Një sfidë e re dhe e rrezikshme ka filluar të bëjë jehonë në platformën TikTok, dhe të rinjtë shqiptarë duhet të tregojnë kujdes. Ky fenomen po përhapet shpejt dhe është i rëndësishëm për t'u monitoruar nga prindërit dhe autoritetet për të parandaluar çdo incident të mundshëm.
Ky paralajmërim vjen nga nga kryetarja e Autoritetit të Medias Audiovizive, Armela Krasniqi, e cila ka nxjerrë një njoftim në rrjetet e saj sociale për prindërit dhe adoleshentët.
Fenomen i rrezikshëm, i quajtur "Sfida e Supermenit", ka çuar në spital dhjetëra adoleshentë në Rumani, shumë prej të cilëve kanë pësuar fraktura të rënda. Kjo sfidë përfshin hedhjen përpara me njërën dorë, duke imituar personazhin e njohur të fëmijëve, Superman, me shpresën se do të kapen nga shokët. Ky trend ka shkaktuar shqetësim në mesin e prindërve dhe autoriteteve për sigurinë e të rinjve.
“Dhjetëra adoleshentë në Rumani kanë pësuar fraktura dhe trauma të rënda pas një tendence në TikTok të quajtur, ‘Sfida e Supermenit’.
Sfida qëndron tek hedhja përpara me një krah të zgjatur, si personazhi për fëmijë, Superman, për t’u kapur, ose jo, nga miqtë.
Nga “loja” e rrezikshme brenda një dite, kanë përfunduar në spital me trauma të rënda, mbi 20 adoleshentë.
Prindër bëni kujdes! Shpjegojuni fëmijëve tuaj rrezikun që fshihet pas tendencave të tilla online!
Fëmijë dhe adoleshentë, mos bini pre e sfidave të tilla. Përveçse rrezikoni shëndetin dhe shpesh jetën, nuk ka asgjë argëtuese në to”, shkruhet në paralajmërimin e bërë nga kryetarja e AMA-s.
