Stilisti italian i modës me famë botërore, Giorgio Armani, ka ndërruar jetë në moshën 91-vjeçare.
Në muajt e fundit, shëndeti i tij ishte përkeqësuar dhe ai ishte detyruar të anulonte një sërë angazhimesh profesionale.
Pavarësisht suksesit të tij global si drejtues i një shtëpie mode me një xhiro vjetore prej rreth 2.3 miliardë eurosh, stilisti kishte rrëfyer se ishte "pak indiferent" ndaj dashurisë në një intervistë prekëse që dha vetëm një vit para vdekjes së tij.
Stilisti italian i modës kishte marrëdhënie si me burra ashtu edhe me gra, por heshtte për seksualitetin e tij dhe komentoi marrëdhëniet e tij vetëm disa herë gjatë jetës së tij.
Para vdekjes së tij , stilisti kishte një marrëdhënie të ngushtë me partnerin e tij të biznesit dhe krahun e djathtë, Leo Dell'Orco, dhe kishte folur publikisht për "dashurinë e tyre".
Megjithatë, në një intervistë të rrallë me gazetën italiane Corriere della Sela vitin e kaluar, stilisti pranoi se ndihet "pak indiferent" ndaj dashurisë.
Sipas Daily Mail , komentet e tij me shumë gjasa ishin në lidhje me partnerin e tij prej shumë kohësh Sergio Galeotti, i cili vdiq me AIDS-in në vitin 1985, duke e lënë stilistin të ndihej sikur kishte humbur "një pjesë" të vetes.
Ishte Galeotti ai që e inkurajoi gjigantin e modës të hynte në industri pasi u takuan për herë të parë në vitin 1966, me Armani-n që lançoi markën e tij në vitin 1975.
"Në jetën time kam pasur gra dhe ndonjëherë burra"
Giorgio Armani njihej për privatësinë e tij, duke dhënë vetëm disa intervista që hedhin dritë mbi lidhjet e tij gjatë viteve. Siç e përmblodhi shkurtimisht në një intervistë të vitit 2000 me Vanity Fair , ai tha: “Në jetën time kam pasur gra dhe ndonjëherë burra.”
Në një intervistë me gazetën italiane Corriere della Sela vitin e kaluar, ai zbuloi se kishte bërë seks me një vajzë për herë të parë në jetën e tij në shkollë, por pranoi se “nuk ishte pikërisht përvoja më e mirë”. Edhe pse nuk specifikoi se kur, ai tha se u dashurua për herë të parë me një burrë që ishte një nga udhëheqësit në një kamp veror.
"Nuk e kuptoja çfarë ishte, nuk bëja dallim midis burrave dhe grave. Ishte një tërheqje që ndjeva, diçka e bukur: mezi prisje të ishe pranë tij, të të përkëdhelte... Një ndjenjë e mrekullueshme. Nuk ia kam thënë kurrë askujt këto gjëra. Është një kujtim shumë prekës" është shprehur ikona e modës.
"Një kuptim i shkëlqyer për jetën dhe pjesën tjetër të botës"
Partneri i tij prej kohësh ishte Sergio Galeotti, të cilin e takoi me pushime në Toskanë në vitin 1966, kur ishte 32 vjeç. Galeotti ishte 11 vjet më i ri se ai dhe ata u lidhën menjëherë. Në një intervistë me Vanity Fair, Armani rrëfeu: "Ai më bëri menjëherë babanë e tij - unë menjëherë u ndjeva përgjegjës për të dhe jetën e tij. Ishte vërtet sikur ai ishte fëmija im."
Shpejt, marrëdhënia e tyre u zhvillua në një "dashuri të thellë" dhe ai shtoi: "Termi 'dashuri' është shumë kufizues. Ishte një mirëkuptim i madh ndaj jetës dhe pjesës tjetër të botës."
"Kur vdiq Sergio, vdiq edhe një pjesë e imja"
Sergio ishte njeriu që shoqëroi Armanin në Milano dhe e inkurajoi të hynte në botën e modës, duke i thënë se kishte "potencial". Megjithatë, në vitin 1985, Sergio vdiq nga një sëmundje e lidhur me AIDS-in. Armani kujtoi: "Kur vdiq Sergio, vdiq edhe një pjesë e imja. Duhet të them se e përgëzoj pak veten, sepse durova një dhimbje kaq të fortë."
Edhe pse e kishte deklaruar veten "indiferent" ndaj dashurisë, Armani kishte thënë se personi më i afërt me të ishte Leo Del Orco, me të cilin jetoi për shumë vite. Si krahu i djathtë i Armanit dhe kreu i stilit për meshkuj, Del Orco, 72 vjeç, ishte qartësisht i afërt me të, por etiketa e marrëdhënies së tyre mbeti e paqartë.
Giorgio Armani dhe Leo Del Orco
Në biografinë e Armanit të vitit 2022 "Per Amore", ai dha një shpjegim të rrallë të marrëdhënies së tyre: "Emri i tij i vërtetë është Pantaleo... Ai është personi të cilit i kam besuar mendimet e mia më intime, personale, profesionale dhe të tjera, të cilat ai i ka mbajtur për vete me shumë diskrecion. Faleminderit, Leo!"
Armani nuk ishte i martuar, por kishte zbuluar se mbante një "unazë madhështore me diamant". Ai nuk pati kurrë fëmijë, por ishte shumë i lidhur me mbesën e tij, Robertën, vajzën e vëllait të tij të ndjerë, Sergio.
Giorgio Armani vdiq vetëm disa javë para festimit të planifikuar të 50-vjetorit të kompanisë, i cili ishte planifikuar për Javën e Modës në Milano. Ai ishte CEO dhe drejtor krijues deri në vdekjen e tij, dhe në intervistën e tij të fundit fundjavën e kaluar ai tha: "Dobësia ime më e madhe është se unë kontrolloj gjithçka".
I vetëshpalluri punëmalik, i cili ishte i përfshirë në çdo aspekt të sfilatave, kishte zbuluar më parë se keqardhja e tij më e madhe në jetë ishte "kushtimi i shumë orëve për të punuar dhe jo kohë e mjaftueshme për të kaluar me miqtë dhe familjen".
"Mbreti Giorgio"
Giorgio Armani ishte një nga stilistët më me ndikim dhe më të famshëm në botë të fundit të shekullit të 20-të. Armani ishte sinonim i stilit dhe elegancës moderne italiane. Ai kombinonte talentin e një stilisti me mprehtësinë e një biznesmeni, duke drejtuar një kompani me një xhiro vjetore prej rreth 2.3 miliardë eurosh.
Ai kishte qenë i sëmurë për disa kohë dhe u detyrua të tërhiqej nga shfaqjet e ekipit të tij në Javën e Modës për Burra në Milano në qershor, hera e parë në karrierën e tij që kishte humbur një nga shfaqjet e tij.
I njohur si "Re Giorgio" - Mbreti Giorgio - stilisti mbikëqyrte çdo detaj të koleksioneve të tij dhe çdo aspekt të biznesit të tij, nga reklamat deri te stilimi i modeleve para se të ecnin në pasarelë. Ai arriti të krijonte një perandori me vlerë mbi 10 miliardë dollarë, e cila, përveç veshjeve, përfshinte aksesorë, orendi shtëpiake, parfume, kozmetikë, libra, lule dhe madje edhe çokollata, duke e renditur atë midis njerëzve më të pasur në botë në listën e Forbes./Versus.al
