Ndonëse i lënduar, kapiteni i Zvicrës, Granit Xhaka, luajti në çerekfinalen e Euro 2024 ndaj Anglisë.
“Kam pasur një rezonancë magnetike të hënën dhe jam diagnostikuar me një fije muskulore të këputur në muskulin aduktor’, ka thënë Xhaka pas ndeshjes me Anglinë, të shtunën.
Anglia avancoi në gjysmëfinale duke fituar me penallti. Xhaka ushtroi i vetëm deri të enjten, ndërsa vetëm të premten u bashkua me grupin e lojtarëve.
Në ndeshje ishte shumë aktiv, por i kanë munguar pasimet e gjata.
“Tani mund të flasim hapur dhe me sinqeritet. Disi ia dola të luaj 120 minuta”, ka shtuar 31-vjeçari.
Xhaka ka thënë se nuk kishte dhembje gjatë stërvitjes me përfaqësuese, të premten. Por lëndimi kishte ndikimin në paraqitjen e Xhakës. Pos pasimeve të gjata nuk ka mundur të provojë as goditjet nga distanca.
Por pse Xhaka shtrëngoi dhëmbët dhe luajti ndonëse i lënduar?
“Kam ndier se i duhem ekipit. Kam shkuar përtej kufijve dhe do të doja të luaja edhe të mërkurën”, ka vazhduar kapiteni i Zvicrës.
Xhaka është lavdëruar shumë nga trajnieri i Zvicrës, Murat Yakin.
“Ai ishte në seancën e fundit stërvitore, të premten, por jo me intensitet të plotë. Është mrekulli që ishte në fushë ndaj Anglisë”, ka thënë Yakin.
Përkushtimi i Xhakës ishte i jashtëzakonshëm, ka vazhduar trajnieri.
“Ai udhëhoqi si lider i vërtetë. Udhëhoqi ekipin deri në fund”.
Shumica e aksioneve të Zvicrës sërish janë nisur nga Xhaka. Por pasimet e tij këtë herë ishin të shkurtëra, si pasojë e lëndimit.
Xhaka e Yakini janë vlerësuar lart për punën e bërë në Euro 2024. Kapiteni vlerëson se Yakini duhet të mbetet në postin e selektorit.
“Nëse ndërtoni diçka, nuk keni nevojë për ta shkatërruar atë. Ne shpresojmë se do të vazhdojmë me trajnerin. Ne do të ngrihemi sërish, shpresojmë me trajnerin. Kemi dashur të shkruajmë histori, por fatkeqësisht nuk ia dolëm. Por ju garantoj që do të kthehemi dhe do të bëjmë historinë”.
Zvicra ende nuk është kualifikuar në gjysmëfinale të Kupës së Botës apo të Kampionatit Evropian.
Gazeta e madhe zvicerane, Blick, ka vlerësuar paraqitjen e Xhakës ndaj Anglisë. E ka quajtur “superman”. Xhaka është vlerësuar edhe për faktin që i doli në mbrojtje të menjëhershme Manuel Akanjit, që ishte i vetmi që humbi penallti.
“Ai nuk është i pari dhe as i fundit që humb penallti. Kur shihni se çka ka arritur ai në vitet e fundit dhe në këtë turne, atëherë penalltia është shumë e dhimbshme. Ai duhet ta mbajë kokën lart. Unë isha në pozitën e tij më parë. Dhe jam krenar me të”, ka thënë Xhaka.
