Ylber Ramadani, mesfushori i kombëtares shqiptare, pjesë e Lecces në Serie A dha një intervistë për Sky, ku foli mbi sfidën e parë të “Euro 2024”, përballjen me Italinë duke e cilësuar si ndeshje të veçantë për të.
“Në Itali ka shumë shqiptarë, jemi shumë të lumtur që përfaqësojmë tifozët tanë në këtë Evropian.
Italia? Ne zbresim në fushë vetëm për të fituar, gjithmonë. Mister Sylvinho ka ndërtuar një grup të madh, jemi shumë të bashkuar. Kemi bërë një fazë kualifikuesesh fantastike, shpresojmë shumë që ta përsërisim edhe në Evropian”, tha Ramadani duke u ndalur më pas te dueli në mesin e fushës:
“Ne i njohim shumë mirë lojtarët e Italisë, ne do të bëjmë gjithçka për të marrë atë rezultat që dëshirojmë. E ardhmja? Më mirë të mos flas, pasi më merr drejtori në telefon. Jam totalisht i përqendruar tek Evropiani, të shohim më pas në përfundim të Evropianit”, theksoi duke bërë në fund edhe një koment për Armando Brojën:
“A më ka kërkuar këshilla mbi Italinë? Jo, ne jemi të përqendruar vetëm tek Evropiani. Broja është një lojtar i fortë që mund të luajë në çdo skuadër në botë, ka një potencial shkatërrues”, u shpreh Ramadani për Sky.
