Zëvendëskryeministrja dhe njëkohësisht Ministre e Infrastrukturës dhe Energjisë, Belinda Balluku në kanalet e saj të komunikimit ka bërë të ditur se, duke filluar nga data 2 prill, Shqipëria dhe Izraeli do të kenë lidhje të drejtpërdrejta ajrore.
Zv/kryeministrja vuri në dukje se ky hap do të mundësojë zgjerimin e bashkëpunimit midis dy vendeve, duke përfshirë fusha të tilla si turizmi dhe kultura.
Fluturimi i parë, i cili do të kryhet më 2 Prill, do të transportojë në Tiranë figura të njohura nga industria e turizmit dhe e argëtimit, duke hapur rrugë për një ndërveprim më të ngushtë dhe shkëmbime kulturore.
“Duke nisur nga data 2 prill, Shqipëria dhe Izraeli do të lidhen direkt përmes fluturimeve të ndërsjellta, duke zgjeruar kështu mundësitë e bashkëpunimit mes dy vendeve që historia i ka lidhur ngushtë prej kohësh.
Gjatë vizitës time në Izrael takova Dina Ben-Tal Ganancia, Drejtoren e Përgjithshme të kompanisë ajrore kombëtare izraelite ELAL. Fluturimi inaugurues më 2 Prill, do të sjellë në Tiranë personalitete të fushave të ndryshme nga sektori turizmit dhe showbiz, me fokus promovimin e vendit tonë si një atraksion turistik, më interesant për Evropën”, shkruan Balluku në postim./Versus.al
