhduar edhe tek sheshi ‘Willson’.

Siç edhe shikoni në pamje ka qenë sekretari i Përgjithshëm i PL-së, ai i cili është ngjitur mbi makinën e policisë me ujë.

Pas disa minutash përballje mes dy palëve, aty është hedhur gazlotësjellës dhe më pas edhe ujë në tentativë për të larguar protestuesit dhe liruar rrugën.

Vijon e tensionuar situata në të gjitha pikat ku opozita po zhvillon protestë. Para bashkisë së Tiranës, aty ku është protestuar prej disa javës, policia ka pasur dhe reagimin më të ashpër ndaj protestuesve.

Policia ka afruar autobotin me ujë, duke hedhur ujë me lëndë djegëse ndaj qytetarëve me qëllim shpërndarjen e tyre.

Ndërkohë që nga uji i hedhur me lëndë djegëse, piper dhe spec e kanë pësuar dhe fëmijët, që ndodheshin në protestë.

Një nga qytetaret pjesëmarrje në protestën e opozitës është ulur këmbëkryq në rrugën në krah të Bashkisë së Tiranës, përballë forcave të shumta të policisë dhe autobotit që shpërndau turmën duke hedhur ujë.

Për mediat ajo është shprehur se ka dalë të protestojë kundër qeverisjes së Edi Ramës dhe shpopullimit masiv, pasi siç tha fëmijët i ndodhen në emigrim.

“Erion Veliaj dhe Edi Rama hajdutët. Na kanë shit me ujë, na kanë shit gjithçka. S’ju vjen turp shteti. S’ju vjen turp Edi Ramës, Erion Veliajt me i bo këta fëmijë kështu, me bo nëna 80 –vjeçare.

Unë nuk luj vendit.

S’jam kam lëviz hiç edhe me ardh qikjo makinë qitu. Protestoj për ikjen e Edi Ramës dhe klikën e tij. Me hajdutë, kriminelë.

Të poshtrit. E shiti Shqipërinë, fëmijët tanë janë në botë i këna mall me i pa. Çka me pas ma, tash me na qit dhe ujë me spec, me piper, gruas 80–vjeçare. Turp, turp, turp!”, tha ajo.

Për shkak të bllokimit nga protestuesit, policia po lejon kalimin e automjeteve kundravajte tek Zogu i Zi. 

Në këtë pjesë tw bllokuar nga protestuesit ndodhen deputetët Oerd Bylykbashi, Albana Vokshi, Jozefina Topalli, Ferdinand Xhaferri, Andia Ulliri, Petrit Doda, Flamur Hoxha, Isuf Cela, Asllan Dogjani.

Policia u ka kërkuar protestuesve të lirojnë rrugës për të mos paralizuar qarkullimin e automjeteve, duke përsëritur se kjo është kundravajtje penale. Versus.al

Pas përplasjeve fizike përpara Bashkisë së Tiranës, policia përmes autobotit ka shpërndarë ujë.

U raportua se nga presioni i ujit, disa protestues kanë rënë në tokë.

Tensioni është duke vijuar, ndërsa punonjësit e policisë ndodhen në vendngjarje.

Deputeti i PD Oerd Bylykbashi është përfshirë në një përplasje verbale me dy punonjës civil të policisë pranë Zogut të Zi.

Dy protestues janë shoqëruar nga punonjësit e policisë pas bllokimit të rrugës në këtë zonë, e cila ka sjellë edhe përplasjen verbale.

Bylykbashi ka kërkuar të dijë se kush ka qenë personi që ka shoqëruar protestuesit, ndërsa punonjësit e policisë kanë kërkuar nga deptuteti që mos të preken nga ai.

Bylykbashi ka paralajmëruar policët që të mos shoqërohen protestuesit, ose “do të merret me ta”, ndërsa debati mes tyre ka vijuar më tej.

Pjesë nga përplasja:

Polici: Hiqi duart! Mos prek punonjësin e policisë me dorë.

Bylykbashi: Mos guxoni të shoqëroni protestuesit, ose…

Polici: Ore mos prek punonjësin e policisë!

Bylykbashi: Do merremi ne me juve pastaj!

Polici: Merru sa të duash!

Bylykbashi: Kur të merrem unë nuk ju ikën shejtani pastaj!

Një protestues ka pësuar dëmtime gjatë protestës tek rruga e Elbasanit.

Siç edhe duket në foto, qytetari është shtrirë në tokë, dhe protestuesit e tjerë i kanë shkuar në ndihmë.

Më pas ka ardhur dhe autoambulanca e cila ka marrë të lënduarin.

Përplasje e fortë mes deputetëve të opozitës dhe policisë.

Sapo ka nisur protesta tek rruga e Elbasanit, ka pasur një ndërhyrje të fortë nga ana e policisë, duke sjellë edhe një përplasje fizike mes sekretarit të Përgjithshëm të PD-së, Flamur Noka, deputetit Dash Sula dhe policisë.