Këshilli i Ministrave ka miratuar vendimin për zgjatjen e afatit të vlefshmërisë së kartave të Identitetit dhe pasaportave. Ministri i Brendshëm Ervin Hoxha foli para mediave dhe deklaroi se ky vendim u shërben 500 mijë personave të cilëve u përfundonte afati i vlefshmërisë për dokumentet e identifikimit.
“Sot këshilli i ministrave miratoi një akt shumë të rëndësishëm për zgjatjen e afateve të vlefshmërisë së kartave ID dhe pasaportave biometrike. Kjo do zgjidhë ngërçin pasi janë rreth 500 mijë shtetas shqiptarë të cilëve u ka përfunduar vlefshmëria e kartave të ID. Në këtë mënyrë me miratimin e këtij akti, do kenë mundësi të gjithë shtetasit shqiptarë jashtë vendit që të ushtrojnë të drejtën e votës”- tha ministri i Brendshëm Ervin Hoxha.
Një vendim i tillë u shërben shqiptarëve të diasporës të cilët do të mund të votojnë që prej vendeve ku jetojnë pa qenë nevoja për të rinovuar dokumentet e identifikimit nëse u ka përfunduar vlefshmëria para zgjedhjeve të 11 majit.
Kërkesa për zgjatjen e afatit të vlefshmërisë u bë nga Komisioni Qendror i Zgjedhjeve me propozimin që afati i vlefshmërisë së këtyre dokumenteve të jetë të paktën deri më datë 15 maj.
Deri më tani shifra e shqiptarëve të diasporës të cilët kanë aplikuar për t’u regjistruar si votues në zgjedhjet parlamentar i kalon 137 mijë persona. Versus.al
