Një çantë ikonike Hermès Birkin, e cila dikur i përkiste vetë Jane Birkin, u shit për një shumë rekord prej 7 milionë eurosh (rreth 10.1 milionë dollarë me taksa) gjatë një ankandi të shtëpisë Sotheby’s në Paris.
Pas këtij transaksioni spektakolar fshihet një histori e veçantë: fituesi ishte Shinshūke Sakimoto, ish-futbollist i kategorisë së parë në Japoni, i kthyer tashmë në biznesmen miliarder të tregut të sendeve luksoze të përdorura.
Sakimoto, sot 43 vjeç, është drejtori i kompanisë Valuence Holdings, e cila e bleu çantën jo për përdorim personal, por si pjesë e një strategjie të mirëfilltë marketingu dhe vlerësimi marke.
“Ishte blerja më e shtrenjtë që kam bërë ndonjëherë për një send të vetëm,” deklaroi ai për CNN. “Ishte emocionuese, por më la me një ndjesi të fortë ankthi.”
Gjatë ankandit 10-minutësh, Sakimoto dha udhëzime të drejtpërdrejta në telefon bashkëpunëtores së tij që të përgjigjej brenda 3 deri në 5 sekonda pas çdo oferte konkurrente.
Ai e përshkroi garën si një betejë psikologjike ndaj “armiqve” të tij – pjesëmarrës të tjerë që luftonin për çantën legjendare. "Ne projektuam taktikisht çdo lëvizje për të thyer moralin e tyre," tha ai.
Por për çfarë e do një kompani çantën më të shtrenjtë në botë?
Për Sakimoto, çanta është më shumë një “vepër arti” sesa një aksesor mode.
Ajo do të shërbejë si simbol publik dhe mjet promovues për Valuence Holdings.
Ai beson se ekspozimi global nga kjo blerje do të kthehet në dhjetëra milionë dollarë në vlerë reklamuese gjatë dekadës së ardhshme. Çanta pritet të ekspozohet për publikun në qytete të ndryshme të botës, përfshirë edhe muzeume prestigjioze.
“Qëllimi ynë nuk është që kjo vepër arti të bëhet pronë personale e të pasurve,” theksoi ai, “por të krijojmë një model të ri pronësie – për kompanitë dhe për shoqërinë – në mënyrë që të ndajmë objekte me vlerë me të gjithë.”
Nga fusha e futbollit në skenën globale të luksit, historia e Sakimoto-s tregon se vizioni, kur kombinohet me guxim dhe strategji, mund të thyejë rekorde – edhe në një ankand për një çantë./Versus.al
