Presidenti rus Vladimir Putin shpalli një armëpushim të njëanshëm 30-orësh për Pashkët në Ukrainë të shtunën, pasi Uashingtoni tha se mund të braktiste bisedimet e paqes brenda ditësh, nëse Moska dhe Kievi nuk tregojnë se janë gati të ndalojnë luftën.
Putin urdhëroi që luftimet të ndalen nga sot ora 18:00 pasdite sipas kohës së Moskës deri në mesnatën e së dielës në mbrëmje.
"Bazuar në konsiderata humanitare... pala ruse shpall një armëpushim për Pashkët. Urdhëroj ndalimin e të gjitha aktiviteteve ushtarake për këtë periudhë," i tha Putin Valery Gerasimov, Shefit të Shtabit të Përgjithshëm të Rusisë, në një takim të transmetuar të shtunën.
"Ne supozojmë se Ukraina do të ndjekë shembullin tonë. Në të njëjtën kohë, trupat tona duhet të jenë të përgatitura për të sprapsur shkeljet e mundshme të armëpushimit dhe provokimet nga armiku, çdo veprim agresiv," shtoi Putin.
Por menjëherë pas njoftimit, rreth një orë para se të hynte në fuqi, sirenat e sulmit ajror ranë në Kiev.
Presidenti i Ukrainës Volodymyr Zelenskiy e hodhi poshtë propozimin si "një tjetër përpjekje nga Putini për të luajtur me jetët njerëzore". 45 minuta para se të fillonte armëpushimi, aeroplanët ukrainas po sprapsnin sulmet ajrore ruse, tha Zelenskiy në një postim në X.
"Dronët Shahed në qiellin tonë zbulojnë qëndrimin e vërtetë të Putinit ndaj Pashkëve dhe ndaj jetës njerëzore", tha ai, duke iu referuar dronëve sulmues të prodhuar në Iran, të përdorur gjerësisht nga Rusia në luftë për të sulmuar qytetet ukrainase larg frontit.
Ministria Ruse e Mbrojtjes tha se trupat e saj ishin udhëzuar për armëpushimin dhe do ta zbatonin atë, me kusht që të "respektohej reciprokisht" nga Ukraina.
Presidenti i SHBA-së Donald Trump dhe Sekretari i Shtetit Marco Rubio kishin thënë të premten se Shtetet e Bashkuara do të tërhiqeshin nga përpjekjet për të ndërmjetësuar një marrëveshje paqeje Rusi-Ukrainë, përveç nëse do të kishte shenja të qarta përparimi së shpejti. Versus.al
