Sali Berisha ka mbledhur Këshillin Kombëtar të Partisë Demokratike mbrëmjen e djeshme (6 shtator) nga arresti i shtëpisë ku ndodhet i dënuar nga GJKKO për aferën ‘Partizani’.
Mbledhja me dyer të mbyllura e Këshillit Kombëtar të Partisë Demokratike është shoqëruar me mjaft debate.
Gjatë fjalimit të tij Berisha sulmoi SPAK duke e cilësuar si institucion të shartimit të krimit dhe korrupsionit shqiptar dhe ndërkombëtar.
Ndërkaq Berisha paralajmëroi se do të zhvillojë protesta, por nuk dha një datë konkrete për nisjen e tyre, ndonëse kërkoi një angazhim maksimal të PD-së në këto 9 muaj që na ndajnë nga zgjedhjet.
Sipas Berishës tashmë Partia Demokratike duhet të njohë vetëm sulme për fitore, teksa shfaqet i bindur për këtë të fundit duke thënë se do të jetë shtatori i fundit si opozitë.
‘Të besosh se SPAK do ndëshkojë krimin elektoral, në një kohë kur ajo organizatë elektorale, prokurori private e Edi Ramës amniston Edi Ramën, Erion Veliajn për vjedhjen me një dorë të vetme të 130 mln euro vetëm me inceneratorin e Tiranës, dhe që me urdhër të Edi Ramës, sepse ky i fundit me shkrim dhe me gojë ka kundërshtuar 4 herë ngritjen e tij, do të thotë të mashtrosh veten, publikun dhe të bësh avokatin e një organizate kriminale.
Këto 9 muaj PD duhet të njohë vetëm sulm dhe fitore. Këto 9 muaj, secili nga ne duhet të njohë vetëm sulm, sulm dhe fitore. Këto 9 muaj, fitorja e opozitës do të jetë opsioni ynë i vetëm, etano epitas, me të ose mbi të. Ky do të jetë 9 muajt e ardhshëm dhe qendrimi i PD. Sulm pa kthim prapa. Vetëm me këtë qëndrim ne do të fitojmë. Ky do të jetë shtatori i fundit në opozitë’- deklaroi Berisha.
Mirëpo përveç mesazheve të Berishës, mbledhja ka patur dhe debate e polemika të shumta brenda radhëve të PD-së për sa i përket zgjedhjes së drejtuesve të qarqeve.
Një nga personazhet kryesore të debateve ka qenë Myslim Murrizi.
“Do të mërziteni nga ajo që do them, por nuk kam problem.” Kështu e filloi kritikën e tij në mbledhje Murrizi, i cili nuk u kursye në kritikat e tij. Ai i bëri thirrje Palokës dhe të tjerëve që të mos nxjerrin mediat jashtë nga diskutimet.
Murrizi tha mes të tjerave se edhe pse Berisha kërkoi “sulm” në këtë vit parazgjedhor, "trajneri është me të kuqe", duke iu referuar arrestit në shtëpi të kryedemokratit.
Ndërkohë, kreu i Këshillit Kombëtar të PD-së, Edi Paloka ka deklaruar se “nëse Rama na i vjedh prapë zgjedhjet nuk do dal më të them qe na i vodhi. Përgjegjësia tek ne si fillim. Ne nuk hyjmë në zgjedhje për te marre një mandat”.
Murrizi iu drejtua më pas Flamur Nokës, duke akuzuar këtë të fundit se ka ndikuar në listat e drejtuesve politikë të formuluara nga Berisha.
“Berisha i ka bërë listat e drejtuesve politikë, por ke qenë ti Flamur që i ke fry në vesh”, tha ai, ndërsa shtoi se demokratët nuk mund të motivohen kur figura si Tabaku apo Gjekmarkaj kanë thënë se “Berisha vdiq politikisht” apo se “do të hidhen nga ballkoni po erdhi Berisha”.
Ndërkohë që një reagim nuk mungoi as nga Famur Noka sipas të cilit debati është i domosdoshëm.
“PD ka si bazë debatin e brendshëm. Debati është i shëndetshëm dhe i domosdoshëm. Postimet ne rrjete sociale kundër figurave te PD -se janë propagande. Drejtuesit politik janë tagër i Kryetarit te PD-së.
Mund t’i fryj unë ose dhe ti Myslim por nuk ndikohet Sali Berisha. Ne jemi duke hyre ne një beteje. Gjekmarkaj është njeriu që ka bërë më shumë për të dënuar burgimin politik të Berishës, me shume se askush tjetër, duke komunikuar me kancelaritë e huaja. Jemi bashkuar dhe duhet të bashkohemi edhe me pjesët e tjera. Kemi kërkuar në gjykate që Berisha te njihet si kryetar dhe me pas të kërkojmë në Kuvend bashkimin e Berishës në grupin parlamentar”, tha ndër të tjera Noka.
Myslym Murrizi me tonë të ashpra gjatë mbledhjes ka cilësuar si të pamoralshme edhe bashkimin me të rikthyerit nga Basha.
“Jorida dikur thoshte fundi i Berishës, ndërsa sot është këtu!’- tha Murrizi.
Lista e drejtuesve të 12 qarqeve të Partisë Demokratike nuk përbëri asnjë risi për shumë nga anëtarët e kryesisë dhe anëtarësisë dhe shumë nga emrat u kontestuan dhe në bazë.
Njëri prej tyre ishte dhe Agron Gjekmarkaj.
Sipas Flamur Nokës, Gjekmarkaj është ura lidhëse e Berishës me kancelaritë e huaja për të vijuar betejën e tij për të hequr 2 nongratat, nga SHBA dhe Britania e Madhe.
Kjo vërteton se lista e drejtuesve të qarqeve të Partisë Demokratike nuk përbën asnjë risi. Për përzgjedhjen e tyre nuk është pyetur anëtarësia dhe as janë votuar./ Versus.al
