Trupi i një alpinisti amerikan - i cili u zhduk 22 vjet më parë ndërsa ngjitej në një majë me dëborë në Peru - është gjetur i mumifikuar pasi u ekspozua nga shkrirja e akullit të shkaktuar nga ndryshimet klimatike, tha policia të hënën.
William Stampfl u raportua i zhdukur në qershor 2002, në moshën 59-vjeçare, kur një ortek e “varrosi” në malin Huascaran, më shumë se 6,700 metra i lartë. Përpjekjet asaj kohe të kërkim-shpëtimit ishin të pafrytshme.
Trupi i alpinistit doli pas shkrirjes së akullnajave të shkaktuara nga ndryshimet klimatike, të cilat ekspozuan kufomën.
Ky është një fenomen që po prek fuqishëm Perunë. Vendi i Amerikës së Jugut, për shkak të ndryshimeve klimatike, ka humbur më shumë se gjysmën e sipërfaqes së tij akullnajore në gjashtëdhjetë vitet e fundit.
Trupi i Stampfl, si dhe rrobat, kapelja dhe çizmet e tij ishin ruajtur mirë nga i ftohti, sipas imazheve të shpërndara nga policia.
Pasaporta e tij u gjet midis gjërave që kishte me vete, duke lejuar policinë të identifikonte trupin.
Malet e Perusë verilindore, Huascaran dhe Cashan, janë të preferuarat e alpinistëve nga e gjithë bota.
Në maj, trupi i një alpinisti izraelit u gjet aty gati një muaj pasi u zhduk.
Dhe muajin e kaluar, një alpinist italian me përvojë u gjet i vdekur pasi u rrëzua teksa po përpiqej të ngjitej në një majë tjetër të Andeve.
