Real Madridi po kalon në një situatë aspak të lehtë, kjo për shkak të dëmtimeve të shumta në mbrojtje.
Së fundmi, ata humbën shërbimet e Eder Militaos pasi lojtari i Brazilit këputi ligamentin e gjurit në ndeshjen ndaj Osasunës.
Kjo do të thotë se Carlo Ancelotti ka vetëm një opsion në qendër të mbrojtjes momentalisht dhe ai është Antonio Rudiger.
Rikthimi i David Alabas duket se do të marrë kohë, teksa Tchouameni i cili shpeshherë aktivizohej në atë pozicion, ka mbetur gjithashtu jashtë fushave, shkaku i dëmtimit.
Sipas një raportimi të fundit nga Marca, ish-kapiteni i Real Madridit, Sergio Ramos, ka kontaktuar klubin në disa raste për t’i ofruar shërbimet e tij, por gjiganti madrilen ka qenë i vendosur në vendimin e tyre për të mos e përfshirë atë në planet e tyre.
Ramos momentalisht është pa klub dhe po vazhdon të stërvitet individualisht duke pritur për lëvizjen e tij të radhës.
Pavarësisht përpjekjeve të tij për të qëndruar në formë të lartë fizike, Real Madridi duket se nuk është i gatshëm të ribashkohet me mbrojtësin veteran.
38-vjeçari tani do të konsiderojë ofertat që ka në tavolinë, ndërsa kujtojmë se më herët ishte raportuar se për të interesim ka shprehur Boca Juniors.
