Temperaturat në muajin Gusht pritet që të kenë një rënie graduale në krahasim me muajin Korrik që kanë prekur ekstremin.
Sinoptikanja Lajda Porja tha në një lidhje direkte se gjatë muajit Gusht do të jenë vetëm 1 ose 2 ditë që do t’i afrohen temperaturës 39-40 gradë.
Kjo do të ndodhë vetëm në dy apo tre qarqe të vendit, dhe jo në të gjithë territorin.
Sipas Porjas muaji gusht do të ketë temperatura deri diku të përballueshme, pra nuk do të prekin vlerat ekstreme.
Temperaturat mesatare gjatë këtij muaji do të variojnë në vlerat 34-35 gradë.
“Nuk parashikohet që të kemi një valë e cila të qëndrojë gjatë. Do të kemi 1 ose 2 ditë ku termometri do i afrohet 39 apo 40 gradë, por do të jenë disa zona, 2 ose 3 qarqe dhe jo i gjithë territori shqiptar, apo e gjithë vija bregdetare apo zona e ulët. Ndërkohë që Korriku e mbajti mjaft të ngarkuar me gati 3 javë me temperatura mjaft të larta.
Pra, nëse do specifikoja me një fjali, Gushti do të jetë i nxehtë dhe jo shumë i nxehtë me vlera ekstreme. Do të kemi vetëm 1 ose 2 ditë ku do të kapërcehet në disa zona, megjithatë pjesa tjetër do të jetë, 34-35 gradë. Përgjithësisht, këto do të jenë vlerat e Gushtit. Parashikohet që të paktën deri nga data 15 nuk është se presim të kemi një sistem të mirëfilltë vranësirash dhe reshjesh që përfshijnë të gjithë territorin, por vetëm rrebeshe të izoluara që zgjasin jo më shumë se 30 apo 40 minuta”, tha sinoptikanja Lajda Porja./ Versus.al
